ମଉଜ ପାଇଁ... ବିଗିଡ଼ିଗଲା ଭୁବନେଶ୍ବର ବାୟୁ

ଭୁବନେଶ୍ବର: ଦୀପାବଳି ପରେ ଭୁବନେଶ୍ବରର ବାୟୁମଣ୍ଡଳ ବିଗିଡ଼ି ଯାଇଛି। କେଉଁଠି ପିଏମ୍‌୧୦(୧୦ ମାଇକ୍ରୋମିଟର କିମ୍ବା ତା’ଠାରୁ କମ୍ ବ୍ୟାସ ବିଶିଷ୍ଟ କଣିକା ପଦାର୍ଥ, ଯାହାକି ନିଶ୍ୱାସ ନେବା ଏବଂ ସ୍ୱାସ୍ଥ୍ୟ ପାଇଁ କ୍ଷତିକାରକ) ବ୍ୟାପିଥିବା ବେଳେ ଆଉ କେଉଁଠି ସୂକ୍ଷ୍ମ ନିଶ୍ୱାସଯୋଗ୍ୟ କଣିକା କ୍ଷତିକାରକ ସାଜିଛି। ମୋଟାମୋଟି ଭାବରେ ସହରର ବାୟୁ ପ୍ରଦୂଷଣ ମାତ୍ରା ମଧ୍ୟମଧରଣ ସ୍ତରରେ ରହିଥିଲେ ମଧ୍ୟ କେନ୍ଦ୍ରୀୟ ଓ ପୁରୁଣା ଭୁବନେଶ୍ବରରେ ବାୟୁର ସ୍ତର ସନ୍ତୋ‌ଷଜନକ ସ୍ଥିତିକୁ ଫେରିପାରୁନାହିଁ। ଚନ୍ଦ୍ରଶେଖରପୁର, ପଟିଆ, ଖଣ୍ଡଗିରି, ଭରତପୁର, ନୟାପଲ୍ଲୀ, ନାଲକୋ ଛକ ଅଞ୍ଚଳର ବାୟୁ ସନ୍ତୋଷଜନକ ସ୍ତରକୁ ଫେରିଛି। ଦୀପାବଳିରେ ପର୍ଟିକୁଲେଟ୍‌ ମ୍ୟାଟର୍‌ (ପିଏମ୍‌)-୨.୫ (୨.୫ ମାଇକ୍ରୋମିଟର କିମ୍ବା ତା’ଠାରୁ କମ୍‌ ବ୍ୟାସ ବିଶିଷ୍ଟ ସୂକ୍ଷ୍ମ ନିଶ୍ୱାସଯୋଗ୍ୟ କଣିକା, ଯାହାକି ଫୁସଫୁସରେ ପ୍ରବେଶ କରି ରକ୍ତପ୍ରବାହରେ ବିପଦ ସୃଷ୍ଟି କରେ) ଗମ୍ଭୀର ସ୍ତରରେ ଥିବା ଅଞ୍ଚଳରେ ସୁଧାର ଆସିଛି। ପୂର୍ବ ସ୍ଥିତିକୁ ଫେରିବାକୁ ଆଉ ୨୪ ଘଣ୍ଟା ସମୟ ଲାଗିବ ବୋଲି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ସୂଚନା ଦିଆଯାଇଛି।କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଲିଙ୍ଗରାଜ ମନ୍ଦିର ନିକଟରେ ଥିବା ଷ୍ଟେସନ୍‌ର ତଥ୍ୟ ଅନୁଯାୟୀ ଗତକାଲି ମାତ୍ର ୬ ଘଣ୍ଟା ପାଇଁ ପୁରୁଣା ଭୁବନେଶ୍ବରର ବାୟୁ ସନ୍ତୋଷଜନକ ସ୍ତରରେ ରହିଥିଲା। ସୋମବାର ସନ୍ଧ୍ୟା ୭ଟା ବେଳଠାରୁ ଏହି ଅଞ୍ଚଳର ବାୟୁ ଏତେ ଖରାପ ହୋଇଯାଇଥିଲା ଯେ ସନ୍ତୋଷଜନକ ସ୍ତରକୁ ଫେରିବାକୁ ୧୦ ଘଣ୍ଟା ଲାଗିଯାଇଥିଲା। ବାୟୁ ଗୁଣବତ୍ତା ସୂଚକାଙ୍କ(ଏକ୍ୟୁଆଇ) ପିଏମ୍‌୨.୫ ମାତ୍ରା ରାତି ୮ଟାରେ ୩୦୫ରେ ରହିଥିବା ବେଳେ ୯ଟାରେ ୩୦୮ରେ ପହଞ୍ଚିଥିଲା। ରାତି ୧୦ଟା ବେଳକୁ ୩୪୫, ୧୧ଟା ବେଳକୁ ୪୦୮, ୧୨ଟା ବେଳକୁ ସର୍ବୋଚ୍ଚ ସ୍ତର ୪୩୨ରେ ପହଞ୍ଚିଥିଲା। ପରବର୍ତ୍ତୀ ୩ ଘଣ୍ଟା ମଧ୍ୟରେ ଯଥାକ୍ରମେ ୪୨୭, ୩୭୬ ଓ ୩୧୦କୁ ହ୍ରାସ ପାଇଥିଲା। ଭୋର ୫ଟା ସମୟରେ ୧୦୦ ତଳକୁ ଖସି ସନ୍ତୋଷଜନକ ସ୍ତରରେ ରହିଥିଲା। ସେହିପରି