ସିଆର୍ଏଫ୍ଏମ୍ ଯୋଜନାର ୨୫ଲକ୍ଷ ଟଙ୍କା ଖାଇଥିଲେ, ଏନ୍ଜିଓ ନିର୍ଦ୍ଦେଶକ, ବାଲେଶ୍ବର ମୁଖ୍ୟ ଜିଲ୍ଲା କୃଷି ଅଧିକାରୀ, ପୂର୍ବତନ ଏଡିଓ ଗିରଫ
ଭୁବନେଶ୍ବର: କମ୍ପ୍ରିହେନ୍ସିଭ୍ ରାଇସ୍ ଫାଲୋ ମ୍ୟାନେଜ୍ମେଣ୍ଟ୍ (ସିଆର୍ଏଫ୍ଏମ୍) ଯୋଜନାରେ ହେରଫେର କରି ୨୫ଲକ୍ଷରୁ ଊର୍ଦ୍ଧ୍ବ ଟଙ୍କା ହଡ଼ପ କରିଥିଲେ। ଏହା ଧରାପଡ଼ିବା ପରେ ଆଜି (ବୁଧବାର) ଓଡ଼ିଶା ଦୁର୍ନୀତି ନିବାରଣ ବିଭାଗ (ଭିଜିଲାନ୍ସ) ବାଲେଶ୍ବରର ମୁଖ୍ୟ ଜିଲ୍ଲା କୃଷି ଅଧିକାରୀ ବିଶ୍ବଜିତ ପଣ୍ଡା, ପୂର୍ବତନ ଜିଲ୍ଲା କୃଷି ଅଧିକାରୀ ସରୋଜ କୁମାର ଗିରି, ଏନ୍ଜିଓ ଶକ୍ତି ଶିଖାର ନିର୍ବାହୀ ନିର୍ଦ୍ଦେଶକ ତୁଷାରକାନ୍ତ ବେହେରାଙ୍କୁ ଗିରଫ କରିଛି। ଭିଜିଲାନ୍ସ ବିଭାଗ ପକ୍ଷରୁ ଜାରି ସୂଚନାନୁସାରେ, ଅଭିଯୋଗ ଆଧାରରେ ଭିଜିଲାନ୍ସ ଟିମ୍ ତଦନ୍ତ କରିଥିଲା। କୃଷି ଓ ଖାଦ୍ୟ ଉତ୍ପାଦନ ନିର୍ଦ୍ଦେଶାଳୟ ପକ୍ଷରୁ ସିଆର୍ଏଫ୍ଏମ୍ ଯୋଜନାରେ ୧୨ହଜାର ହେକ୍ଟର ଜମିରେ ମୁଗ ଓ ୩୫୦୦ ହେକ୍ଟର ଜମିରେ ବିରି ଫସଲ ନିମନ୍ତେ ଲକ୍ଷ୍ୟ ଧାର୍ଯ୍ୟ କରାଯାଇଥିଲା।
ମୟୂରଭଞ୍ଜ ଜିଲ୍ଲା ବାରିପଦାର ଏନ୍ଜିଓ ଶକ୍ତି ଶିଖାକୁ ବାଲେଶ୍ବର ଜିଲ୍ଲା ନିମନ୍ତେ ପେଶାଦାର ସଂସ୍କା (ପିଏ) ଭାବେ ଚୟନ କରାଯାଇଥିଲା। ଏଥିପାଇଁ ଚୁକ୍ତିପତ୍ର ସ୍ବାକ୍ଷରିତ ହୋଇଥିଲା। ସରକାରୀ ନିୟମାନୁସାରେ, ଉକ୍ତ ଏନ୍ଜିଓ, ହିତାଧିକାରୀ ଓ କ୍ଲଷ୍ଟର ଚୟନ କରିବାରେ ସ୍ଥଳକର୍ମକର୍ତ୍ତାଙ୍କୁ ସହାୟତା କରିବା ଏବଂ ସଚେତନା କାର୍ଯ୍ୟକ୍ରମ ଓ କୃଷକଙ୍କୁ ପ୍ରଶିକ୍ଷଣ ପ୍ରଦାନ କରିବେ। ତେବେ ସରଜମିନ ଅନୁସନ୍ଧାନରେ ଏଭଳି କୌଣସି କାର୍ଯ୍ୟ ଉକ୍ତ ଏନ୍ଜିଓ କରିନଥିଲା। ଜିଲ୍ଲାର ୧୨ଟି ବ୍ଲକର ବ୍ଲକ କୃଷି ଅଧିକାରୀ ଏଭଳି କୌଣସି କାର୍ଯ୍ୟକ୍ରମ ହୋଇନଥିବା ଭିଜିଲାନ୍ସ ଟିମ୍ ନିକଟରେ ବୟାନ ଦେଇଥିଲେ। ଜିଲ୍ଲା ମୁଖ୍ୟ କୃଷି ଅଧିକାରୀ ପଣ୍ଡା, ପୂର୍ବତନ ଅତିରିକ୍ତ କୃଷି ଅଧିକାରୀ ଗିରି ଓ ଏନ୍ଜିଓର ଇଡି ବେହେରା, ତିନିହେଁ ମିଶି ମିଥ୍ୟା ବିଲ୍ କରି ଉକ୍ତ ଯୋଜନା ନିମନ୍ତେ ଆସିଥିବା ୨୫ଲକ୍ଷ ୩ହଜାର ୨୪୯ଟଙ୍କା ହଡ଼ପ କରିଥିବା ତଦନ୍ତରେ ଧରାପଡ଼ିଥିଲା। ଏହି ଘଟଣାରେ ଅପରାଧିକ ଷଡ଼ଯନ୍ତ୍ର, ନିଜର କ୍ଷମତାର ଦୁରୁପଯୋଗ ଓ ସରକାରୀ ପାଣ୍ଠୀର ହଡ଼ପ ଆଦି ଦଫାରେ ଏକ ମାମଲା ରୁଜୁ କରାଯାଇ ତିନି ଅଭିଯୁକ୍ତଙ୍କୁ ଗିରଫ କରାଯାଇଥିବା ଭିଜିଲାନ୍ସ ବିଭାଗ ପକ୍ଷରୁ ସୂଚନା ଦିଆଯାଇଛି।









Comments