ବାଲେଶ୍ବରରେ ଲଘୁଖଣିଜ ମହାଲୁଟ୍‌: ରୟାଲଟି ଅପେକ୍ଷା ଜରିମାନା ଆଦାୟ ଅଧିକ

ବାଲେଶ୍ବର : ବାଲେଶ୍ବର ଜିଲ୍ଲାରେ ଲଘୁଖଣିଜ ଚୋରା କାରବାର ନେଇ ଚିନ୍ତାଜନକ ଚିତ୍ର ସାମନାକୁ ଆସିଛି। ଏଠାରେ ଆଇନଗତ କାରଣରୁ ବନ୍ଦ ପଡ଼ିଥିବା ପଥର ଖାଦାନରୁ ମହାଲୁଟ୍‌ ଚାଲିଛି। ସ୍ଥିତି ଏଭଳି ହୋଇଛି ଯେ ବାଲେଶ୍ବର ଜିଲ୍ଲାରୁ ଲଘୁଖଣିଜ ଲିଜ୍‌ ବାବଦରେ ସରକାର ପାଉଥିବା ରୟାଲଟି ରାଜସ୍ବ ଅପେକ୍ଷା ଚୋରା କାରବାରରୁ ଜରିମାନା ଅର୍ଥ ଅଧିକ ପାଉଛନ୍ତି। ଏହି କାରଣରୁ ଲଘୁ ଖଣିଜ ଚୋରା କାରବାରକୁ ପରୋକ୍ଷରେ ପ୍ରୋତ୍ସାହନ ଦିଆଯାଉଥିବା ଅଭିଯୋଗ ହେଉଛି।ଗତ ୨ ବର୍ଷର ତଥ୍ୟ ଉପରେ ନଜର ପକାଇଲେ ୨୦୨୫-୨୬ରେ ଜିଲ୍ଲାର ନୀଳଗିରି, ବାଲିଆପାଳ, ରେମୁଣା ତହସିଲ ଅଞ୍ଚଳରୁ ଲଘୁଖଣିଜ ଦ୍ରବ୍ୟର ରୟାଲଟି ରାଜସ୍ବ ବାବଦରେ ୨କୋଟି ୪୩ ଲକ୍ଷ ୧୮୪୬ ଟଙ୍କା ସରକାର ପାଇଛନ୍ତି। ଏଭଳି ସ୍ଥିତିରେ ସଂପୃକ୍ତ ବର୍ଷ ଏହି ୩ ତହସିଲ ସମେତ ସୋର ତହସିଲକୁ ମିଶାଇ ବେଆଇନ ଲଘୁଖଣିଜ ଉତ୍ତୋଳନ ନେଇ ଜରିମାନା ବାବଦରେ ୯କୋଟି ୮୦ଲକ୍ଷ ୧୧ହଜାର ୫୬୧ଟଙ୍କା ପାଇଛନ୍ତି। ଆଇନସମ୍ମତ ଖଣି ଅପେକ୍ଷା ଚୋରାଚାଲାଣରୁ ଢେର ଅଧିକ ଗୁଣ ରାଜସ୍ବ ଜରିମାନା ଆକାରରେ ସରକାର ପାଉଛନ୍ତି।  ହସ୍ତଗତ ତଥ୍ୟ ଅନୁସାରେ, ସୋରରେ ଖଣି ବନ୍ଦ ଥିବାରୁ ଆଇନସମ୍ମତ ଭାବେ ଟଙ୍କାଟିଏ ରୟାଲଟି ରାଜସ୍ବ ମିଳିନଥିବା ବେଳେ ଚୋରା ଚାଲାଣ ପାଇଁ ଜରିମାନା ଆଦି ବାବଦରେ ପାଖାପାଖି ୫କୋଟି ୩୪ଲକ୍ଷ ୪୧ହଜାର ଟଙ୍କା ଆଦାୟ ହୋଇଛି।  