ବନ୍ଧମୁଣ୍ଡାରେ ହାତୀର ଆତଙ୍କ: ମହିଳା ରେଳ କର୍ମଚାରୀଙ୍କ ମର୍ମନ୍ତୁଦ ମୃତ୍ୟୁ; ଡ୍ୟୁଟିକୁ ଯିବା ବାଟରେ ଚାଲିଗଲା ଜୀବନ
ସୁନ୍ଦରଗଡ଼, ବନ୍ଧମୁଣ୍ଡା: ବନ୍ଧମୁଣ୍ଡାରୁ ଏକ ଅତ୍ୟନ୍ତ ଦୁଃଖଦ ଖବର ସାମ୍ନାକୁ ଆସିଛି। ଜଙ୍ଗଲୀ ହାତୀର ଆକ୍ରମଣରେ ଜଣେ ୫୬ ବର୍ଷୀୟା ମହିଳାରେଳକର୍ମଚାରୀଙ୍କ ମର୍ମନ୍ତୁଦ ମୃତ୍ୟୁ ଘଟିଛି। ମୃତ ମହିଳାଙ୍କ ନାମ ମରିୟମ ଲାକ୍ରା ବୋଲି ଜଣାପଡ଼ିଛି। ବୁଧବାର ଭୋର ପ୍ରାୟ ୪ଟା ସମୟରେ ଏହି ହୃଦୟବିଦାରକ ଘଟଣା ଘଟିଥିବା ସୂଚନା ମିଳିଛି।ମିଳିଥିବା ସୂଚନା ଅନୁଯାୟୀ, ମରିୟମ ଲାକ୍ରା ଚକ୍ରଧରପୁରରେ ନିଜ ଡ୍ୟୁଟିରେ ଯୋଗଦେବା ପାଇଁ ଟ୍ରେନ୍ ଧରିବା ଉଦ୍ଦେଶ୍ୟରେ ବନ୍ଧମୁଣ୍ଡା ରେଳ ଷ୍ଟେସନକୁ ଯାଉଥିଲେ। ଏହି ସମୟରେ ସେ ବନ୍ଧମୁଣ୍ଡା ରେଳ ୟାର୍ଡ ରାସ୍ତା ଦେଇ ଯାଉଥିବା ବେଳେ ହଠାତ୍ ଏକ ଜଙ୍ଗଲୀ ହାତୀ ସହ ତାଙ୍କର ସାମ୍ନାସାମ୍ନି ହୋଇଥିଲା। ମରିୟମ କିଛି ବୁଝିବା ପୂର୍ବରୁ ହାତୀଟି ତାଙ୍କ ଉପରେ ଆକ୍ରମଣ କରିଥିଲା। ଫଳରେ ଘଟଣାସ୍ଥଳରେ ହିଁ ତାଙ୍କର ଦୁଃଖଦ ମୃତ୍ୟୁ ଘଟିଥିଲା।ସକାଳେ ରେଳ ୟାର୍ଡ ଅଞ୍ଚଳକୁ ଆସିଥିବା ଅନ୍ୟ ରେଳ କର୍ମଚାରୀମାନେ ମହିଳାଙ୍କ ମୃତଦେହକୁ ଦେଖିବା ପରେ ଅଞ୍ଚଳରେ ଆତଙ୍କ ଓ ଶୋକର ଛାୟା ଖେଳିଯାଇଥିଲା। ମୃତଦେହ ନିକଟରେ ଥିବା ବ୍ୟାଗ୍ରୁ ରେଳବାଇ ପରିଚୟପତ୍ର ମିଳିବା ପରେ ତାଙ୍କର ପରିଚୟ ମରିୟମ ଲାକ୍ରା ବୋଲି ଜଣାପଡ଼ିଥିଲା। ଘଟଣା ସମ୍ପର୍କରେ ସୂଚନା ପାଇବା ପରେ ବନ ବିଭାଗର ଏକ ଟିମ୍ ଘଟଣାସ୍ଥଳକୁ ଯାଇଥିବା ଜଣାପଡ଼ିଛି। ଡ୍ୟୁଟିକୁ ଯିବା ପାଇଁ ଘରୁ ବାହାରିଥିବା ଜଣେ ମହିଳା ରେଳ କର୍ମଚାରୀଙ୍କ ଏଭଳି ଅକାଳ ବିୟୋଗ ସମଗ୍ର ବନ୍ଧମୁଣ୍ଡା ଅଞ୍ଚଳରେ ଗଭୀର ଶୋକର ବାତାବରଣ ସୃଷ୍ଟି କରିଛି।ବନ୍ୟଜନ୍ତୁଙ୍କ ଚଳପ୍ରଚଳ ଅଞ୍ଚଳରେ ରେଳ କର୍ମଚାରୀ ଓ ସାଧାରଣ ଲୋକଙ୍କ ସୁରକ୍ଷାକୁ ନେଇ ପୁଣିଥରେ ଚିନ୍ତା ପ୍ରକାଶ ପାଇଛି।









Comments