Skip to content
Sunday, 22 November 2026
Breaking News
Video
Programme

୩ ରାଜ୍ୟର ସ୍ବାର୍ଥ ପୂରଣ ହୋଇପାରୁନି: ଚାରି ଦଶନ୍ଧି ଧରି ଅଧପନ୍ତରିଆ ଇଚ୍ଛା ଡ୍ୟାମ୍‌

୩ ରାଜ୍ୟର ସ୍ବାର୍ଥ ପୂରଣ ହୋଇପାରୁନି: ଚାରି ଦଶନ୍ଧି ଧରି ଅଧପନ୍ତରିଆ ଇଚ୍ଛା ଡ୍ୟାମ୍‌

୩ ରାଜ୍ୟର ସ୍ବାର୍ଥ ପୂରଣ ହୋଇପାରୁନି: ଚାରି ଦଶନ୍ଧି ଧରି ଅଧପନ୍ତରିଆ ଇଚ୍ଛା ଡ୍ୟାମ୍‌

Key Points

  • ଜଳେଶ୍ୱର : ସୁବର୍ଣ୍ଣରେଖା ନଦୀରେ ବନ୍ୟା ପ୍ରତିକାର ସହ ନଦୀ ଅବବାହିକା ଅଞ୍ଚଳରେ ଥିବା ଚାଷଜମିକୁ ଜଳସେଚନ ସୁବିଧା ପାଇଁ ୧୯୭୦ ଦଶକରେ ପରିକଳ୍ପନା ହୋଇଥିବା ସୁବର୍ଣ୍ଣରେଖା ବହୁମୁଖୀ ପ୍ରକଳ୍ପ ୪ ଦଶନ୍ଧି ପରେ ବି ଅଧପନ୍ତରିଆ…
  • ଏହି ପ୍ରକଳ୍ପର ସବୁଠାରୁ ଗୁରୁତ୍ବପୂର୍ଣ୍ଣ ଅଂଶ ଝାଡ଼ଖଣ୍ଡର ଇଚ୍ଛା ଡ୍ୟାମ୍ ଏବେ ମଧ୍ୟ ଅସମ୍ପୂର୍ଣ୍ଣ।
  • ଡ୍ୟାମ୍‌ର ମାଟିବନ୍ଧ ଓ ଡାଇକ୍‌ ନିର୍ମାଣ ଶେଷ ହୋଇଥିଲେ ସୁଦ୍ଧା ସ୍ପିଲ୍‌ୱେ କାମ ଆରମ୍ଭ ହୋଇ ପାରୁନାହିଁ।

 ୩ ରାଜ୍ୟର ସ୍ବାର୍ଥ ପୂରଣ ହୋଇପାରୁନି: ଚାରି ଦଶନ୍ଧି ଧରି ଅଧପନ୍ତରିଆ ଇଚ୍ଛା ଡ୍ୟାମ୍‌

 