ସେହିଭଳି, ଚଳିତ ୨୦୨୬-୨୭ ଆର୍ଥିକ ବର୍ଷ‌ (ଅଗଷ୍ଟ ମାସ ପର୍ଯ୍ୟନ୍ତ) ଆଇନସମ୍ମତ କାରବାରରୁ ରୟାଲଟି ବାବଦରେ ୩୮ଲକ୍ଷ ୪୪ହଜାର ୧୩୨ ଟଙ୍କା ମିଳିଥିବା ବେଳେ ଜରିମାନା ବାବଦରେ ୧କୋଟି ୧୩ଲକ୍ଷ ୭୭ହଜାର ୧୩୨ ଟଙ୍କା ମିଳିଛି। ଗତବର୍ଷ ଭଳି ଚଳିତବର୍ଷ ମଧ୍ୟ ‌ଚୋରା କାରବାରରୁ ସରକାର ତଥା ଖଣି ବିଭାଗକୁ ଅଧିକ ରାଜସ୍ବ ମିଳିବା ଜଳଜଳ ଦିଶୁଛି। ୨୦୨୬-୨୭ରେ (ଅଗଷ୍ଟ ପର୍ଯ୍ୟନ୍ତ) ଜିଲ୍ଲାର ୪ ତହସିଲ ଅଧୀନରେ ଲଘୁଖଣିଜ ଚୋରାଚାଲାଣ ନେଇ ୧୨୧ଟି ଗାଡ଼ି ଜବତ କରାଯାଇଥିବା ବେଳେ ୨୦୨୫-୨୬ରେ ଜିଲ୍ଲାର ୬ ତହସିଲ ଅଧୀନରେ ୪୪୩ ଗାଡ଼ି ଜବତ କରାଯାଇଥିଲା। ଜିଲ୍ଲାରେ ୧୮୨ଟି ପଥର ଓ ବାଲି ଖାଦନକୁ ପରିବେଶ ଜନିତ କାରଣ ସହ କୋର୍ଟରେ ମାମଲା ପାଇଁ ବନ୍ଦ ରଖାଯାଇଛି।କାଗଜପତ୍ରରେ ଏଗୁଡ଼ିକୁ ବନ୍ଦ ଦେଖାଯାଇଥିବା ବେଳେ ବେଆଇନ ଭାବେ ଖନନ ଜାରି ରହିଥିବା ଜରିମାନା ଅର୍ଥକୁ ଦେଖିଲେ ପ୍ରମାଣିତ ହେଉଛି। ଏଠାରେ ଉଲ୍ଲେଖ‌ଯୋଗ୍ୟ ଯେ ସୋର ତହସିଲ ଅଞ୍ଚଳରେ ୬୩ଟି, ଖଇରାରେ ୫୫ଟି, ଜଳେଶ୍ବର‌ରେ ୨୧ଟି, ନୀଳଗିରିରେ ୧୦ଟି, ରେମୁଣାରେ ୧୨ଟି ଲଘୁଖଣିଜ ସୈରାତ ବନ୍ଦ କରାଯାଇଛି। ଜିଲ୍ଲାରେ ଆଇନସମ୍ମତ ଲଘୁଖଣିଜ କାରବାର ଅପେକ୍ଷା ବେଆଇନ କାରବାରରୁ ଅଧିକ ରାଜସ୍ବ ମିଳିବା ଘଟଣାକୁ ଜିଲ୍ଲା ଖଣି ଅଧିକାରୀ ଜଗନ ବେହେରା ମଧ୍ୟ ସ୍ବୀକାର କରିଛନ୍ତି। ବିଭିନ୍ନ କାରଣରୁ ବନ୍ଦ ପଡ଼ିଥିବା ଖଣିକୁ ଚଲାଇବା ପାଇଁ ଉଦ୍ୟମ ଜାରି ରହିଛି। ତେବେ ଲୋକଙ୍କ ଆବଶ୍ୟକତା ଥିବାରୁ ଏଭଳି ବେଆଇନ ଖନନ ବଢ଼ୁଛି ବୋଲି ଶ୍ରୀ ବେହେରା କହିଛନ୍ତି।