ବନ୍ଧୁକ ମାଫିଆକୁ ମାଡ଼ିବସିଲେ: ଥାର୍ ସହ ୨ଟି ବନ୍ଧୁକ, ୮ ଗୁଳି ଜବତ
ଭୁବନେଶ୍ବର: ରାଜଧାନୀ ଉପକଣ୍ଠରେ ବେଆଇନ ବନ୍ଧୁକ କାରବାର ଚଳାଇଥିବା କଟକଜିଲ୍ଲା ଗୋବିନ୍ଦପୁର ଥାନା ନୋଡ଼ା ଗ୍ରାମର ବିଶ୍ୱଜିତ ବେହେରା ଓରଫ କାଳିଆ(୩୩)କୁ କମିସନରେଟ୍ ପୁଲିସର ସ୍ପେସାଲ କ୍ରାଇମ୍ ୟୁନିଟ୍ ଗିରଫ କରିଛି। ତାଠାରୁ ୨ଟି ସେମି ଅଟୋମେଟିକ୍ ବନ୍ଧୁକ ଓ ୮ଟି ଗୁଳି, ମହିନ୍ଦ୍ରା ଥାର୍ ରକ୍ସ, ମୋବାଇଲ୍ ଫୋନ୍ ଓ ନଗଦ କିଛି ଟଙ୍କା ଜବତ କରାଯାଇଛି ବୋଲି ନୂଆପଲ୍ଲୀ ଥାନାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଡିସିପି(ଏସ୍ସିୟୁ) ଅନୁପ୍ କାନୁନ୍ଗୋ ସୂଚନା ଦେଇଛନ୍ତି।କାଳିଆ ବନ୍ଧୁକ କାରବାର କରୁଥିବା ଏବଂ ଲୋକଙ୍କୁ ବନ୍ଧୁକ ଦେଖାଇ ଭୟଭୀତ କରୁଥିବା ପୁଲିସକୁ ସୂଚନା ମିଳିଥିଲା। ତେବେ ଦୁର୍ଗାପୂଜା ସମୟରେ କାଳିଆ ଚୋରା ବନ୍ଧୁକରୁ ବାଣ ଫୁଟାଇବା ଭଳି ଉପରକୁ କୁଳି କରି ଭିଡିଓ କରିଥିଲା। ଆଉ ସେହି ଭିଡିଓକୁ ସୋସିଆଲ୍ ମିଡିଆରେ ଛାଡ଼ିଥିଲା। ଭିଡିଓ ଭାଇରାଲ୍ ହେବା ପରେ ତାକୁ ଧରିବା ପାଇଁ ଏସ୍ସିୟୁ ଯୋଜନା କରିଥିଲା। ଏସ୍ସିୟୁ ଜାଣିବାକୁ ପାଇଥିଲା ଯେ କାଳିଆ ପାଖାପାଖି ୬ମାସ ତଳେ ମୁଙ୍ଗେରରୁ ୨ଟି ବନ୍ଧୁକ ଆଣିଛି। ଆଉ ସେହି ବନ୍ଧୁକକୁ ବିକ୍ରି ପାଇଁ କିଛି ସ୍ଥାନୀୟ ଅପରାଧୀଙ୍କ ସହ ଡିଲ୍ କରିଛି। ତେବେ ଗୁରୁବାର ଅପରାହ୍ଣ ପାଖାପାଖି ୨ଟା ସମୟରେ ବାଲିପାଟଣା ବ୍ଲକ୍ କାର୍ଯ୍ୟାଳୟ ନିକଟରେ ଥାର୍ଗାଡ଼ିରେ ବନ୍ଧୁକ ଓ ଗୁଳି ଧରି ଅପରାଧୀଙ୍କୁ ଅପେକ୍ଷା କରିଥିବା ବେଳେ ଏସ୍ସିୟୁର ୨ଟି ଟିମ୍ ସେଠାରେ ଅତର୍କିତ ଭାବେ ଚଢ଼ଉ କରି ତାକୁ ଗିରଫ କରିଥିଲା। ତାଠାରୁ ୨ଟି ବନ୍ଧୁକ ୮ରାଉଣ୍ଡ ଗୁଳି ଜବତ କରିଥିଲା। ଜେରା ପରେ ଆଜି ତାକୁ କୋର୍ଟ ଚାଲାଣ କରାଯାଇଛି। ପୂର୍ବରୁ ମଧ୍ୟ ତା ନାଁରେ ବିଭିନ୍ନ ଥାନାରେ ଏକାଧିକ ଆପରାଧିକ ମାମଲା ରହିଛି। କଟକ ଜିଲ୍ଲା ଓଲଟପୁର ଥାନାରେ ୨ଟି ମାମଲା ଥିବା ବେଳେ ଗୋବିନ୍ଦପୁର ଥାନାରେ ୩ ମାମଲା ଥିବା ପୁଲିସ ରେକର୍ଡରୁ ଜଣାପଡ଼ିଛି।ତଦନ୍ତ ବେଳେ ଜଣାପଡ଼ିଛି ଯେ ପ୍ରାୟ ୨ବର୍ଷରୁ ଅଧିକ ହେବ କାଳିଆ ସ୍ଥାନୀୟ ଅଞ୍ଚଳରେ ବାଲି ବ୍ୟବସାୟ କରୁଥିଲା। ଆଉ ଏହି ସମୟରେ ନିଜ ସୁରକ୍ଷା ପାଇଁ ଚୋରା ବନ୍ଧୁକ କିଣିବାକୁ ମନ ବଳାଇଥିଲା। ପରେ ବିହାରର ମୁଙ୍ଗେରରୁ ବନ୍ଧୁକ କିଣିଥିଲା। ନିଜ ସୁରକ୍ଷା ପାଇଁ କିଣିଥିବା ବନ୍ଧୁକରୁ ଚୋରା ବନ୍ଧୁକ ବ୍ୟବସାୟ କରି ଲକ୍ଷ ଲକ୍ଷ ରୋଜଗାର କରିବାର ଲୋଭ ଲାଗିଥିଲା। ଚତୁର କାଳିଆ ଯେଭଳି ପୁଲିସର ଧରାପଡ଼ିବ ନାହିଁ ସେଥିପାଇଁ କିଛି ଏଜେଣ୍ଟ ମଧ୍ୟ ରଖିଥିଲା। ପରେ ବିଭିନ୍ନ ସମୟରେ ଚୋରା ବନ୍ଧୁକ ଆଣି ରାଜଧାନୀର ଅପରାଧୀଙ୍କୁ ଚଢ଼ାଦରରେ ବିକ୍ରି କରୁଥିଲା। ଏହି ଚୋରା କାରବାର ପଛରେ ଅନ୍ୟ କେଉଁମାନେ ସମ୍ପୃକ୍ତ ତାକୁ ଧରିବାକୁ କାଳିଆକୁ ରିମାଣ୍ଡରେ ଅଣାଯିବ ବୋଲି ଜଣେ ଅଧିକାରୀ କହିଛନ୍ତି।
Comments