Skip to content
Tuesday, 17 November 2026
Breaking News
Video
Programme

ରାଜଧାନୀ ହେବ ଅପରାଧମୁକ୍ତ: ଲାଗିବ ୩୪୦୦ ଏଆଇ କ୍ୟାମେରା

ରାଜଧାନୀ ହେବ ଅପରାଧମୁକ୍ତ: ଲାଗିବ ୩୪୦୦ ଏଆଇ କ୍ୟାମେରା

ରାଜଧାନୀ ହେବ ଅପରାଧମୁକ୍ତ: ଲାଗିବ ୩୪୦୦ ଏଆଇ କ୍ୟାମେରା

Key Points

  • ଭୁବନେଶ୍ୱର: ରାଜଧାନୀ ପାଇଁ ତିଆରି ହେବ ମେଗା ସୁରକ୍ଷା କରିଡର।
  • ଅପରାଧରେ ପୁରୁଣା ରେକର୍ଡ ଥିବା ଅବା କୌଣସି ୱାରେଣ୍ଟି ରାଜଧାନୀରେ ପ୍ରବେଶ କରିବା ମାତ୍ରେ ଥାନାମାନଙ୍କୁ ମିଳିବ ସୂଚନା।
  • ସଂପୃକ୍ତ ଅପରାଧୀ କେଉଁଆଡ଼େ ଯାଉଛନ୍ତି, ତାର ସଂପୂର୍ଣ୍ଣ ଗତିବିଧି ବି ଜାଣିହେବ।

ରାଜଧାନୀ ହେବ ଅପରାଧମୁକ୍ତ: ଲାଗିବ ୩୪୦୦ ଏଆଇ କ୍ୟାମେରା

 

