ଗାଁ ପାଖ ନାଳରୁ ବୃଦ୍ଧାଙ୍କ ଶବ ଉଦ୍ଧାର, ହତ୍ୟା ଅଭିଯୋଗ
କଳାବାଡିଆ: ମୟୂରଭଞ୍ଜଜିଲ୍ଲା ବାଙ୍ଗିରିପୋଷି ଥାନା ଚାକିଡି ଗାଁ ନିକଟ ଏକ ନାଳ (ମଧ୍ୟମ ଝରଣା) ନିକଟରୁ ଜଣେ ବୃଦ୍ଧାଙ୍କ ମୃତଦେହ ଉଦ୍ଧାର କରାଯାଇଛି। ବୃଦ୍ଧାଙ୍କ ନାମ ରାନୀ ଫୁର୍ତ୍ତି (୬୫) ବୋଲି ଜଣାଯାଇଛି। ତେବେ ଏହା ଏକ ହତ୍ୟା ବୋଲି ବୃଦ୍ଧାଙ୍କ ପୁଅ ଅଭିଯୋଗ କରିଛନ୍ତି। ମୃତକାଙ୍କ ପୁଅ ଲୁବିନ ଏନେଇ ଥାନାରେ ଅଭିଯୋଗ କରିଥିଲେ। ଅଭିଯୋଗ ଭିତ୍ତିରେ ପୁଲିସ ଫରେନ୍ସିକ୍ ଟିମ୍ ସହ ଯାଇ ଅନୁସନ୍ଧାନ କରିଛି। ଏନେଇ ନଂ୨୯୨/୨୫ ମାମଲା ରୁଜୁ ହୋଇଛି। ବ୍ୟବଚ୍ଛେଦ ନିମନ୍ତେ ବାରିପଦା ପଠାଯାଇଛି। ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ଥାନା ଅଧିକାରୀ ପଞ୍ଚାନନ ମହାନ୍ତି କହିଛନ୍ତି। ସୂଚନାନୁସାରେ, ଚାକିଡି ପଞ୍ଚାୟତ ଚାକିଡି ଗ୍ରାମର ଲୁବିନ ଫୁର୍ତ୍ତି ବାହାରେ କାମ କରନ୍ତି। ଗାଁ ଘରେ ତାଙ୍କ ପତ୍ନୀ ଓ ବୃଦ୍ଧାମା ରାନୀ ରହନ୍ତି । ମଙ୍ଗଳବାର ରାତି ରାନୀ ଗାଁକୁ ବୁଲିବାକୁ ଯାଇଥିଲେ। ଏହାପରେ ସେ ଘରକୁ ଫେରିନଥିଲେ। କାହା ଘରେ ରାତି କଟାଇଥିବା ଭାବି ବୋହୁ ଖୋଜାଖୋଜି କରି ନଥିଲେ। ବୁଧବାର ସକାଳୁ ରାନୀଙ୍କ ଶବ ଏକ ନାଳ ପାଖରେ ପଡି଼ଥିଲା । ବେକ ରେ ଏକ ଚୁନୁରୀ ବନ୍ଧା ହୋଇ ଥିବାରୁ କେହି ତାଙ୍କୁ ଗଳା ଚିପି ହତ୍ୟା କରିଥିବା ପୁଅ ଅଭିଯୋଗ କରିଛନ୍ତି।।









Comments