ଦୀପାବଳି ଅଘଟଣ: ୧୭ଟି ଅଗ୍ନିକାଣ୍ଡ, ୮୦ ଆହତ

ଭୁବନେଶ୍ବର/ଚନ୍ଦ୍ରଶେଖରପୁର: ଦୀପାବଳି ଉତ୍ସବ ପାଳନ ବେଳେ ଗତକାଲି ଗୋଟିଏ ଦିନରେ ରାଜଧାନୀର ମୋଟ୍‌ ୧୭ଟି ସ୍ଥାନରେ ନିଆଁ ଲାଗିଥିବା ଜଣାପଡ଼ିଛି। ସୂଚନା ଅନୁଯାୟୀ, ଚନ୍ଦ୍ରଶେଖରପୁର ଅଞ୍ଚଳରେ ଦୁଇଟି ବଡ଼ଧରଣର ଅଗ୍ନିକାଣ୍ଡ ଘଟିଥିଲା। ସେହିପରି ବାଙ୍କୁଆଳ, ପୁରୁଣା ଭୁବନେଶ୍ୱର ସମେତ ସହରର ବିଭିନ୍ନ ବସ୍ତି ଅଞ୍ଚଳରେ ମଧ୍ୟ ଛୋଟବଡ଼ ଅଗ୍ନିକାଣ୍ଡ ଘଟିଥିଲା। ଇନ୍‌ଫୋସିଟି ଥାନା ନିକଟ ଶିଖରଚଣ୍ଡୀ ପାହାଡ଼ ପାଖରେ ଥିବା ରେଶମ ଶିଳ୍ପ କାର୍ଯ୍ୟାଳୟ ପରିସରରେ ଗତକାଲି ବିଳମ୍ବିତ ରାତିରେ ଅଗ୍ନିକାଣ୍ଡ ଘଟିଛି।ଏହି ଅଗ୍ନିକାଣ୍ଡରେ କାର୍ଯ୍ୟାଳୟର କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ସମେତ ଅନ୍ୟାନ୍ୟ ଷ୍ଟୋର ସାମଗ୍ରୀ ପୋଡ଼ି ନଷ୍ଟ ହୋଇଯାଇଛି। ତେବେ ଅଗ୍ନିକାଣ୍ଡର ପ୍ରକୃତ କାରଣ ଏଯାଏଁ ସ୍ପଷ୍ଟ ହୋଇନାହିଁ। ଶିଖରଚଣ୍ଡୀ ପାହାଡ଼ ଛକ ନିକଟରେ ଥିବା ରେଶମ ଶିଳ୍ପ କାର୍ଯ୍ୟାଳୟର କ୍ୟାମ୍ପସ ଭିତରେ ହୁତୁ ହୁତୁ ହୋଇ ନିଆଁ ଦେଖି ସ୍ଥାନୀୟ ଲୋକେ ଚନ୍ଦ୍ରଶେଖରପୁର ଦମକଳ ବିଭାଗକୁ ସୂଚନା ଦେଇଥିଲେ। ଦୀପାବଳି ଥିବାରୁ ବାଣ ଫୁଟାଇବା କିମ୍ବା ଅନ୍ୟ କୌଣସି କାରଣରୁ ନିଆଁ ଲାଗିଥାଇପାରେ ବୋଲି ସନ୍ଦେହ କରାଯାଉଛି।  ଏହି ଅଗ୍ନିକାଣ୍ଡରେ କାର୍ଯ୍ୟାଳୟର କିଛି ଗୁରୁତ୍ୱପୂର୍ଣ୍ଣ ଦସ୍ତାବିଜ ଓ କାଗଜପତ୍ର ପୋଡ଼ିଯାଇଥିବା ଖବର ଚିନ୍ତାର କାରଣ ପାଲଟିଛି।ଭୁବନେଶ୍ୱର/ ବାଲିଅନ୍ତା/ବାଲିଅନ୍ତା ବଜାର: ଦୀପାବଳିରେ ବାଣଫୁଟା ସମୟରେ ଅଘଟଣ ଘଟି କମିସନରେଟ୍‌ ପୁଲିସ ଅଞ୍ଚଳରେ ୮୦ ଜଣ ଆହତ ହୋଇଛନ୍ତି। ଆହତ ହୋଇଥିବା ୨୮ଜଣ ରୋଗୀଙ୍କର ଭୁବନେଶ୍ୱର ଏମ୍‌ସ ‘ବର୍ଣ୍ଣସ୍ ଆଣ୍ଡ ପ୍ଲାଷ୍ଟିକ୍ ସର୍ଜରୀ’ ବିଭାଗରେ ଚିକିତ୍ସା କରାଯାଇଛି। ୨୪ଜଣଙ୍କର ଜରୁରିକାଳୀନ ପ୍ରାଥମିକ ଚିକିତ୍ସା କରାଯାଇଛି। ଅନ୍ୟ ୪ଜଣଙ୍କୁ ଆଇସିୟୁରେ ରଖାଯାଇଛି। ଏଥିରୁ ତିନିଜଣଙ୍କ ଶରୀରର ୫୦ ପ୍ରତିଶତରୁ ଅଧିକ ଅଂଶ ପୋଡ଼ିଯାଇଛି। ପ୍ରାଥମିକ ଚିକିତ୍ସା ନେଇଥିବା ୨୪ ରୋଗୀଙ୍କୁ ନିୟମିତ ଭାବେ ବହିର୍ବିଭାଗରେ ଚିକିତ୍ସା କରାଇବାକୁ ବର୍ଣ୍ଣସ୍ ଆଣ୍ଡ ପ୍ଲାଷ୍ଟିକ୍ ସର୍ଜରି ବିଭାଗର ମୁଖ୍ୟ ଡାକ୍ତର ସଞ୍ଜୟ କୁମାର ଗିରି ପରାମର୍ଶ ଦେଇଛନ୍ତି। କ୍ୟାପିଟାଲ ହସ୍ପିଟାଲରେ ମୋଟ୍‌ ୨୫ ଜଣ ଆହତ ଚିକିତ୍ସା ପାଇଁ ଆସିଥିଲେ। ସବୁ ସାମାନ୍ୟ ଆହତ ହୋଇଥିବା ହସ୍ପିଟାଲ କର୍ତ୍ତୃପକ୍ଷଙ୍କଠାରୁ ସୂଚନା ମିଳିଛି। ବାଲିଅନ୍ତା ଅଞ୍ଚଳରେ ବାଣ ଫୁଟାଇ ୫ ଜଣ ନାବାଳକ ସମେତ ମୋଟ୍‌ ୧୫ ଜଣ ଆହତ ହୋଇ ବାଳକାଟି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଥିଲେ। ଆହତମାନଙ୍କ ମଧ୍ୟରେ ସନ୍ତୋଷ ପାଲ (୨୭), ସୁବ୍ରଜିତ ପଣ୍ଡା (୩୫) ଏବଂ ଆଦିତ୍ୟ ସାହୁ (୨୩) ଆହତ  ହୋଇଛନ୍ତି। ବାଲିଅନ୍ତା ବଜାର ଅଞ୍ଚଳରେ ୧୨ ଜଣ ଆହତ ହୋଇଛନ୍ତି। ସମସ୍ତ ଆହତଙ୍କୁ ନିକଟସ୍ଥ ବିଭିନ୍ନ ଡାକ୍ତରଖାନାରେ ପ୍ରାଥମିକ ଚିକିତ୍ସା କରାଯାଇଥିବା ବେଳେ  ଜଗନ୍ନାଥପୁର ପଞ୍ଚାୟତର ଜଣେ ଯୁବକଙ୍କ ହାତରେ ଗଭୀର ଆଘାତ ଲାଗିଛି।ଚନ୍ଦ୍ରଶେଖରପୁର: ରବିବାର ରାତିରେ ଚନ୍ଦ୍ରଶେଖରପୁର ବିଡିଏ କଲୋନିରେ ପାର୍କିଂ ହୋଇଥିବା ଏକ ମିନିବସ୍‌ ବାଣ ନିଆଁରେ ସମ୍ପୂର୍ଣ୍ଣ ଜଳିଯାଇଛି। ଏକ ରକେଟ୍‌ ବାଣ ବସ୍‌ ଭିତରକୁ ପଶିଯିବାରୁ ଏହି ଅଗ୍ନିକାଣ୍ଡ ଘଟିଥିବା ଜଣାପଡ଼ିଛି। ବସ୍‌ ମାଲିକ ଏନେଇ ଚନ୍ଦ୍ରଶେଖରପୁର ଥାନାରେ ଅଭିଯୋଗ କରିଛନ୍ତି। ବିଡିଏ କଲୋନି ରାସ୍ତାକଡ଼ରେ ମିନିବସଟି ପାର୍କିଂ ହୋଇଥିଲା। କିଛି