ବିକାଶର ଚମକରେ ହଜୁଛି ଶୈଶବ
ଭୁବନେଶ୍ୱର: ଶିଶୁଙ୍କ ହସରେ ହିଁ ଦେଶର ଭବିଷ୍ୟତ। ସେମାନଙ୍କ ଆଖିରେ ଥାଏ ଅସୁମାରି ସ୍ୱପ୍ନ ଏବଂ ମନରେ ଥାଏ ନୂଆ ଦୁନିଆ ଗଢ଼ିବାର ଆଶା। ସେମାନଙ୍କ ଭବିଷ୍ୟତକୁ ଉଜ୍ଜ୍ୱଳ କରିବା ପାଇଁ ଶିକ୍ଷା, ପୁଷ୍ଟି, ସୁରକ୍ଷା ଓ ଖେଳକୁଦର ଅଧିକାର ଉପରେ ଗୁରୁତ୍ୱ ଦେଇ ନୂତନ ଶିକ୍ଷା ନୀତିଠାରୁ ଆରମ୍ଭ କରି ମାଳମାଳ ଯୋଜନା ରହିଛି। ହେଲେ ଏହାର ସୁଫଳ ପ୍ରତ୍ୟେକ ଶିଶୁଙ୍କ ପାଖରେ କିପରି ପହଞ୍ଚୁଛି ତାହା ଆଜି ମଧ୍ୟ ପ୍ରଶ୍ନବାଚୀ ହୋଇରହିଛି। ଗୋଟିଏ ପଟେ ରାଜ୍ୟ ତଥା ରାଜଧାନୀ ବିକଶିତ ହେଉଥିବା ବେଳେ ଅନ୍ୟପଟେ ଶିଶୁଙ୍କ ପାଇଁ ସୁରକ୍ଷିତ ଖେଳିବା ସ୍ଥାନ, ପୁଷ୍ଟିକର ଖାଦ୍ୟ ଓ ଗୁଣାତ୍ମକ ଶିକ୍ଷା ଏବେ ମଧ୍ୟ ଆହ୍ୱାନ ହୋଇରହିଛି। ରାଜଧାନୀରେ ଏକାଧିକ ପାର୍କ ରହିଥିଲେ ମଧ୍ୟ ଶିଶୁଙ୍କ ପାଇଁ ସ୍ୱତନ୍ତ୍ର ଭାବେ ନିର୍ମିତ ସୁରକ୍ଷିତ ଖେଳିବା ସ୍ଥାନର ଆବଶ୍ୟକତା ରହିଛି। ଅଧିକାଂଶ ପାର୍କରେ ବୟସ୍କଙ୍କ ପାଇଁ ମର୍ଣ୍ଣିଂ ୱାକ୍, ଯୋଗ ଓ ବ୍ୟାୟାମ ବ୍ୟବସ୍ଥା ଥିବାବେଳେ ଶିଶୁଙ୍କ ପାଇଁ ସୁରକ୍ଷିତ ଖେଳ ଉପକରଣ, ଖୋଲା ପଡ଼ିଆ, ପ୍ରାକୃତିକ ଖେଳ ପରିବେଶ ଓ ଶିକ୍ଷଣୀୟ ବ୍ୟବସ୍ଥାର ଅଭାବ ରହିଛି। ସହରର ଅଧିକାଂଶ କଲୋନି ପାର୍କରେ କେବଳ ହାତଗଣତି ଖେଳନା ଉପକରଣ ରହିଛି। ରାଜଧାନୀର ବିଭିନ୍ନ ଛକ, ବଜାର ଓ ଟ୍ରାଫିକ୍ ସିଗ୍ନାଲ୍ରେ ଛୋଟ ପିଲାଙ୍କୁ ଭିକ୍ଷା ମାଗିବା, ଫୁଲ ବା ଛୋଟ ସାମଗ୍ରୀ ବିକ୍ରି କରିବାର ଦୃଶ୍ୟ ଦେଖିବାକୁ ମିଳୁଛି। ୨୦୨୩ରେ କେନ୍ଦ୍ରର ବାଲ୍ ସ୍ୱରାଜ ପୋର୍ଟାଲରେ ଓଡ଼ିଶାରେ ୩୨୦ ଜଣ ରାସ୍ତାରେ ରହୁଥିବା ଶିଶୁ ଚିହ୍ନଟ ହୋଇଥିଲେ। ସେଥିମଧ୍ୟରୁ ୧୮୮ ଜଣ ଖୋର୍ଦ୍ଧା ଜିଲ୍ଲାର ରହିଥିଲେ। ସେହିପରି ୨୦୨୩-୨୪ରେ ଏକ ବେସରକାରୀ ସଂସ୍ଥାର ତଥ୍ୟ ଅନୁସାରେ ଖୋର୍ଦ୍ଧା ରୋଡ୍ ଜଙ୍କସନ୍ ଓ ଭୁବନେଶ୍ୱର ରେଳ ଷ୍ଟେସନ୍ରୁ ସଂସ୍ଥା ପକ୍ଷରୁ ମୋଟ ୧୭୦ ଜଣ ଶିଶୁଙ୍କୁ ଉଦ୍ଧାର କରାଯାଇଥିଲା। ଏଥିମଧ୍ୟରୁ ୨୪ ଜଣ ଭୁବନେଶ୍ୱର ଅଞ୍ଚଳରୁ ଚିହ୍ନଟ ହୋଇଥିଲେ।
Comments