ହାଇକୋର୍ଟରେ ଆକାଶ ପାଠକଙ୍କ ଜବତ ଗାଡ଼ି ପ୍ରସଂଗ, ସାନି ମୂଲ୍ୟାୟନ ଓ ବ୍ୟାଙ୍କ ଏଫଡିଆର ଦାଖଲ ପାଇଁ ନିର୍ଦ୍ଦେଶ

ହାଇକୋର୍ଟରେ ଆକାଶ ପାଠକଙ୍କ ଜବତ ଗାଡ଼ି ପ୍ରସଂଗ, ସାନି ମୂଲ୍ୟାୟନ ଓ ବ୍ୟାଙ୍କ ଏଫଡିଆର ଦାଖଲ ପାଇଁ ନିର୍ଦ୍ଦେଶ

କଟକ: ଟାଟା ମୋଟର୍ସ ଚାକିରି କେଳେଙ୍କାରୀ ଘଟଣାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦ୍ବାରା ଆକାଶ କୁମାର ପାଠକଙ୍କ ଜବତ ଦୁଇଟି ଗାଡ଼ିର ଜିମା ହସ୍ତାନ୍ତର ପ୍ରସଂଗକୁ ନେଇ ଦାୟର ମାମଲାର ଶୁଣାଣିରେ ହାଇକୋର୍ଟପୂର୍ଣ୍ଣଚ୍ଛେଦ ପକାଛନ୍ତି। ଇଡି ଦ୍ବାରା ଜବତ ହୋଇଥିବା ଟାଟା ହରିଅର ଓ ବିଏମଡବ୍ଲୁ କାର୍‌ର ସାନି ମୂଲ୍ୟାୟନ କରାଯିବ। ଯଦି ଆବେଦନକାରୀ ଗାଡ଼ି ଦୁଇଟିକୁ ନିଜ ଜିମାରେ ରଖିବାକୁ ଚାହାଁନ୍ତି, ତେବେ ତାଙ୍କୁ ସାନି ମୂଲ୍ୟାୟନ ଅନୁସାରେ ଭୁବନେଶ୍ୱରର କୌଣସି ଜାତୀୟକରଣ ବ୍ୟାଙ୍କରେ ଇଡି ନିର୍ଦ୍ଦେଶକଙ୍କ ନାମରେ ସମ ପରିମାଣର ଫିକ୍ସଡ୍ ଡିପୋଜିଟ୍ (ଏଫଡିଆର) ଜମା କରିବାକୁ ପଡ଼ିବ ବୋଲି ହାଇକୋର୍ଟ କହିଛନ୍ତି। ଯଦି ଆବେଦନକାରୀ ଆବଶ୍ୟକ ପରିମାଣର ଏଫଡିଆର ଦାଖଲ କରିବାରେ ବିଫଳ ହୁଅନ୍ତି ତେବେ ଏହି ଦୁଇ କାର୍‌ ପ୍ରସଂଗରେ ଆଇନ ଅନୁସାରେ ପଦକ୍ଷେପ ଗ୍ରହଣ କରାଯିବ। ସାନି ମୂଲ୍ୟାୟନ ରିପୋର୍ଟ ହସ୍ତଗତ ହେବାର ୧୫ଦିନ ଭିତରେ ସ୍ୱତନ୍ତ୍ର ସିବିଆଇ କୋର୍ଟ ଉଭୟ ପକ୍ଷଙ୍କୁ ସୁଯୋଗ ଦେଇ ଏହି ମାମଲାରେ ଚୂଡ଼ାନ୍ତ ଆଦେଶନାମା ଜାରି କରିବେ। ଜଷ୍ଟିସ ଗୌରୀଶଙ୍କର ଶତପଥୀଙ୍କୁ ‌ନେଇ ଗଠିତ ଖଣ୍ଡପୀଠ ଶ୍ରୀ ପାଠକଙ୍କ ଆବେଦନର ଶୁଣାଣି କରି ଏପରି ନିର୍ଦ୍ଦେଶ ପ୍ରଦାନ କରିଛନ୍ତି।ମାମଲାର ବିବରଣୀରୁ ପ୍ରକାଶ ଯେ ଇଡି ପକ୍ଷରୁ (ପିଏମଏଲଏ) ମନି ଲଣ୍ଡରିଂ ଆଇନ ଅଧୀନରେ ଆକାଶ କୁମାର ପାଠକଙ୍କ ଏକ ଟାଟା ହାରିଅର ଓ ଏକ ବିଏମ୍‌ଡବ୍ଲୁ କାର ଜବତ କରାଯାଇଥିଲା। ଗାଡ଼ିଗୁଡ଼ିକର ଅବସ୍ଥା ଦିନକୁ ଦିନ ଖରାପ ହେଉଥିବାରୁ ଏହାକୁ ବିକ୍ରି କରିବାକୁ କିମ୍ବା ଆକାଶ ପାଠକ ୫୫ଲକ୍ଷ ୫୦ହଜାର ଟଙ୍କାର ଫିକ୍ସଡ୍ ଡିପୋଜିଟ୍ ଜମା କରି ଗାଡ଼ିର ଜିମା ନେବାକୁ ଭୁବନେଶ୍ୱର ସ୍ୱତନ୍ତ୍ର ସିବିଆଇ କୋର୍ଟ-୧ ଅନୁମତି ଦେଇଥିଲେ। ଏହି ନିର୍ଦ୍ଦେଶକୁ ଚ୍ୟାଲେଞ୍ଜ କରି ଆକାଶ ପାଠକ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ଆବେଦନକାରୀଙ୍କ ପକ୍ଷରୁ ଦର୍ଶାଯାଇଥିଲା ଯେ ଗାଡ଼ି ଦୁଇଟିର ଦେଢ ବର୍ଷରୁ ଉର୍ଦ୍ଧ୍ବ ତଳର ମୂଲ୍ୟାୟନ ରିପୋର୍ଟ ଆଧାରରେ ଏପରି ନିର୍ଦ୍ଦେଶ ପ୍ରଦାନ କରାଯାଇଥିଲା। ଏଥିସହ ନଗଦ ଟଙ୍କା ବଦଳରେ ସମ୍ପତ୍ତି ଜମା ଦେଇ ଗାଡ଼ି ଗୁଡ଼ିକର ମଧ୍ୟବର୍ତ୍ତୀକାଳୀନ ଜିମା ଦେବାକୁ ଅନୁରୋଧ କରାଯାଇଥିଲା। ଆବେଦନକାରୀଙ୍କ ତରଫରୁ ଆଇନଜୀବୀ ଡକ୍ଟର ଅଭୟକାନ୍ତ ପାଠକ ମାମଲା ପରିଚାଳନା କରୁଥିଲେ।