ଟାଟାନଗର–ଏର୍ଣ୍ଣାକୁଲମ୍ ଏକ୍ସପ୍ରେସ୍ର ଏ-୨ କୋଚ୍ରେ ଅଗ୍ନିକାଣ୍ଡ: ଧୂଆଁ ଓ ନିଆଁ ଦେଖି ଯାତ୍ରୀଙ୍କ ମଧ୍ୟରେ ଆତଙ୍କ; ୨୫ ମିନିଟ୍ ଅଟକି ରହିଲା ଟ୍ରେନ୍
ସୁନ୍ଦରଗଡ଼,ବନ୍ଧମୁଣ୍ଡା : ଚକ୍ରଧରପୁର ରେଳ ମଣ୍ଡଳ ଅନ୍ତର୍ଗତ ଧୁତରାରେଳ ଷ୍ଟେସନ ନିକଟରେ ଆଜି ରବିବାର ଟାଟାନଗର–ଏର୍ଣ୍ଣାକୁଲମ୍ ଏକ୍ସପ୍ରେସ୍ (ଟ୍ରେନ୍ ନମ୍ବର ୧୮୧୮୯)ର ଏ-୨ କୋଚ୍ରେ ନିଆଁ ଲାଗିବା ଘଟଣାକୁ ନେଇ ଯାତ୍ରୀଙ୍କ ମଧ୍ୟରେ ତୀବ୍ର ଆତଙ୍କ ଦେଖାଦେଇଥିଲା। ସୂଚନା ଅନୁଯାୟୀ, ରବିବାର ଦିନ ପ୍ରାୟ ୧୧ଟା ସମୟରେ ଟ୍ରେନ୍ର ଏ-୨ କୋଚ୍ରୁ ପ୍ରଥମେ ଧୂଆଁ ବାହାରିବା ଆରମ୍ଭ ହୋଇଥିଲା। କିଛି ସମୟ ମଧ୍ୟରେ କୋଚ୍ରୁ ନିଆଁର ଶିଖା ଦେଖାଯିବାରୁ ତୁରନ୍ତ ଟ୍ରେନ୍କୁ ଅଟକାଇ ଦିଆଯାଇଥିଲା।ଚଳନ୍ତା ଟ୍ରେନ୍ର କୋଚ୍ରୁ ହଠାତ୍ ଧୂଆଁ ଓ ନିଆଁ ବାହାରୁଥିବା ଦେଖି ଯାତ୍ରୀମାନେ ଭୟଭୀତ ହୋଇପଡ଼ିଥିଲେ। ନିଜ ଜୀବନର ସୁରକ୍ଷାକୁ ଦୃଷ୍ଟିରେ ରଖି ଅନେକ ଯାତ୍ରୀ ତରବରିଆ ଭାବେ କୋଚ୍ରୁ ଓହ୍ଲାଇ ପଡ଼ିଥିଲେ। ଏହି ସମୟରେ ଘଟଣାସ୍ଥଳରେ ଉପସ୍ଥିତ ରେଳ କର୍ମଚାରୀମାନେ ତୁରନ୍ତ ସକ୍ରିୟ ହୋଇ ଅଗ୍ନିଶମ ଯନ୍ତ୍ର ସାହାଯ୍ୟରେ ନିଆଁ ଲିଭାଇବା ଆରମ୍ଭ କରିଥିଲେ। ସେମାନଙ୍କ ତ୍ୱରିତ ପଦକ୍ଷେପ ଯୋଗୁଁ ନିଆଁକୁ ଆୟତ୍ତ କରାଯାଇଥିଲା।ଏହି ଘଟଣା ଯୋଗୁଁ ଟାଟାନଗର–ଏର୍ଣ୍ଣାକୁଲମ୍ ଏକ୍ସପ୍ରେସ୍ ଧୁତରା ଷ୍ଟେସନ ନିକଟରେ ପ୍ରାୟ ୨୫ ମିନିଟ୍ ଧରି ଅଟକି ରହିଥିଲା। ନିଆଁ ସମ୍ପୂର୍ଣ୍ଣ ଆୟତ୍ତ ହେବା ସହ ପରିସ୍ଥିତି ସ୍ୱାଭାବିକ ହେବା ପରେ ଟ୍ରେନ୍ଟିକୁ ପୁନର୍ବାର ଝାରସୁଗୁଡ଼ା ଅଭିମୁଖେ ଛାଡ଼ି ଦିଆଯାଇଥିଲା।ଚଳନ୍ତା ଟ୍ରେନ୍ର କୋଚ୍ରେ ଏଭଳି ଅଗ୍ନିକାଣ୍ଡ ଘଟଣା ଯାତ୍ରୀଙ୍କ ମନରେ ଭୟ ଓ ଆତଙ୍କ ସୃଷ୍ଟି କରିଥିଲା। ତେବେ ରେଳ କର୍ମଚାରୀଙ୍କ ସମୟୋଚିତ ପଦକ୍ଷେପ ଯୋଗୁଁ ନିଆଁକୁ ଶୀଘ୍ର ଆୟତ୍ତ କରାଯାଇପାରିଥିଲା ଏବଂ ଏକ ବଡ଼ ଅଘଟଣ ଟଳିଯାଇଥିଲା। ତେବେ କୋଚ୍ରେ ନିଆଁ ଲାଗିବାର ପ୍ରକୃତ କାରଣ ସମ୍ପର୍କରେ ଏଯାବତ୍ କୌଣସି ସ୍ପଷ୍ଟ ସୂଚନା ମିଳିନାହିଁ।
Comments