ପ୍ରଥମ ସନ୍ତାନ ଜନ୍ମ ପରେ ପ୍ରସୂତିଙ୍କ ମୃତ୍ୟୁ

  ପ୍ରଥମ ସନ୍ତାନ ଜନ୍ମ ପରେ ପ୍ରସୂତିଙ୍କ ମୃତ୍ୟୁ

କାଳିଆପାଣି :ମାତୃତ୍ବରେ ନାରୀ ଜୀବନରେ ପରିପୂର୍ଣ୍ଣତା ଆସୁଥିବା କହି ନିଜ ପ୍ରଥମ ସନ୍ତାନ ଜନ୍ମକୁ ନେଇ ବେଶ ଖୁସିଥିଲେ ସୀମା। ଠିକ୍‌ ଆଉ ମାସେ ପରେ ନିଜର ୨୪ ତମ ଜନ୍ମଦିନ ପାଳିଥାନ୍ତେ। ସେହି ବେଳକୁ ବି ସମ୍ଭାବ୍ୟ ପ୍ରସବ ତାରିଖ ଥିଲା। ଏହାକୁ ଭଲ ମେଳକ ଭାବି ନିଜ ଜନ୍ମଦିନରେ ସନ୍ତାନ ପ୍ରସବ ଆଶା ରଖିଥିଲେ ସେ। ହେଲେ ବିଧିର ବିଧାନ ବିଚିତ୍ର।ଶିଶୁକନ୍ୟା ଜନ୍ମ ନେବାର ଦେଢ଼ଦିନ ପରେ ସବୁଦିନ ପାଇଁ ଆଖି ବୁଜିଥିଲେ ପ୍ରସୂତି ସୁକିନ୍ଦା ବ୍ଲକ କୁହିକାର ସୁନିଲ ନାୟକଙ୍କ ପତ୍ନୀ ସୀମା ପରିଡ଼ା। ସୀମାଙ୍କ ଅକାଳ ମୃତ୍ୟୁକୁ ନେଇ ୨ ପରିବାର ଓ ଗ୍ରାମବାସୀଙ୍କ ମଧ୍ୟରେ ଶୋକର ଛାୟା ଖେଳିଯାଇଛି। ସ୍ବାଭାବିକ ଥିବା ନବଜାତକ ଏବେ ସଂପର୍କୀୟ ବଡ଼ବୋଉଙ୍କ ଠାରୁ କ୍ଷୀର ଖାଉଛି। ଚିକିତ୍ସା ଅବହେଳା କିମ୍ବା ତ୍ରୁଟିଯୁକ୍ତ ଚିକିତ୍ସାରୁ ପ୍ରସୂତିଙ୍କ ମୃତ୍ୟୁ ହୋଇଥିବା ପରିବାର ପକ୍ଷରୁ ଅଭିଯୋଗ ହୋଇଛି।ଗୋଡ଼ରେ ଅସହ୍ୟ ବିନ୍ଧା ପାଇଁ ଗତ ସୋମବାର ସୀମାଙ୍କୁ କଟକ ବଡ଼ ଡାକ୍ତରଖାନା ନିଆଯାଇଥିଲା। ସମ୍ଭାବ୍ୟ ପ୍ରସବ ତାରିଖର ମାସେ ପୂର୍ବରୁ ଡାକ୍ତର ଅସ୍ତ୍ରୋପଚାର କରି ପ୍ରସବ ପରାମର୍ଶ ଦେଇଥିଲେ। ମଙ୍ଗଳବାର ମଧ୍ୟାହ୍ଣରେ ତାଙ୍କର ସଫଳ ଅସ୍ତ୍ରୋପଚାର ହୋଇଥିବା ଏବଂ ମା’ ଓ ଶିଶୁ ସ୍ବାଭାବିକ ଥିବା କୁହାଯାଇଥିଲା। ବୁଧବାର ଅପରାହ୍ଣରୁ ସୀମାଙ୍କ ସ୍ବାସ୍ଥ୍ୟାବସ୍ଥାରେ ଅବନ୍ନତି ଦେଖା ଦେଇଥିଲା। ତାଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା। ରାତି ୧୧ଟା ସମୟରେ ସ୍ବାସ୍ଥ୍ୟାବସ୍ଥା ଗୁରୁତର ହୋଇଥିଲା। ବଞ୍ଚିବା ଆଶା କ୍ଷୀଣ ବୋଲି କୁହାଯାଇଥିଲା।ରୋଗଶଯ୍ୟାରେ ଥିବା ପତ୍ନୀଙ୍କୁ ଦେଖା କରିବାକୁ ସ୍ବାମୀ ଅନୁମତି ଚାହିଥିଲେ। ସୁନିଲ ପତ୍ନୀଙ୍କୁ ସେହି ଆଇସିୟୁରେ ଭେଟି କଥା ହୋଇଥିଲେ। ଧୈର୍ଯ୍ୟ ଧର, ଆମେ ଝିଅକୁ ଧରି ଭଲରେ ଘରକୁ ଫେରିଯିବା ବୋଲି କହିବାରେ ସୀମା ଛଳଛଳ ମୁହଁରେ ହଁ ଭରିଥିଲେ। ହେଲେ ଏହି ପଦିଏ କଥା ତାଙ୍କର ଶେଷକଥା ଥିଲା। ସୁନିଲ ବାହାରକୁ ଆସିବାର ୫ ମିନିଟ୍‌ ମଧ୍ୟରେ ପାଖେପ‌ାଖେ ଥିବା ଶାଶୂ ଭାରତୀ ପରିଡ଼ା ଝିଅର ମୃତ୍ୟୁ ଖବର ଶୁଣାଇ ମୂର୍ଚ୍ଛା ଯାଇଥିଲେ। ଶେଷଶଯ୍ୟା ପାଖରେ ମାଉସୀ ଶାଶୂ ମିନତି ନାୟକ, ଦିଅର ଅନିଲ ନାୟକ ଓ ସମ୍ପର୍କୀୟ ଶ୍ବଶୁର ଲିପୁ ନାୟକ ଉପସ୍ଥିତ ଥିଲେ। ଗତକାଲି ପୈତୃକ ଗାଁ ଗାନ୍ଧାପାଳ ଶ୍ମଶାନରେ ତାଙ୍କ ଶେଷକୃତ୍ୟ କରାଯାଇଛି। ଦିଅର ତାପସ ନାୟକ ମୁଖାଗ୍ନି ଦେଇଥିଲେ।