କାଦମ୍ବିନୀ ପକ୍ଷରୁ ସ୍ୱାଧୀନତାର ଅମୃତ ମହୋତ୍ସବ : ଓମଟିଭି

(ଓମ): ଆଞ୍ଚଳିକ ଭାଷାରେ ପ୍ରକାଶ ପାଉଥିବା ଅନ୍ୟତମ ଜାତୀୟସ୍ତରର ପତ୍ରିକା ‘କାଦମ୍ବିନୀ’ ପକ୍ଷରୁ ମଙ୍ଗଳବାର ସ୍ୱାଧୀନତାର ଅମୃତ ମହୋତ୍ସବ ପାଳିତ ହୋଇଯାଇଛି । ଏଥିରେ ମୁଖ୍ୟ ଅତିଥି ଭାବେ ଆନ୍ଧ୍ରପ୍ରଦେଶ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ ଯୋଗଦେଇ ଭାରତର ସ୍ୱାଧୀନତା ହାସଲ ପାଇଁ ବହୁ ସ୍ୱାଧୀନତା ସଂଗ୍ରାମୀଙ୍କ ବଳିଦାନ ଅମର ହୋଇ ରହିଯାଇଛି ଏବଂ ପ୍ରଥମ ସ୍ୱାଧୀନତା ସଂଗ୍ରାମ ଭାବେ ଓଡ଼ିଶାର ପାଇକ ବିଦ୍ରୋହ ଯଥେଷ୍ଟ ଗୁରୁତ୍ୱ ବହନ କରେ ବୋଲି ଶ୍ରୀ ହରିଚନ୍ଦନ କହିଥିଲେ । କାଦମ୍ବିନୀରେ ସାହିତ୍ୟ ସହିତ ଗବେଷଣାତ୍ମକ ଲେଖାମାନ ପ୍ରକାଶ ପାଉଥିବାରୁ ଏବେ ଏହି ପତ୍ରିକା ସମସ୍ତଙ୍କର ଆଦରର ପାତ୍ର ହୋଇପାରିଛି । ଓଡ଼ିଶାରେ ସ୍ୱାଧୀନତା ସଂଗ୍ରାମର ଗାଥା ପ୍ରସାର ଦିଗରେ ଉଦ୍ୟମ କରି କାଦମ୍ବିନୀର ‘ପାଇକ ବିଦ୍ରୋହ ଓ ବକ୍ସି ଜଗବନ୍ଧୁ’ ସଂଖ୍ୟା ନିଶ୍ଚିତ ଭାବେ ପରବର୍ତ୍ତୀ ପିଢ଼ିର ଓଡ଼ିଆଙ୍କୁ ପ୍ରେରଣା ଯୋଗାଇବ ବୋଲି କହିଥିଲେ । ଏହି ବିଶେଷାଙ୍କ ପ୍ରକାଶନ କରି କାଦମ୍ବିନୀ ଓଡ଼ିଆଙ୍କ ମଧ୍ୟରେ ଜାତିପ୍ରେମ ବହ୍ନି ପ୍ରଜ୍ଜ୍ୱଳନ କରିପାରିଛି ବୋଲି ଶ୍ରୀ ହରିଚନ୍ଦନ କହିଥିଲେ । ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି, ଅବକାରୀ ଓ ପର୍ଯ୍ୟଟନ ମନ୍ତ୍ରୀ ଅଶ୍ୱିନୀ କୁମାର ପାତ୍ର ନିଜ ବକ୍ତବ୍ୟରେ କହିଲେ ଟମ୍‍ କକାଙ୍କ କୁଟୀର ଭଳି ଉପନ୍ୟାସ ଆମେରିକାରୁ ଯେଭଳି କଳା ଆଇନ୍‍ ପ୍ରତ୍ୟାହାର କରିବାକୁ ତତ୍‍କାଳୀନ ସରକାରଙ୍କୁ ବାଧ୍ୟ କରିଥିଲା, କାଦମ୍ବିନୀର ଏହି ଭଳି ଗବେଷଣାତ୍ମକ ଲେଖା ନିଶ୍ଚିତ ଭାବେ ଅନେକ କ୍ଷେତ୍ରରେ ସାମାଜିକ ସଂସ୍କାର ଆଣିବା ସହ ସାମାଜିକ ବିକାଶରେ ସହାୟକ ହେବ । ଭାରତର ସ୍ୱାଧୀନତା ସଂଗ୍ରାମ ସମଗ୍ର ବିଶ୍ୱକୁ ଭାରତ ଭୋଗର ଦେଶ ନୁହେଁ ତ୍ୟାଗର ଦେଶ ବୋଲି ପ୍ରମାଣିତ କରିପାରିଛି । ଯିଏ ଯେଉଁ କ୍ଷେତ୍ରରେ ଅଛନ୍ତି ସମସ୍ତେ ସମାଜର ଉନ୍ନତି ପାଇଁ କାମ କରିବା ଉଚିତ ବୋଲି ବୋଲି ଶ୍ରୀ ପାତ୍ର କହିଥିଲେ । ବରିଷ୍ଠ ସାହିତ୍ୟିକ ପ୍ରଫେସର ଶାନ୍ତନୁ କୁମାର ଆଚାର୍ଯ୍ୟ ସ୍ୱାଧୀନତା ସଂଗ୍ରାମ ସମ୍ପର୍କରେ ବକ୍ତବ୍ୟ ଦେଇ କହିଲେ, ହିଂସା କେବେ ମାନବିକତାକୁ ମାରିପାରିବ ନାହିଁ ବୋଲି ମହାତ୍ମା ଗାନ୍ଧୀ ପ୍ରମାଣିତ କରିଛନ୍ତି । ଗାନ୍ଧୀଙ୍କର ଏହି ମତ ପାଇଁ ସେ ସମଗ୍ର ବିଶ୍ୱରେ ମହାନ ହୋଇପାରିଛନ୍ତି । ତ୍ୟାଗ ମନୋବୃତ୍ତି ରଖିଲେ ସ୍ୱାଧୀନତା ସଂଗ୍ରାମର ପ୍ରକୃତ ମୂଲ୍ୟ ଜାଣିହେବ । ବିଶ୍ୱ ଯେତେ ସର୍ବାଧୁନିକ ହେଉ ନା କାହିଁକି ତ୍ୟାଗ ଓ ଅହିଂସା ଆଚରଣ ଦ୍ୱାରା ହିଁ ଶାନ୍ତି ପ୍ରତିଷ୍ଠା ହୋଇପାରିବ ବୋଲି ଶ୍ରୀ ଆଚାର୍ଯ୍ୟ କହିଥିଲେ । ଅନ୍ୟତମ ଅତିଥି ବିଶିଷ୍ଟ ସାହିତ୍ୟିକ ହରପ୍ରସାଦ ଦାସ ଅଗଷ୍ଟ କ୍ରାନ୍ତି ଉପରେ ବହୁ ଉପାଦେୟ ତଥ୍ୟ ରଖିଥିଲେ । କାଦମ୍ବିନୀ ଏବେ ଜାତୀୟସ୍ତରର ଏକ ଗବେଷଣାତ୍ମକ ପତ୍ରିକା ହୋଇପାରିଛି । ଏହି ପତ୍ରିକା ସମସ୍ତ କ୍ଷେତ୍ରକୁ ସ୍ପର୍ଶ କରିପାରିଥିବାରୁ ଏହା ପ୍ରତି ପାଠକଙ୍କ ପସନ୍ଦ ମଧ୍ୟ ବୃଦ୍ଧି ପାଇଛି ବୋଲି କହିଥିଲେ । ଭାରତୀୟଙ୍କ ମଧ୍ୟରେ ସ୍ୱାଧୀନତା ଓ ଜାତୀୟତା ଭାବ ଆଣିବା ପାଇଁ ସମସ୍ତଙ୍କ ସ୍ୱରରେ ପରିବର୍ତ୍ତନ ହେବା ଆବଶ୍ୟକ ଓ ସମସ୍ତେ ନେତୃତ୍ୱକୁ ବଳ ଯୋଗାଇ ଦେବାକୁ ପଡ଼ିବ ବୋଲି କହିଥିଲେ । ଏହି ଅବସରରେ କାଦମ୍ବିନୀର ସ୍ୱତନ୍ତ୍ର ଅଗଷ୍ଟ ସଂଖ୍ୟା ଓ କୁନିକଥାର ଅଗଷ୍ଟ ସଂଖ୍ୟା ଅତିଥିଙ୍କ ଦ୍ୱାରା ଉନ୍ମୋଚନ କରାଯାଇଥିଲା । ନିରୁପମା ଆଚାର୍ଯ୍ୟ, ଅରୁଣ ଖିଲାର, ତପସ୍ୱିନୀ ନାୟକ ଓ କଲ୍ୟାଣୀ ବକ୍ସିଙ୍କୁ କାଦମ୍ବିନୀ ପ୍ରିୟ ପାଠକ ସମ୍ବର୍ଦ୍ଧନା ପ୍ରଦାନ କରାଯାଇଥିଲା । କାଦମ୍ବିନୀ ଓ କୁନିକଥା ସମ୍ପାଦିକା ଡ. ଇତି ସାମନ୍ତ କାର୍ଯ୍ୟକ୍ରମ ପରିଚାଳନା କରିଥିବା ବେଳେ କାଦମ୍ବିନୀ ପ୍ରତିଷ୍ଠାତା ଅଚ୍ୟୁତ ସାମନ୍ତ ଅତିଥିଙ୍କୁ ସମ୍ବର୍ଦ୍ଧିତ କରିଥିଲେ ।