ଦୂରରେ ପିଲାମାନେ ବାଣ ଫୁଟାଉଥିଲେ। ହଠାତ୍ ବସ୍‌ଟି ହୁତ୍‌ହୁତ୍‌ ହୋଇ ଜଳିଥିଲା। ସ୍ଥାନୀୟ ଲୋକଙ୍କ କହିବା କଥା ବସ୍‌ ଆଖପାଖରେ କେହି ବାଣ ଫୁଟାଉ ନଥିଲେ। ତେଣୁ ଦୂରରୁ ରକେଟ୍‌ ବାଣ ଆସି ବସ୍‌ ଭିତରେ ପଶିଯିବାରୁ ଏହି ଅଗ୍ନିକାଣ୍ଡ ଘଟିଥିବା ସନ୍ଦେହ କରାଯାଉଛି।ମେଣ୍ଢାଶାଳ: ଚନ୍ଦକା ଥାନା ଅନ୍ତର୍ଗତ ମେଣ୍ଢାଶାଳ ଗ୍ରାମରେ ବାଣ ଫୁଟି ୪ ବଖରା ଗୁହାଳଘର ପୋଡ଼ି ପାଉଁଶ ହୋଇଯାଇଛି। ଗୋଟିଏ ବଳଦର ମୃତ୍ୟୁ ହୋଇଥିବା ବେ‌ଳେ ୩ ଅର୍ଦ୍ଧଦଗ୍ଧ ବଳଦଙ୍କୁ ଉଦ୍ଧାର କରାଯାଇଛି। ଅଗ୍ନିଶମବାହିନୀ ନିଆଁ ଆୟତ୍ତ କରିଥିଲା। ଗ୍ରାମର ପ୍ରଫୁଲ୍ଲ କୁମାର ପାତ୍ରଙ୍କ ଘରେ ଏଭଳି ଅଘଟଣ ଘଟିଯାଇଛି। ପ୍ରଫୁଲ୍ଲଙ୍କ ପୁଅ ସୁଶାନ୍ତ ଗୁହାଳଘରେ ଦୁଇ ହଳ ବଳଦ ରଖିଥିଲେ। ଦୀପାବଳି ପର୍ବ ଅବସରରେ ବାଣଫୁଟା ଚାଲିଥିବା ସମୟରେ ଏକ ହାବେଳି ବାଣର ନିଆଁଝୁଲ ତାଙ୍କ ଗୁହାଳ ଚାଳ ଉପରେ ପଡ଼ିଥିଲା। କ୍ଷଣିକ ମଧ୍ୟରେ ଗୁହାଳଘର ସମ୍ପୂର୍ଣ୍ଣ ନିଆଁ କବଳକୁ ଚାଲିଯାଇଥିଲା।ଭୁବନେଶ୍ବର: ଭରତପୁର ଦୁର୍ଗାମାଧବନଗର ଲେନ୍‌-୫ରେ ବାଣଫୁଟି ବିଦ୍ୟୁତ୍‌ ଖୁଣ୍ଟ ଜଳିଯାଇଥିଲା। ଫଳରେ ୬ଘଣ୍ଟା ଧରି ଅଞ୍ଚଳରେ ବିଦ୍ୟୁତ୍‌ ସରବରାହ ବାଧାପ୍ରାପ୍ତ ହୋଇଥିଲା। ଖୁଣ୍ଟିରେ ଲାଗିଥିବା ଫାଇବର୍‌ ଅପ୍ଟିକ୍‌ସ ଜଳିଯାଇଛି। ରାତି ୭ଟା ସମୟରେ ସ୍ଥାନୀୟ ଅଞ୍ଚଳର କିଛି ପିଲା ରକେଟ୍‌ ବାଣ ଲଗାଉଥିବା ସମୟରେ ଏହା ବିଦ୍ୟୁତ୍‌ ଖୁଣ୍ଟରେ ଗୁଡ଼ାଇହୋଇ ରହିଥିବା ଫାଇବର୍‌ ଅପ୍ଟିକ୍ସରେ ନିଆଁ ଲାଗିଯାଇଥିଲା। ନିଆଁ ବ୍ୟାପିଯାଇ ବିଦ୍ୟୁତ୍‌ ତାରକୁ ଧରିଥିଲା। ବିଦ୍ୟୁତ୍‌ ସେକ୍ସନ ପକ୍ଷରୁ ବିଦ୍ୟୁତ୍‌ କାଟ କରାଯିବା ପରେ ନିଆଁ ଆୟତ୍ତ ହୋଇଥିଲା। ରାତି ୨ଟାରେ ବିଦ୍ୟୁତ୍‌ ସରବରାହ ସ୍ବାଭାବିକ ହୋଇଥିଲା।