ବକୁଳ ଫାଉଣ୍ଡେସନ ପକ୍ଷରୁ ହ୍ୟୁମାନ୍ ଲାଇବ୍ରେରି: ଅନୁଭୂତିସଂପନ୍ନ ମଣିଷ ହିଁ ଜୀବନ୍ତ ପୁସ୍ତକ
ଭୁବନେଶ୍ୱର: ଅନୁଭୂତିସଂପନ୍ନ ମଣିଷ ହିଁ ଗୋଟିଏ ଜୀବନ୍ତ ପୁସ୍ତକ। ତାଙ୍କ ଜୀବନର ଅନୁଭୂତି, ସଂଘର୍ଷ, ସଫଳତା ଓ ଚିନ୍ତାଧାରାକୁ ଅତି ନିକଟରୁ ଜାଣିବା ପାଇଁ ‘ହ୍ୟୁମାନ ଲାଇବ୍ରେରି’ ହିଁ ନିଆରା ସୁଯୋଗ ଦେଇଥାଏ। ବକୁଳ ଫାଉଣ୍ଡେସନ ପକ୍ଷରୁ ଆଜି ଅପରାହ୍ଣରେ ସତ୍ୟନଗରସ୍ଥିତ କାଫେ-୧୬ରେ ଏହି ଅଭିନବ କାର୍ଯ୍ୟକ୍ରମ ଆୟୋଜିତ ହୋଇଥିଲା। ସୁଜିତ ମହାପାତ୍ରଙ୍କ ସଂଯୋଜନାରେ ଆୟୋଜିତ ଏହି କାର୍ଯ୍ୟକ୍ରମରେ ବିଭିନ୍ନ କ୍ଷେତ୍ରର ପ୍ରତିଷ୍ଠିତ ବ୍ୟକ୍ତିବିଶେଷ ଜୀବନ୍ତ ପୁସ୍ତକ ଭାବେ ଯୋଗ ଦେଇଥିଲେ। ପାଠକମାନେ ସେମାନଙ୍କ ସହ ସିଧାସଳଖ ଆଲୋଚନା କରି ଜୀବନର ଅନୁଭୂତି, ସଂଘର୍ଷ ଓ ଅନେକ ଅଜଣା କାହାଣୀ ସମ୍ପର୍କରେ ଜାଣିବାର ସୁଯୋଗ ପାଇଥିଲେ।କାର୍ଯ୍ୟକ୍ରମରେ ବାରବାଟୀ-କଟକ ବିଧାୟିକା ସୋଫିଆ ଫିର୍ଦ୍ଦୋସ, ‘ସମ୍ବାଦ’ ଓ ‘କନକ ନ୍ୟୁଜ୍’ର ସମ୍ପାଦିକା ତନୟା ପଟ୍ଟନାୟକ, ଫ୍ୟାସନ୍ ଡିଜାଇନର୍ ସବ୍ୟସାଚୀ ଶତପଥୀ, ମନସ୍ତତ୍ତ୍ୱବିତ୍ ଡା. ଅମୃତ ପଟ୍ଟଯୋଶୀ, ସେଫ୍ ରଚିତ କୀର୍ତ୍ତିମାନ, ସଙ୍ଗୀତଜ୍ଞ ସୌମ୍ୟ ବିଶ୍ୱଜିତ୍, ହାସ୍ୟ ଅଭିନେତା ରିତେନ୍ ପଟ୍ଟନାୟକ, ଡା. ଆଭା ମିଶ୍ର, ସାମାଜିକ କର୍ମୀ ସିଦ୍ଧାର୍ଥ କର ଓ ଆଇନଜୀବୀ ଦୀପ୍ଶା ଧଳ ପ୍ରମୁଖ ଯୋଗ ଦେଇଥିଲେ। ଏହି ଅବସରରେ ‘ସମ୍ବାଦ’ ଓ ‘କନକ ନ୍ୟୁଜ୍’ର ସମ୍ପାଦିକା ଶ୍ରୀମତୀ ପଟ୍ଟନାୟକ ଏହାକୁ ଏକ ଭିନ୍ନ ଧରଣର କାର୍ଯ୍ୟକ୍ରମ ବୋଲି ଅଭିହିତ କରିବା ସହ ଏଭଳି ଉଦ୍ୟମ ବିଭିନ୍ନ କାର୍ଯ୍ୟାଳୟ ଓ ଅନୁଷ୍ଠାନରେ ମଧ୍ୟ ଆୟୋଜନ କରାଯିବା ଆବଶ୍ୟକ ବୋଲି କହିଥିଲେ। ସେହିପରି ବିଧାୟିକା ସୋଫିଆ ଫିର୍ଦ୍ଦୋସ କହିଥିଲେ ଯେ ବିଭିନ୍ନ ବର୍ଗର ବ୍ୟକ୍ତିବିଶେଷଙ୍କ ସହ ନିଜ ଜୀବନ ଓ ଅନୁଭୂତି ବାବଦରେ ଆଲୋଚନା କରିବାର ଏକ ଭିନ୍ନ ସୁଯୋଗ ମିଳିଲା। ଏହାଦ୍ୱାରା ନୂଆ ନୂଆ ଦୃଷ୍ଟିକୋଣକୁ ଜାଣିବାର ସୁଯୋଗ ମିଳିଲା।









Comments