ଭୁବନେଶ୍ୱର: ରାଜଧାନୀ ପାଇଁ ତିଆରି ହେବ ମେଗା ସୁରକ୍ଷା କରିଡର। ଭୁବନେଶ୍ବର ହେବ ଅପରାଧ ଓ ଅଘଟଣମୁକ୍ତ। ଅପରାଧରେ ପୁରୁଣା ରେକର୍ଡ ଥିବା ଅବା କୌଣସି ୱାରେଣ୍ଟି ରାଜଧାନୀରେ ପ୍ରବେଶ କରିବା ମାତ୍ରେ ଥାନାମାନଙ୍କୁ ମିଳିବ ସୂଚନା। ସଂପୃକ୍ତ ଅପରାଧୀ କେଉଁଆଡ଼େ ଯାଉଛନ୍ତି, ତାର ସଂପୂର୍ଣ୍ଣ ଗତିବିଧି ବି ଜାଣିହେବ। ଛିନ୍‌ତାଇଙ୍କୁ ଧରିବା ଆହୁରି ସହଜ ହେବ। ସେପଟେ କେଉଁଠି ନିଆଁ ଲାଗିଲା, କେଉଁ ଅଞ୍ଚଳରେ ଭିଡ଼ ବଢ଼ିଲା ଅବା ଦୁର୍ଘଟଣା ଘଟିଲା, କେଉଁଠି ବାୟୁ ପ୍ରଦୂଷଣ ବଢ଼ୁଛି କି କେହି ଦ୍ରୁତଗତିରେ ଗାଡ଼ି ଚଳାଇ ଯାଉଛନ୍ତି, ସବୁକିଛିର ଟିକିନିଖି ବିବରଣୀ ଜାଣିହେବ। ରାଜ୍ୟରେ ପ୍ରଥମ କରି ଏଭଳି ସମନ୍ବିତ ପ୍ରକଳ୍ପ ରାଜଧାନୀ ଭୁବନେଶ୍ବରରେ କରିବାକୁ ଯାଉଛନ୍ତି ରାଜ୍ୟ ସରକାର।ସରକାର ଏଥିପାଇଁ ଉଚ୍ଚକ୍ଷମତାସଂପନ୍ନ ଏଆଇ (ଆଣ୍ଟିଫିସିଆଲ୍‌ ଇଣ୍ଟେଲିଜେନ୍ସ)ର ବ୍ୟବହାର କରିବାକୁ ଯାଉଛନ୍ତି। ପ୍ରାୟ ୪୦୦ କୋଟି ଟଙ୍କାର ମେଗା ଯୋଜନା ପ୍ରସ୍ତୁତ କରାଯାଇଛି। ସହରରେ ୮୫୦ଟି ପ୍ରମୁଖ ସ୍ଥାନରେ ଏଥିପାଇଁ ୩୪୦୦ଟି ଏଆଇ କ୍ୟାମେରା ଲାଗିବ। ଏହି କ୍ୟାମେରା ଏତେ ଉଚ୍ଚକ୍ଷମତା ସଂପନ୍ନ ଯେ ମହିଳା, ପୁରୁଷ, ରଙ୍ଗ ସବୁକୁ ସହଜରେ ଠଉରେଇ ନେବ। ପୂର୍ବରୁ ପ୍ରତି ୧ହଜାର ଜନସଂଖ୍ୟାରେ ୭୫ଟି ସାଧାରଣ କ୍ୟାମେରା ଲଗାଇବାକୁ ପଡ଼ୁଥିଲା। କିନ୍ତୁ ଏହି ଏଆଇ କ୍ୟାମେରା ଏକକାଳୀନ ୨୦୦୦ରୁ ଅଧିକ ଲୋକଙ୍କ ଉପରେ ନଜର ରଖିପାରିବ। ବିଶେଷ କରି ମହିଳା ସୁରକ୍ଷା ପାଇଁ ଏହି ଏଆଇ କ୍ୟାମେରାକୁ ଅଧିକ ବୈଷୟିକ ଜ୍ଞାନସଂପନ୍ନ କରାଯାଇଛି। ଭୁବନେଶ୍ବର ମହାନଗର ନିମମ ମୁଖ୍ୟାଳୟରେ ଚାଲିଥିବା ଆଇସିସିସି(ଇଣ୍ଟିଗ୍ରେଟେଡ୍‌ କମାଣ୍ଡ କଣ୍ଟ୍ରୋଲ ସେଣ୍ଟର) ଏହାର ମୁଖ୍ୟ ନିୟନ୍ତ୍ରଣ କକ୍ଷ ହେବ। ଲାଗିବାକୁ ଥିବା ଏଆଇ କ୍ୟାମେରାରେ ଫେସ୍‌ ରେକଗ୍‌ନିସନ୍‌ ବ୍ୟବସ୍ଥା(ଏଫ୍‌ଆର୍‌ଏସ୍‌) ରହିବ। ଅପରାଧୀଙ୍କୁ ଧରିବା ପାଇଁ ଜାତୀୟ କ୍ରାଇମ୍‌ ରେକର୍ଡ ବ୍ୟୁରୋ ଓ ରାଜ୍ୟ କ୍ରାଇମ୍‌ ରେକର୍ଡ ବ୍ୟୁରୋର ତଥ୍ୟକୁ ଏହା ସହ ସଂଲଗ୍ନ କରାଯିବ। ସ୍ବୟଂଚାଳିତ ଭାବେ ଥାନାକୁ ପପ୍‌ଅପ୍‌ ନୋଟିସ୍‌ ମିଳିଯିବ। କେଉଁଠି ଧୂଆଁ ଉଠିଲେ, ଆଗୁଆ ଜଣାଇଦେବ। ୫୦ରୁ ୬୦ ମିମି ବର୍ଷା ହେଲା