ଅଁଳାନବମୀ ପାଇଁ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଉଚ୍ଚସ୍ତରୀୟ ପ୍ରସ୍ତୁତି କମିଟି ବୈଠକ: ୧୧ ଥାକିଆ ବ୍ୟାରିକେଡ୍‌, ୨୩ ପ୍ଲାଟୁନ୍‌ ପୁଲିସ ବ୍ୟବସ୍ଥା

ସାକ୍ଷୀଗୋପାଳ: ସାକ୍ଷୀଗୋପାଳ ମନ୍ଦିରରେ ନଭେମ୍ବର ୧୮ ଅଁଳାନବମୀ ପାଇଁ ପ୍ରଶାସନିକ ସମନ୍ବୟ ବୈଠକ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଆଜି ଓଡ଼ିଆ ବିଶ୍ୱବିଦ୍ୟାଳୟ ସଭାଗୃହରେ ଅନୁଷ୍ଠିତ ବୈଠକରେ ଯାତ୍ରା ପରିଚାଳନା, ସୁରକ୍ଷା ଓ ଭିଡ଼ ନିୟନ୍ତ୍ରଣ ନେଇ ବହୁ ଗୁରୁତ୍ବପୂର୍ଣ୍ଣ ନିଷ୍ପତ୍ତି ହୋଇଛି। ନଭେମ୍ବର ୧୭ ସନ୍ଧ୍ୟାରୁ ୨୧ ତାରିଖ ପର୍ଯ୍ୟନ୍ତ ପୁଲିସ ମୁତୟନ ରହିବେ। ଭକ୍ତଙ୍କ ଦର୍ଶନ ପାଇଁ ୧୧ ଥାକିଆ  ବ୍ୟାରିକେଡ୍‌ ସହ ଛାୟା, ମ୍ୟାଟ୍‌, ପାନୀୟଜଳ ଓ ଜଳ ସିଞ୍ଚନ ବ୍ୟବସ୍ଥା କରାଯିବ। ସାଧାରଣ ଭକ୍ତ ସିଂହଦ୍ୱାର ସମ୍ମୁଖରୁ ପ୍ରବେଶ କରି ଉତ୍ତର ଦ୍ୱାର ଦେଇ ପ୍ରସ୍ଥାନ କରିବେ। ପାସ୍‌ଧାରୀଙ୍କ ପାଇଁ ସତ୍ୟବାଦୀ ଉଚ୍ଚବିଦ୍ୟାଳୟ ସମ୍ମୁଖରେ ଏବଂ ଭିଆଇପିଙ୍କ ପାଇଁ ପଶ୍ଚିମଦ୍ୱାରରେ ସ୍ୱତନ୍ତ୍ର ପ୍ରବେଶ ବ୍ୟବସ୍ଥା ହେବ ବୋଲି ପୁରୀ ଏସ୍‌ପି ସୂଚନା ଦେଇଥିଲେ। ସେହିପରି ଦେବୋତ୍ତର କମିଶନର ରୋହିତ ମିଶ୍ରଙ୍କ ସୂଚନାନୁଯାୟୀ, ୩ ହଜାର ପ୍ରିଭିଲେଜ୍‌ ପାସ୍‌, ୪୦୦ ଚାରିଚକିଆ ଯାନ ପାସ୍‌ ଓ ୧୫୦ ଡ୍ୟୁଟି ପାସ୍‌ ଜାରି ହେବ। ପାସ୍‌ରେ କ୍ୟୁଆର୍‌ କୋଡ୍‌ ଓ ହୋଲୋଗ୍ରାମ ରହିବ।ସ୍କାନିଂ ମାଧ୍ୟମରେ ଯାଞ୍ଚ କରାଯିବ। ନକଲି ପାସ୍‌ ବ୍ୟବହାର କଲେ ୧ ହଜାର ଟଙ୍କା ଜରିମାନା ସହ ଆଇନଗତ କାର୍ଯ୍ୟାନୁଷ୍ଠାନ ହେବ। ମନ୍ଦିର ଭିତରକୁ ମୋବାଇଲ୍‌ ଓ କ୍ୟାମେରା ନେବା ନିଷେଧ ରହିବ। ଏହି ନିୟମ ଉଲ୍ଲଂଘନ କଲେ ମଧ୍ୟ ସମାନ ଜରିମାନା ଆଦାୟ ହେବ। ଯାତ୍ରା ପୂର୍ବରୁ ରାସ୍ତା ମରାମତି, ଆଲୋକୀକରଣ ଓ ଜଳ ନିଷ୍କାସନକୁ ଗୁରୁତ୍ୱ ଦିଆଯାଇଛି। ନଭେମ୍ବର ୧୦ରୁ ପୂର୍ତ୍ତ ବିଭାଗ ଏହି କାର୍ଯ୍ୟ ଆରମ୍ଭ କରିବ। ବର୍ଷାଜଳ ନିଷ୍କାସନ ପାଇଁ ଉଚ୍ଚକ୍ଷମତାସମ୍ପନ୍ନ ପମ୍ପ ମୁତୟନ ହେବା ସହ ଚନ୍ଦନ ପୋଖରୀ ଓ ଥାଳିଧୁଆ ପୋଖରୀ ସଫେଇ କରାଯିବ। ଷ୍ଟେସନ୍‌ ପଡ଼ିଆ, କୋର୍ଟ ଉପର, ସରସ୍ୱତୀ ଶିଶୁ ବିଦ୍ୟାମନ୍ଦିର ଓ ସାରୁଗାଡ଼ିଆ ଛକ ସମେତ ବିଭିନ୍ନ ସ୍ଥାନରେ ଗାଡ଼ି ପାର୍କିଂ ବ୍ୟବସ୍ଥା ହେବ। ମନ୍ଦିରର ପ୍ରବେଶ ପଥ, ପାର୍କିଂସ୍ଥଳ ଓ ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକ ସିସିଟିଭି ନଜରରେ ରହିବ। ଏହି ଅବସରରେ ମା’ ରାଧାରାଣୀଙ୍କ ଦୁର୍ଲଭ ପାଦ ଦର୍ଶନ ପାଇଁ ଲକ୍ଷାଧିକ ଭକ୍ତଙ୍କ ସମାଗମ ଆଶା କରାଯାଉଥିବାରୁ ୨୩ ପ୍ଲାଟୁନ୍‌ ପୁଲିସଫୋର୍ସ ମୁତୟନ ହେବେ। ଯାତ୍ରାର ସମସ୍ତ ପ୍ରସ୍ତୁତି ନଭେମ୍ବର ୧୫ ସୁଦ୍ଧା ଶେଷ କରିବାକୁ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା ନିର୍ଦ୍ଦେଶ ଦେଇଛନ୍ତି ସେହିପରି ପୂର୍ତ୍ତ ବିଭାଗ ପକ୍ଷରୁ ବ୍ୟାରିକେଡ୍‌ ନିର୍ମାଣ ପାଇଁ ୫୩ ଲକ୍ଷ ଟଙ୍କାର ଟେଣ୍ଡର ହୋଇଥିବା ବୈଠକରେ ସୂଚନା ଦିଆଯାଇଥିଲା। ଯାତ୍ରା ସମୟରେ ସ୍ଥାନୀୟ ଅଞ୍ଚଳବାସୀଙ୍କ ସହଯୋଗ କାମନା କରିବା ସହ ଅଁଳାନବମୀ ଦିନ ସ୍ଥାନୀୟ ଛୁଟି ଘୋଷଣା ପ୍ରସଙ୍ଗ ବିଚାର କରାଯିବ ବୋଲି ଜିଲ୍ଲାପାଳ କହିଥିଲେ। ବୈଠକରେ ବିଧାୟକ ଓମ୍‌ପ୍ରକାଶ ମିଶ୍ର, ଉପଜିଲ୍ଲାପାଳ ରାଜକିଶୋର ଜେନା, ପଞ୍ଚାୟତ ସମିତି ଅଧ୍ୟକ୍ଷ ସୁନୀଲ କୁମାର ପଣ୍ଡା, ଅତିରିକ୍ତ ଏସ୍‌ପି ସୁଶୀଲ ପଟେଲ, ସତ୍ୟବାଦୀ ବିଡିଓ ଦେବାଶିଷ ନାୟକ, ତହସିଲ୍‌ଦାର ସନ୍ତୋଷ କୁମାର ପାଣିଗ୍ରାହୀ, ଅତିରିକ୍ତ ତହସିଲ୍‌ଦାର ଓମ୍‌ପ୍ରକାଶ ପରିଡ଼ା ଓ ଅର୍ପିତା ସେନାପତି, ଜିଲ୍ଲା ଖାଦ୍ୟ ସୁରକ୍ଷା ଅଧିକାରୀ ତପସ୍ୱିନୀ ବେହେରା, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ସନ୍ତୋଷ କୁମାର ସେଠୀ, ଜିଲ୍ଲା ଅଗ୍ନିଶମ ଅଧିକାରୀ ପ୍ରଭାତ ରାଉତଙ୍କ ସମେତ ସେବାୟତ ସଂଘ ଓ ମନ୍ଦିର ପରିଚାଳନା କମିଟିର ସମସ୍ତ ସଦସ୍ୟ ଏବଂ ଜିଲ୍ଲା ଓ ବ୍ଲକ୍‌ସ୍ତରୀୟ ଅଧିକାରୀମାନେ ଯୋଗଦେଇଥିଲେ। ଶେଷରେ ମନ୍ଦିରର ଅତିରିକ୍ତ କାର୍ଯ୍ୟନିର୍ବାହୀ ଅଧିକାରୀ ଲଳିତେନ୍ଦୁ ମହାନ୍ତି ଧନ୍ୟବାଦ ଅର୍ପଣ କରିଥିଲେ।