ବରମୁଣ୍ଡା ଓଭରବ୍ରିଜ୍ରେ ଦୁର୍ଘଟଣା, ୪ ଗୁରୁତର: ଇନୋଭାକୁ ଧକ୍କା ଦେଲା ଟ୍ରକ୍, ଉତ୍ତ୍ୟକ୍ତ ଲୋକଙ୍କ ରାସ୍ତାରୋକ ଓ ଭଙ୍ଗାରୁଜା
ଭୁବନେଶ୍ୱର: ବରମୁଣ୍ଡା ଓଭରବ୍ରିଜ୍ ଉପରେ ଖୋର୍ଦ୍ଧା ଅଭିମୁଖେ ଯାଉଥିବା ଏକ ଇନୋଭା କାର୍କୁ ଏକ ଟ୍ରକ୍ ଧକ୍କା ଦେବାରୁ କାର୍ରେ ଥିବା ୪ ଜଣ ଗୁରୁତର ଆହତ ହୋଇଛନ୍ତି। ଉତ୍ତ୍ୟକ୍ତ ଲୋକେ ରାସ୍ତାରୋକ କରିବା ସହ ଟ୍ରକ୍କୁ ଭଙ୍ଗାରୁଜା କରିଥିଲେ। ଫଳରେ ଓଭରବ୍ରିଜ୍ ଉପରେ ଯାତାୟାତ ବାଧାପ୍ରାପ୍ତ ହୋଇଥିଲା। ସୂଚନା ଅନୁଯାୟୀ, ରାତି ପ୍ରାୟ ୧୧ଟାରେ ଇନୋଭା (ଓଡି୦୨ବିଏ୮୭୫୧)କାର୍ଟି ଖୋର୍ଦ୍ଧା ଆଡ଼କୁ ଯାଉଥିବା ବେଳେ ବରମୁଣ୍ଡା ଓଭରବ୍ରିଜ୍ ଉପରେ ଏକ ଟ୍ରକ୍ ତାକୁ ଧକ୍କା ଦେଇଥିଲା। ଧକ୍କା ଯୋଗୁଁ କାର୍ରେ ଥିବା ୪ ଜଣ ଗୁରୁତର ଆହତ ହୋଇଥିଲେ। ସେମାନଙ୍କ ମଧ୍ୟରେ ଜଣେ ସଙ୍କଟାପନ୍ନ ଅଛନ୍ତି। ଆହତଙ୍କ ପରିଚୟ ମିଳି ପା୨ରିନାହିଁ। ଦୁର୍ଘଟଣା ପରେ ସେଠାରେ ଲୋକଙ୍କ ଭିଡ଼ ଜମିବା ସହ ଉତ୍ତେଜନା ବଢ଼ିଥିଲା। ଦୁର୍ଘଟଣାକୁ ନେଇ ଅସନ୍ତୋଷ ପ୍ରକାଶ କରି ସ୍ଥାନୀୟ ଲୋକେ ଟ୍ରକ୍କୁ ଭଙ୍ଗାରୁଜା କରିଥିଲେ। ଖଣ୍ଡଗିରି ଥାନା ପୁଲିସ ଘଟଣାସ୍ଥଳରେ ପହଞ୍ଚି ସ୍ଥିତି ନିୟନ୍ତ୍ରଣକୁ ଆଣିବା ସହ ଦୁର୍ଘଟଣାଗ୍ରସ୍ତ ଉଭୟ ଗାଡ଼ିକୁ ଜବତ କରିଥିଲା। ଆହତ ୪ ଜଣଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଇଥିଲା।









Comments