ଲିଙ୍ଗିପୁର ଟ୍ରାଫିକ୍ ପୋଷ୍ଟ ନିକଟରେ ବାଇକ୍କୁ ଧକ୍କା ଦେଲା କାର୍: ଜଣେ ବାଇକ୍ ଆରୋହୀ ମୃତ, ଆଉ ଜଣେ ଗୁରୁତର
ଭୁବନେଶ୍ବର: ବିଳମ୍ବିତ ରାତିରେ ଧଉଳି ଥାନା ଅନ୍ତର୍ଗତ ଲିଙ୍ଗିପୁର ଟ୍ରାଫିକ୍ ପୋଷ୍ଟ ନିକଟରେ ଘଟିଛି ଏକ ଛାତିଥରାଦୁର୍ଘଟଣା । ଦୁର୍ଘଟଣା ପରେ କାର୍ରେ ଥିବା ଚାଳକଙ୍କ ସମେତ ୫ ଜଣ ମଦ୍ୟପ ଯୁବକଙ୍କୁ ଥାନାକୁ ନେଇ ପଚରାଉଚରା କରୁଛି ପୁଲିସ । ସୂଚନା ଅନୁସାରେ, ଗତକାଲି ରାତି ପ୍ରାୟ ସାଢ଼େ ୧୨ଟା ବେଳେ ନିର୍ମଳ ବାରିକ ଓ ସଞ୍ଜୟ ପାତ୍ର ନାମକ ଦୁଇ ଯୁବକ ଗୋଟିଏ ବାଇକ୍ରେ ଯାଉଥିଲେ । ଏହି ସମୟରେ ସାଇ ମନ୍ଦିର ଅଭିମୁଖେ ଯାଉଥିବା ଏକ ଦ୍ରୁତଗାମୀ କାର୍ ପଛପଟୁ ତାଙ୍କ ବାଇକ୍କୁ ଜୋରଦାର ଧକ୍କା ଦେଇଥିଲା।ଧକ୍କା ଏତେ ଜୋର୍ରେ ଥିଲା ଯେ, ଉଭୟ ବାଇକ୍ ଆରୋହୀ ରାସ୍ତା ଉପରକୁ ଛିଟିକି ପଡ଼ିଥିଲେ। ଗୁରୁତର ଅବସ୍ଥାରେ ଉଭୟଙ୍କୁ ଧଉଳି ଥାନା ପୁଲିସ ଉଦ୍ଧାର କରି କ୍ୟାପିଟାଲ ହସ୍ପିଟାଲ ନେଇଥିଲା । ହେଲେ ସେଠାରେ ଚିକିତ୍ସାଧୀନ ଅବସ୍ଥାରେ ନିର୍ମଳଙ୍କ ମୃତ୍ୟୁ ହୋଇଥିଲା । ଅନ୍ୟ ଗୁରୁତର ଯୁବକ ସଞ୍ଜୟଙ୍କୁ ଅଧିକ ଚିକିତ୍ସା ପାଇଁ କଟକ ଏସ୍ସିବିକୁ ସ୍ଥାନାନ୍ତର କରାଯାଇଛି ।ମୃତ ନିର୍ମଳ ବାରିକଙ୍କ ଘର ବାଲିପାଟଣା ଥାନା ଅଞ୍ଚଳରେ ହୋଇଥିବା ବେଳେ ଆହତ ସଞ୍ଜୟ ପାତ୍ରଙ୍କ ଘର ଦେବଗଡ଼ ବୋଲି ଜଣାପଡ଼ିଛି । ଉଭୟ ମଧୁବନ ଅଞ୍ଚଳର ଏକ ସମିଲ୍ରେ କାମ କରୁଥିଲେ । ଅନ୍ୟପଟେ ଦୁର୍ଘଟଣା ଘଟାଇଥିବା କାର୍ରେ ଚାଳକଙ୍କ ସମେତ ୫ ଜଣ ଯୁବକ ଥିଲେ । ସେମାନେ ମଦ୍ୟପାନ କରିଥିବା ସୂଚନା ମିଳିଛି । ଧଉଳି ଥାନା ପୁଲିସ ସମସ୍ତଙ୍କୁ ଥାନାକୁ ନେଇ ପଚରାଉଚରା ଜାରି ରଖିଛି।
Comments