ମିଳୁନି ଭତ୍ତା, ହନ୍ତସନ୍ତ ବୃଦ୍ଧବୃଦ୍ଧା, ଦିବ୍ୟାଙ୍ଗ
ଭୁବନେଶ୍ବର: ଭୁବନେଶ୍ବର ୟୁନିଟ୍-୬ ଅଞ୍ଚଳର ବଳରାମ ସାହୁ(୩୫)। ଶତ ପ୍ରତିଶତ ଦିବ୍ୟାଙ୍ଗ। ବହୁଚର୍ଚ୍ଚିତ ଗାନ୍ଧୀ ମାର୍ଗ ବେଲୁନ୍ ଗ୍ୟାସ ବିସ୍ଫୋରଣରେ ଦୁଇ ଆଖି ହରାଇଛନ୍ତି। ଅଷ୍ଟମରେ ପାଠ ପଢ଼ୁଥିବା ବେଳେ ବଳରାମ ୨୦୦୨ ମସିହାରେ ଗାନ୍ଧୀ ମାର୍ଗରେ ସାଙ୍ଗମାନଙ୍କ ସହ ପରେଡ୍ ଦେଖୁଥିଲେ। ହଠାତ୍ ବେଲୁନ୍ ଗ୍ୟାସ୍ର ଏହି ଭୟଙ୍କର ବିସ୍ଫୋରଣ ତାଙ୍କ ଦୁଇ ଆଖିକୁ ନଷ୍ଟ କରି ଦେଇଥିଲା। ଏହି ଅଘଟଣର ଦୁଇ ଆଖି ହରାଇଥିବା ୯ଜଣଙ୍କ ଭିତରୁ ବଳରାମ ଅନ୍ୟତମ। ଏହି ଅଘଟଣ ତାଙ୍କ ଜୀବନକୁ ଅନ୍ଧକାର କରିଦେଇଛି। କାମଧନ୍ଦା କରି ପାରୁନାହାନ୍ତି। ଭତ୍ତା ଟଙ୍କା ତାଙ୍କ ପାଇଁ ସର୍ବସ୍ବ ପାଲଟିଛି। କିନ୍ତୁ ଏପ୍ରିଲରୁ ସେ ଭତ୍ତା ନିୟମିତ ପାଉନାହାନ୍ତି। ଅଭିଯୋଗ ପରେ ମଝିରେ ଦୁଇ ମାସର ଭତ୍ତା ଦେଲେ। ଏବେ ପୁଣି ଅଗଷ୍ଟରୁ ଭତ୍ତା ବନ୍ଦ। ନିୟମିତ ବିଏମ୍ସି କାର୍ଯ୍ୟାଳୟକୁ ଦୌଡ଼ି ଦୌଡ଼ି ଥକି ଗଲେଣି। କିନ୍ତୁ ନାନା ଆଳ ଦେଖାଇ ତାଙ୍କୁ ଭଣ୍ଡାଯାଉଛି। ୨୦୦୨ରୁ ଆଜି ପର୍ଯ୍ୟନ୍ତ ଏଭଳି କେବେ ବି ହୋଇନଥିଲା ବୋଲି ବଳରାମ କହିଛନ୍ତି। ଅଫ୍ଲାଇନ୍ ଅପେକ୍ଷା ଅନ୍ଲାଇନ୍ ହିତାଧିକାରୀ ଏଭଳି ଅଧିକ ହଇରାଣ ହେଉଛନ୍ତି ବୋଲି ସେ କହିଛନ୍ତି। ୪୦ ନମ୍ବର ୱାର୍ଡର ବେଣୁଧର ଭୋଳ। ବୟସ ୮୦ ଡେଇଁଲାଣି। ୩୫ଶହ ଟଙ୍କା ବାର୍ଦ୍ଧକ୍ୟ ଭତ୍ତା (ଭତ୍ତା ଖାତା ସଂଖ୍ୟା-ଓଆରଏସ୍-୦୮୨୪୩୪୩୨) ପାଉଥିଲେ। କିନ୍ତୁ ୫ ମାସ ହେଲାଣି ସେ ବାର୍ଦ୍ଧକ୍ୟ ଭତ୍ତା ପାଇନାହାନ୍ତି। ତାଙ୍କର ୧୭୫୦୦ ଟଙ୍କା ଭତ୍ତା ବାକି ପଡ଼ିଲାଣି। ବ୍ୟାଙ୍କ ଅସୁବିଧା ଆଳ ଦେଖାଇ ଟଙ୍କା ଦିଆଯାଉନି। ୫୫ ନମ୍ବର ୱାର୍ଡର ପ୍ରକାଶ କୁମାର ବେହେରା ୮୦ ପ୍ରତିଶତ ଭିନ୍ନକ୍ଷମ।