ମାତ୍ରେ ଏହା ପୂର୍ବସୂଚନା ଦେବ। କେଉଁ ଅଞ୍ଚଳରେ ବନ୍ୟା ସମ୍ଭାବନା ରହିଛି, ତାର ବି ପୂର୍ବସୂଚନା ଦେବ। ଅଳିଆ ପଡ଼ିଥିବା ସ୍ଥାନର ସୂଚନା ବିଏମ୍‌ସିକୁ ଜଣାଇଦେବ। କେଉଁ ରାସ୍ତାରେ ଅଧିକ ବୁଲାକୁକୁର, ବୁଲା ଗାଈଗୋରୁ ରହିଛନ୍ତି, ତାର ବି ସୂଚନା ଦେବ। ଏଭଳି ଅନେକ ବ୍ୟବସ୍ଥା ଏହାସହ ଯୋଡ଼ାଯାଇଛି। ଆଇଆଇଟି, ଆଇଆଇଆଇଟିର ପ୍ରଫେସର, ଓକାକ୍‌ ଭଳି ସଂସ୍ଥାମାନେ ଏଥିପାଇଁ ବୈଷୟିକ ଜ୍ଞାନ ଦେଇଛନ୍ତି।ଏ ଉପରେ ମୁଖ୍ୟମନ୍ତ୍ରୀ ବି ବୈଠକ କରିଛନ୍ତି। ମୁଖ୍ୟମନ୍ତ୍ରୀଙ୍କ ମୁଖ୍ୟ ପରାମର୍ଶଦାତା ଅବସରପ୍ରାପ୍ତ ପୁଲିସ ଡିଜି ପ୍ରକାଶ ମିଶ୍ରଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ପ୍ରକଳ୍ପ ପୂର୍ଣ୍ଣରୂପ ନେବାକୁ ଯାଉଛି। ଏ ଭିତରେ ଶ୍ରୀ ମିଶ୍ର ବି ଦୁଇଥର ବୈଠକ କରି ପ୍ରକଳ୍ପର ଅଗ୍ରଗତି ନେଇ ସମୀକ୍ଷା କରିଛନ୍ତି। ପ୍ରକଳ୍ପର ଅଗ୍ରଗତି ସହ କାର୍ଯ୍ୟ ତଦାରଖ ପାଇଁ ଭୁବନେଶ୍ବର ସ୍ମାର୍ଟ ସିଟି ଲିମିଟେଡ୍‌ର ପରିଚାଳନା ନିର୍ଦ୍ଦେଶକ ଚଞ୍ଚଳ ରାଣାଙ୍କ ନେତୃତ୍ବରେ ଏକ ଉଚ୍ଚସ୍ତରୀୟ କମିଟି ଗଠନ କରାଯାଇଛି। ଭୁବନେଶ୍ବର-କଟକ ପୁଲିସ କମିସନର ପରାମର୍ଶକ୍ରମେ ଏଆଇ କ୍ୟାମେରା ଲଗାଇବାକୁ ୮୫୦ଟି ସ୍ଥାନ ଚୟନ କରାଯାଇଛି। ଭୁବନେଶ୍ବର ସ୍ମାର୍ଟ ସିଟି ଲିମିଟେଡ୍‌ ଏହି ପ୍ରକଳ୍ପ କାମ କରିବ। ଏଥିପାଇଁ ଗତ ୯ ତାରିଖରେ ଟେଣ୍ଡର ଆହ୍ବାନ କରାଯାଇଛି। ଟେଣ୍ଡର ଚୂଡ଼ାନ୍ତ ଓ କାର୍ଯ୍ୟାଦେଶ ମିଳିବାର ୧୨ ମାସ ଭିତରେ ପ୍ରକଳ୍ପ କାମ ସରିବ। ଏହା ପରେ ସଂପୃକ୍ତ ସଂସ୍ଥା ୫ ବର୍ଷ ପାଇଁ ଏହାର ପରିଚାଳନା ଦାୟିତ୍ବ ମୁଣ୍ଡାଇବ। ଯେଉଁ ଠିକାସଂସ୍ଥାର ବାର୍ଷିକ ଆୟବ୍ୟୟ ୬୦୦ କୋଟିରୁ ଅଧିକ, ଆଗରୁ ୨୫ଶହରୁ ଅଧିକ ଆଇପି କ୍ୟାମେରା ଲଗାଇ ସାରିଛନ୍ତି ଓ ଏଭଳି ପ୍ରକଳ୍ପ କରିବାରେ ୭ ବର୍ଷର ଅଭିଜ୍ଞତା ରହିଛି, ସେହିମାନଙ୍କୁ ହିଁ ଏହି ଟେଣ୍ଡରରେ ଅଂଶଗ୍ରହଣର ସୁଯୋଗ ଦିଆଯାଇଛି।

What's Your Reaction?

like

dislike

love

funny

angry

sad

wow

BIDYADHAR BARIK MADHU
Written by

BIDYADHAR BARIK MADHU

FOUNDER OMMTV MEDIA PVT. LTD. & KALINGA CINE ARTS FOUNDATION

Related Posts

Comments