ପିଏମ୍‌୧୦ ମଧ୍ୟ ରାତି ୯ଟାରୁ ୧୨ଟା ମଧ୍ୟରେ ଯଥାକ୍ରମେ ୧୮୯, ୨୧୧, ୨୫୪ ଓ ୩୦୯ରେ ପହଞ୍ଚିଥିଲା। ପରବର୍ତ୍ତୀ ସମୟରେ ପ୍ରଦୂଷଣର ମାତ୍ରା କମିଥିଲେ ମଧ୍ୟ ମଝିରେ ମଝିରେ ମଧ୍ୟମ ସ୍ତରରେ ରହିଥିଲା। ହାରାହାରି ତଥ୍ୟ ଉପରେ ନଜର ପକାଇଲେ ଗତ ୨୪ ଘଣ୍ଟାରେ ପୁରୁଣା ଭୁବନେଶ୍ବରର ବାୟୁ ପ୍ରଦୂଷଣର ମାତ୍ରା ଏକ୍ୟୁଆଇ ୧୬୪ ରହିବା ସହ ମଧ୍ୟମଧରଣ ସ୍ତରରେ ରହିଥିଲା। ରବିବାର ରାତିରେ ବାୟୁ ପ୍ରଦୂଷଣ ଗମ୍ଭୀର ସ୍ଥିତିରେ ରହିଥିବା ବେଳେ ସୋମବାର ରାତିରେ ଖରାପ ଓ ମଙ୍ଗଳବାର ରାତିରେ ମଧ୍ୟମଧରଣ ସ୍ତର ଦେଇ ଗତି କରୁଛି।ଚନ୍ଦ୍ର‌ଶେଖରପୁର, ପଟିଆ, କିଟ୍‌ ଛକ ପ୍ରଭୃତି ଅଞ୍ଚଳର ବାୟୁ ସନ୍ତୋଷଜନକ ସ୍ତରକୁ ଫେରିଛି। ପଟିଆ ଷ୍ଟେସନରୁ ମିଳିଥିବା ତଥା ଅନୁଯାୟୀ ବାଣ ଫୁଟାଯିବା କାରଣରୁ ସୋମବାର ଭୋର ସମୟ ପର୍ଯ୍ୟନ୍ତ ପିଏମ୍‌୨.୫ ମାତ୍ରା ମଧ୍ୟମଧରଣ ସ୍ତରରେ ରହିଥିଲା। ପରବର୍ତ୍ତୀ ସମୟରେ ସ୍ଥିତିରେ ବହୁ ପରିମାଣରେ ପରିବର୍ତ୍ତନ ଆସିଛି। ଅତି ଖରାପ ସ୍ଥିତିକୁ କେବେ ଯାଇ ନାହିଁ। କେବଳ ସୋମବାର ରାତି ୯ଟାରେ ୨୩୦ରେ ପହଞ୍ଚିଥିଲା ଏବଂ ରାତି ୧୨ଟା ପର୍ଯ୍ୟନ୍ତ ପ୍ରଦୂଷଣ ମଧ୍ୟମଧରଣ ସ୍ତରରେ ରହିଥିଲା। ଏହାପରେ ଆଉ ପ୍ରଦୂଷଣ ବଢ଼ି ନାହିଁ।  ଆଜି ସନ୍ଧ୍ୟା ସୁଦ୍ଧା ସନ୍ତୋଷଜନକ ସ୍ତର ଦେଇ ଗତି କରୁଛି। ମୋଟାମୋଟି ଦେଖି‌ଲେ ଗତ ୨୪ ଘଣ୍ଟାରେ ସନ୍ତୋଷଜନକ ସ୍ତରରେ ହିଁ ଉତ୍ତର ଭୁବନେଶ୍ବରର ବାୟୁ ରହିଥିଲା।ସୂଚନାଯୋଗ୍ୟ, ବାୟୁ ଗୁଣବତ୍ତା ସୂଚକାଙ୍କ ଯଦି ୦ରୁ ୫୦ ମଧ୍ୟରେ ରହୁଛି ତାକୁ ଭଲ ବାୟୁ ବୋଲି କୁହାଯାଉଛି। ସେହିଭଳି ସୂଚକାଙ୍କ ୫୧ରୁ ୧୦୦ ଭିତରେ ରହିଲେ ସନ୍ତୋଷଜନକ, ୧୦୧ରୁ ୨୦୦ ମଧ୍ୟରେ ମଧ୍ୟମଧରଣ, ୨୦୧ରୁ ୩୦୦ ମଧ୍ୟରେ ଖରାପ, ସୂଚକାଙ୍କ ୩୦୦ରୁ ୪୦୦ ମଧ୍ୟରେ ଅତ୍ୟନ୍ତ ଖରାପ ଏବଂ ୪୦୧ରୁ ୫୦୦ ମଧ୍ୟରେ ରହିଲେ ଗମ୍ଭୀର ସ୍ଥିତି ବୋଲି ଧରାଯାଉଛି। ଦୀପାବଳି ଦିନ ସହରର ବିଭିନ୍ନ ଅଞ୍ଚଳର ଏକ୍ୟୁଆଇ ୧୦୦୦ ଟପିଥିବା ଘରୋଇ ସଂସ୍ଥାଗୁଡ଼ିକ ଦର୍ଶାଇଥିଲେ। ସେଦିନ ରାତି ୧୧ଟାରେ ଶାସ୍ତ୍ରୀନଗରରେ ଏକ୍ୟୁଆଇ ୧,୨୯୧ ଥିବା ବେଳେ ଏଜି କଲୋନିରେ ୧,୨୮୪, ବାପୁଜୀ ନଗରରେ ୧,୨୦୭, ପଟିଆ ଅଞ୍ଚଳରେ ଏକ୍ୟୁଆଇ ୧,୦୫୦ ରହିଥିଲା ବୋଲି ଘରୋଇ ସଂସ୍ଥାଗୁଡ଼ିକ ଦର୍ଶାଇଥିଲେ।