ସେ ୩୫ଶହ ଟଙ୍କା ଭତ୍ତା(ଓଆରଏସ୍-୧୦୯୨୬୧୨୮) ପାଉଥିଲେ। ସେପ୍ଟେମ୍ବରରୁ ସେ ଭତ୍ତା ପାଇନାହାନ୍ତି। ୯ ନମ୍ବର ୱାର୍ଡର ଚତୁର୍ଭୁଜ ଭୋଳଙ୍କ(ଓଆର୍ଏସ୍-୦୮୨୬୫୮୧୧)ର ବି ସମାନ ସ୍ଥିତି। କେଉଁ ଗ୍ରାମାଞ୍ଚଳ କି ଉପାନ୍ତ ଅଞ୍ଚଳ ନୁହେଁ, ରାଜଧାନୀ ଭୁବନେଶ୍ବରରେ ଏଭଳି ଚିତ୍ର ସରକାରୀ ବ୍ୟବସ୍ଥାକୁ ଉପହାସ କରୁଛି। ଭାତ ହାଣ୍ଡିରୁ ଗୋଟିଏ ଭଳି ସାରା ରାଜ୍ୟର ଏ ହେଉଛି ବୃଦ୍ଧବୃଦ୍ଧା, ଦିବ୍ୟାଙ୍ଗ, ବିଧବା ଆଦିଙ୍କ ଭତ୍ତା ବ୍ୟବସ୍ଥାର ବିକଳ ଚିତ୍ର। କିଏ ଔଷଧ ପାଇଁ ତ’ କିଏ ଅନ୍ୟାନ୍ୟ ଆବଶ୍ୟକତା ପୂରଣରେ ଏହି ଟଙ୍କା ଖର୍ଚ୍ଚ କରୁଥିଲେ। ଏହି ଟଙ୍କା ବନ୍ଦ ପରେ ଏମାନଙ୍କ ଜୀବନ ଦୁର୍ବିଷହ ହୋଇପଡ଼ିଛି। ତଥାପି ନା ରାଜନେତାଙ୍କ ନିଦ ଭାଙ୍ଗୁଛି ନା ସରକାରୀ ବଡ଼ ବାବୁମାନଙ୍କର। କେତେବେଳେ ଆଧାର ତ’ କେତେବେଳେ ବ୍ୟାଙ୍କ ଆଳ ଦେଖାଇ ଏମାନଙ୍କୁ ଭତ୍ତାରୁ ବଞ୍ଚିତ କରାଯାଉଛି। କିନ୍ତୁ କେହି ତୃଣମୂଳସ୍ତରରୁ ଏହାର ପ୍ରକୃତ କାରଣ ଖୋଜିବାକୁ ଚେଷ୍ଟା କରୁନାହାନ୍ତି।ଭୁବନେଶ୍ବର ମହାନଗର ନିଗମରେ ପ୍ରାୟ ୨୮ହଜାର ଭତ୍ତା ହିତାଧିକାରୀ। ଏଥିରୁ ମଧୁବାବୁ ପେନ୍ସନ୍ ଯୋଜନାରେ ୨୧, ୭୮୮ଜଣ, ଜାତୀୟ ପେନ୍ସନ୍ ଯୋଜନାରେ ୫୫୧୫ଜଣ ଭତ୍ତା ପାଉଛନ୍ତି। ଆବେଦନ କରି ଅପେକ୍ଷାରେ ଥିବା ୫୩୨୪ଜଣଙ୍କୁ ନିକଟରେ ନୂଆ ଭତ୍ତା ତାଲିକାରେ ଯୋଡ଼ାଯାଇଛି। ନୂଆ ତ ଭତ୍ତା ପାଇନାହାନ୍ତି, କିନ୍ତୁ ଭୁବନେଶ୍ବର ହଜାର ହଜାର ପୁରୁଣା ହିତାଧିକାରୀଙ୍କୁ ମାସ ମାସ ଧରି ଭତ୍ତା