ପାଠ ପଢ଼ାଉଥିବା ବେଳେ ଶିକ୍ଷକଙ୍କ ଅଶ୍ଲୀଳ ଆଚରଣ ଅଭିଯୋଗ, ସ୍କୁଲ ଫାଟକ ସମ୍ମୁଖରେ ସରପଞ୍ଚଙ୍କ ସହ ଅଭିଭାବକଙ୍କ ଧାରଣା
ଘୁ.ଉଦୟଗିରି: ବିଦ୍ୟାଳୟରେ ପାଠ ପଢ଼ିବା ଛାଡ଼ି ମୋବାଇଲ୍ରେ ନିଜ ବାନ୍ଧବୀଙ୍କ ସହ ଗପୁଛନ୍ତି। ପିଲାଙ୍କ ସମ୍ମୁଖରେ ଭିଡ଼ିଓ କଲ୍ରେ ଅଶ୍ଲୀଳ କଥାବାର୍ତ୍ତା କରୁଛନ୍ତି। ଏଭଳି ଅଭିଯୋଗ କରି ଆଜି ଗ୍ରେସିଙ୍ଗିଆ ସରପଞ୍ଚ ଓ ଅଭିଭାବକମାନେ ବିଲାବାଡ଼ା ସରକାରୀ ପ୍ରାଥମିକ ବିଦ୍ୟାଳୟ ଫାଟକ ସମ୍ମୁଖରେ ଧାରଣାରେ ବସିଛନ୍ତି। ସ୍ଥାନୀୟ ସରପଞ୍ଚ ତ୍ରିଶୀଳା ପ୍ରଧାନ କହିଛନ୍ତି, ବିଦ୍ୟାଳୟର ଜଣେ ସହକାରୀ ଶିକ୍ଷକ ବିଦ୍ୟାଳୟରେ ବହୁଳ ମାତ୍ରାରେ ମୋବାଇଲ ବ୍ୟବହାର କରୁଛନ୍ତି। ବୁଧବାର ବିଦ୍ୟାଳୟ ସମୟରେ ନିଜ ବାନ୍ଧବୀମାନଙ୍କ ସହ ଅଶ୍ଳୀଳ କଥାବାର୍ତ୍ତା ହେବା ସହ ଭିଡିଓ କଲ ମାଧ୍ୟମରେ ଆଶ୍ଳୀଳତା ପ୍ରଦର୍ଶନ କରୁଥିଲେ। ଛାତ୍ରଛାତ୍ରୀମାନେ ଶ୍ରେଣୀଗୃହରେ ପାଟିତୁଣ୍ଡ କରିବାରୁ ସେମାନଙ୍କୁ ବାଡ଼େଇଥିଲେ। ସରପଞ୍ଚ ଓ ଅଭିଭାବକମାନେ ପ୍ରଧାନଶିକ୍ଷୟତ୍ରୀ ବିନିତା ନାୟକଙ୍କୁ ଅଭିଯୋଗ କରିଥିଲେ। ତୁରନ୍ତ ଉକ୍ତ ସହକାରୀ ଶିକ୍ଷକଙ୍କୁ ବଦଳି କରିବାକୁ ଦାବି କରି ସ୍କୁଲ ସମ୍ମୁଖରେ ଧାରଣାରେ ବସିଥିଲେ। ଖବର ପାଇ ଏବିଇଓ ନିବେଦିତ ପ୍ରଧାନ ଓ ସିଆରସିସି ରଶ୍ମିତା ମହାରଣା ସ୍କୁଲରେ ପହଁଞ୍ଚି ଘଟଣାର ଅନୁସନ୍ଧାନ କରିଥିଲେ। ଅଭିଭାବକ ଓ ଛାତ୍ରୀଛାତ୍ରଙ୍କ ସହ ଆଲୋଚନା କରିବା ପରେ ଅଭିଯୁକ୍ତ ସହକାରୀ ଶିକ୍ଷକଙ୍କୁ ପଚାରିଥିଲେ। ସେ ସମସ୍ତଙ୍କ ସମ୍ମୁଖରେ ନିଜ ଦୋଷ ସ୍ୱୀକାର କରିବା ନେଇ ଲିଖିତ ଭାବେ ଉପସ୍ଥିତ ଅଧିକାରୀଙ୍କୁ ଦେଇଥିଲେ। ପରେ ଏବିଇଓ ନିବେଦିତ ପ୍ରଧାନ ଅଭିଭାବକଙ୍କୁ ବୁଝାସୁଝା କରିଥିଲେ। ଶିକ୍ଷକଙ୍କୁ ବଦଳି କରି ଅନ୍ୟ ଶିକ୍ଷକଙ୍କୁ ଆଣିବାର ପ୍ରତିଶ୍ରୁତି ଦେବା ପରେ ଅଭିଭାବକ ଓ ଛାତ୍ରଛାତ୍ରୀମାନେ ଧାରଣାରୁ ଉଠିଥିଲେ।
Comments