ବିର୍ସା ମୁଣ୍ଡାଙ୍କ ପ୍ରତିମୂର୍ତ୍ତି ସ୍ଥାପନ ପାଇଁ ରାଷ୍ଟ୍ରପତିଙ୍କ ନିକଟରେ ଦାବି

 ବିର୍ସା ମୁଣ୍ଡାଙ୍କ ପ୍ରତିମୂର୍ତ୍ତି ସ୍ଥାପନ ପାଇଁ ରାଷ୍ଟ୍ରପତିଙ୍କ ନିକଟରେ ଦାବି

ରାଇରଙ୍ଗପୁର : ମୟୂରଂଭଜ ଜିଲ୍ଲା ରାଇରଙ୍ଗପୁରସ୍ଥ ବିର୍ସା ମୁଣ୍ଡା ଛକରେ ଭଗବାନ ବିର୍ସା ମୁଣ୍ଡାଙ୍କ ଏକ ଭବ୍ୟ ପୂର୍ଣ୍ଣାକାୟ ପ୍ରତିମୂର୍ତ୍ତି ସ୍ଥାପନ ପାଇଁ ଦାବି ହୋଇଛି। ଏନେଇ ରାଇରଙ୍ଗପୁରର ଉପଜିଲ୍ଲାପାଳ ଉଗ୍ରେସନ ଓରାମଙ୍କ ଜରିଆରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରାଯାଇଛି। ଦାବିପତ୍ରରେ ଉଲ୍ଲେଖ ଯେ, ୧୯୯୭ ମସିହାରେ ଭାରତର ସ୍ୱାଧୀନତାର ସ୍ୱର୍ଣ୍ଣ ଜୟନ୍ତୀ ଅବସରରେ ରାଇରଙ୍ଗପୁରର ଏକ ପ୍ରମୁଖ ସାଧାରଣ ସ୍ଥାନକୁ ‘ବିର୍ସା ମୁଣ୍ଡା ଛକ’ ଭାବେ ନାମିତ କରାଯାଇଥିଲା। କିନ୍ତୁ ଦୀର୍ଘ ବର୍ଷ ବିତିଯାଇଥିଲେ ମଧ୍ୟ ସେଠାରେ ଆଜି ପର୍ଯ୍ୟନ୍ତ ଭଗବାନ ବିର୍ସା ମୁଣ୍ଡାଙ୍କ ପ୍ରତିମୂର୍ତ୍ତି ସ୍ଥାପିତ ହୋଇନାହିଁ। ଏନେଇ ଆଦିବାସୀ ସମାଜ ସମେତ ରାଇରଙ୍ଗପୁରବାସୀଙ୍କ ମଧ୍ୟରେ ଗଭୀର ଅସନ୍ତୋଷ ପ୍ରକାଶ ପାଇଛି। ବିର୍ସା ମୁଣ୍ଡା କେବଳ ଆଦିବାସୀ ସମାଜର ଜଣେ ମହାନ ବୀର ନୁହେଁ, ବରଂ ଜଳ, ଜଙ୍ଗଲ, ଜମି, ସ୍ୱାଭିମାନ, ସାମାଜିକ ନ୍ୟାୟ ଓ ସ୍ୱାଧୀନତାର ସଂଗ୍ରାମର ଏକ ଅମର ପ୍ରତୀକ। ତାଙ୍କର ତ୍ୟାଗ, ସଂଘର୍ଷ ଓ ଆଦର୍ଶ ଆଜି ମଧ୍ୟ ଦେଶର କୋଟି କୋଟି ଆଦିବାସୀଙ୍କ ସମେତ ସମଗ୍ର ଭାରତବାସୀଙ୍କୁ ପ୍ରେରଣା ଯୋଗାଉଛି। ତାଙ୍କ ଜନ୍ମଦିନ ୧୫ ନଭେମ୍ବରକୁ ‘ଜନଜାତୀୟ ଗୌରବ ଦିବସ’ ଭାବେ ପାଳନ କରାଯାଉଥିବାରୁ ରାଇରଙ୍ଗପୁର ବିର୍ସା ମୁଣ୍ଡା ଛକରେ ତାଙ୍କର ଏକ ପ୍ରତିମୂର୍ତ୍ତି ସ୍ଥାପନ ପାଇଁ ଦାବି ହେଉଛି। ଦାବିପତ୍ରରେ ରାଷ୍ଟ୍ରପତି, କେନ୍ଦ୍ର ଓ ରାଜ୍ୟ ସରକାରର ସମ୍ପୃକ୍ତ ବିଭାଗ, ଜିଲ୍ଲା ପ୍ରଶାସନ ଏବଂ ରାଇରଙ୍ଗପୁର ପୌର ପ୍ରଶାସନକୁ ଆବଶ୍ୟକ ମାର୍ଗଦର୍ଶନ ଓ ସହଯୋଗ ପ୍ରଦାନ କରି ପ୍ରତିମୂର୍ତ୍ତି ନିର୍ମାଣ ଓ ସ୍ଥାପନ ପାଇଁ ପଦକ୍ଷେପ ନେବାକୁ ନିବେଦନ କରାଯାଇଛି। ଦାବି ପତ୍ର ପ୍ରଦାନ ସମୟରେ ପୂର୍ବତନ ବିଧାୟକ ପ୍ରହ୍ଲାଦ ପୂର୍ତ୍ତି, ପୂର୍ବତନ ସରପଞ୍ଚ ବେରେଲ ସିରକା, ବରିଷ୍ଠ ନେତା ବିଡାର ମାଝୀ, ଅନିଲ କୁମାର ବିରୁଆ, ଆଇନଜୀବୀ ଟିକୁନ ଜେରାଇଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।