ଟଙ୍କା ମିଳିନି। କେଉଁଠି ବ୍ୟାଙ୍କ ସହ ଆଧାର ସଂଯୋଗ(ଏନ୍ପିସିଆଇ ମ୍ୟାପିଂ) ହୋଇନଥିବା କୁହାଯାଉଛି ତ କେଉଁଠି ଆଧାର କାର୍ଡରେ ତ୍ରୁଟି ପୁଣି କେଉଁଠି ଆକାଉଣ୍ଟରେ ତ୍ରୁଟି ରହିଥିବା ଦର୍ଶାଯାଉଛି। ସେପଟେ ଜୋନ୍ ତଥା ୱାର୍ଡସ୍ତରରେ ଥିବା କର୍ମଚାରୀଙ୍କ ଅସହଯୋଗ ଓ ମାନବସମ୍ବଳର ଅଭାବ ଏଭଳି ସମସ୍ୟାକୁ ଜଟିଳ କରିବାରେ ଲାଗିଛି। ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଦିଲୀପ କୁମାର ହିଆଲ ବି ଏଭଳି ଅସୁବିଧାକୁ ସ୍ବୀକାର କରିଛନ୍ତି। ଶ୍ରୀ ହିଆଲ କହିଛନ୍ତି, ଆମେ ଡିବିଟି ଜରିଆରେ ଭତ୍ତା ଟଙ୍କା ଦେଉଛୁ। କିନ୍ତୁ ବ୍ୟାଙ୍କରେ ସମସ୍ୟା ଥିବାରୁ ଏହି ଟଙ୍କା ହିତାଧିକାରୀଙ୍କ ଆକାଉଣ୍ଟ୍କୁ ଯାଇପାରୁନାହିଁ ବୋଲି ଶ୍ରୀ ହିଆଲ କହିଛନ୍ତି।ବାଲିଅନ୍ତା ବଜାର: ପ୍ରଶାସନିକ ଅବ୍ୟବସ୍ଥା କାରଣରୁ ବାଲିଅନ୍ତା ବ୍ଲକ୍ ଅନ୍ତର୍ଗତ ବଇଁଚୁଆ ପଞ୍ଚାୟତ ପାଟୁପଡ଼ା ଗ୍ରାମର ୨୧ ବର୍ଷିୟା ଜଣେ ଭିନ୍ନକ୍ଷମ ଯୁବତୀ ବିପାଶା ବେଦାନ୍ତ ଆଠ ମାସ ହେଲା ରାସନ ପାଇବାରୁ ବଞ୍ଚିତ ହୋଇଛନ୍ତି। ରାସନ ପାଇବା ପାଇଁ ଆବଶ୍ୟକ ଇ-କେୱାଇସି କରାଇବା ନିମନ୍ତେ ପରିବାର ଲୋକେ କେତେବେଳେ ବ୍ଲକ୍ କାର୍ଯ୍ୟାଳୟ ତ ଆଉ କେତେବେଳେ ପଞ୍ଚାୟତ କାର୍ଯ୍ୟାଳୟକୁ ଦୌଡ଼ୁଛନ୍ତି। ହେଲେ ଏହି ସମସ୍ୟାର ସମାଧାନ ହୋଇପାରୁନାହିଁ। ଯୁବତୀଙ୍କ ପରିବାର ଲୋକେ ନିରାଶ ହୋଇପଡ଼ିଛନ୍ତି। ବାଲିଅନ୍ତା ବ୍ଲକ୍ ପ୍ରଶାସନ ତୁରନ୍ତ ହସ୍ତକ୍ଷେପ କରି ବିପାଶାଙ୍କ ଇ-କେୱାଇସି ସମସ୍ୟାର ସମାଧାନ କରିବା ସହ ତାଙ୍କୁ ନିୟମିତ ରାସନ ଯୋଗାଇଦେବାକୁ ପରିବାର ପକ୍ଷରୁ ଦାବି ହୋଇଛି।
Comments