ଜଳେଶ୍ୱର : ସୁବର୍ଣ୍ଣରେଖା ନଦୀରେ ବନ୍ୟା ପ୍ରତିକାର ସହ ନଦୀ ଅବବାହିକା ଅଞ୍ଚଳରେ ଥିବା ଚାଷଜମିକୁ ଜଳସେଚନ ସୁବିଧା ପାଇଁ ୧୯୭୦ ଦଶକରେ ପରିକଳ୍ପନା ହୋଇଥିବା ସୁବର୍ଣ୍ଣରେଖା ବହୁମୁଖୀ ପ୍ରକଳ୍ପ ୪ ଦଶନ୍ଧି ପରେ ବି ଅଧପନ୍ତରିଆ ହୋଇରହିଛି। ଏହି ପ୍ରକଳ୍ପର ସବୁଠାରୁ ଗୁରୁତ୍ବପୂର୍ଣ୍ଣ ଅଂଶ ଝାଡ଼ଖଣ୍ଡର ଇଚ୍ଛା ଡ୍ୟାମ୍ ଏବେ ମଧ୍ୟ ଅସମ୍ପୂର୍ଣ୍ଣ। ଡ୍ୟାମ୍‌ର ମାଟିବନ୍ଧ ଓ ଡାଇକ୍‌ ନିର୍ମାଣ ଶେଷ ହୋଇଥିଲେ ସୁଦ୍ଧା ସ୍ପିଲ୍‌ୱେ କାମ ଆରମ୍ଭ ହୋଇ ପାରୁନାହିଁ। ଝାଡ଼ଖଣ୍ଡରେ ସ୍ଥାନୀୟ ଲୋକଙ୍କ ବିରୋଧ, ଜମି ଅଧିଗ୍ରହଣ ଓ ଥଇଥାନ ସମସ୍ୟା ଏହି ପ୍ରକଳ୍ପର ଗତିରୋଧ କରିଛି। ଏହାର ପ୍ରଭାବରେ ଓଡ଼ିଶା ସମେତ ଝାଡ଼ଖଣ୍ଡ ଓ ପଶ୍ଚିମବଙ୍ଗର ବିସ୍ତୀର୍ଣ୍ଣ ଅଞ୍ଚଳ ବର୍ଷାଦିନେ ବନ୍ୟା ଏବଂ ଖରାଦିନେ ଜଳାଭାବର ସମ୍ମୁଖୀନ ହେଉଛି। ଏପରି ସ୍ଥିତିରେ ଜଳେଶ୍ୱର ବିଧାୟକ ଅଶ୍ୱିନୀ କୁମାର ପାତ୍ର ବିଧାନସଭାରେ ଏହି ଡ୍ୟାମ୍‌ର ଅଗ୍ରଗତି ଓ ପ୍ରତିବନ୍ଧକ ଦୂର କରିବା ନେଇ ସରକାରଙ୍କୁ ପ୍ରଶ୍ନ କରିବା ପରେ ପ୍ରକଳ୍ପକୁ ନେଇ ପୁଣି ଚର୍ଚ୍ଚା ଜୋର୍‌ ଧରିଛି।୧୯୭୮ ମସିହାରେ ୬,୬୬୦ କୋଟି ଟଙ୍କା ବ୍ୟୟ ଅଟକଳରେ ସୁବର୍ଣ୍ଣରେଖା ବହୁମୁଖୀ ପ୍ରକଳ୍ପ (ଏସ୍‌ଏମ୍‌ପି)ର ପରିକଳ୍ପନା କରାଯାଇଥିଲା। ଏଥିପାଇଁ ଓଡ଼ିଶା, ଝାଡ଼ଖଣ୍ଡ ଓ ପଶ୍ଚିମବଙ୍ଗ ସରକାରଙ୍କ ମଧ୍ୟରେ ତ୍ରିପାକ୍ଷିକ ଚୁକ୍ତି ହୋଇଥିଲା। ପ୍ରକଳ୍ପରେ ଇଚ୍ଛା ଡ୍ୟାମ୍‌, ଚାଣ୍ଡିଲ ବନ୍ଧ, ଗାଲୁଡିହ ବ୍ୟାରେଜ୍‌ ଓ ଖରଖାଇ ବ୍ୟାରେଜ୍‌ ସାମିଲ ରହିଛି। ଏହାର ଲକ୍ଷ୍ୟ ଥିଲା ତିନି ରାଜ୍ୟରେ ବନ୍ୟା ନିୟନ୍ତ୍ରଣ ସହ ଚାଷଜମି ଓ ଅନ୍ୟାନ୍ୟ କ୍ଷେତ୍ରକୁ ଜଳସେଚନ ସୁବିଧା ଯୋଗାଇଦେବା। ପ୍ରକଳ୍ପର ଅନ୍ୟତମ ପ୍ରମୁଖ ଅଂଶ ଇଚ୍ଛା ଡ୍ୟାମ୍‌ ଝାଡ଼ଖଣ୍ଡର ପଶ୍ଚିମ ସିଂହଭୂମି ଜିଲ୍ଲାରେ ସୁବର୍ଣ୍ଣରେଖା ନଦୀର ଉପନଦୀ ଖରଖାଇ ଉପରେ ନିର୍ମାଣ ହେବାର ଯୋଜନା ରହିଛି। ଏହାର ପ୍ରସ୍ତାବିତ ଉଚ୍ଚତା ୨୧୩ ମିଟର। ମାତ୍ର ଡ୍ୟାମ୍‌ ନିର୍ମାଣ ଦ୍ୱାରା ଅଞ୍ଚଳର ଅନେକ ଗାଁ ଜଳମଗ୍ନ ହେବା ଆଶଙ୍କା ଏହାକୁ ବିବାଦୀୟ କରିଛି। ଇଚ୍ଛା-ଖରଖାଇ ବନ୍ଧ ବିରୋଧୀ ସଂଘର ଅଭିଯୋଗ ଅନୁଯାୟୀ, ରାଜନଗର ଓ ତାନ୍ତନଗର ବ୍ଲକ୍‌ର ୧୦ଟି ଗାଁ ସମ୍ପୂର୍ଣ୍ଣ ଜଳମଗ୍ନ ହେବା ସହ ମୋଟ ୮୬ଟି ଗାଁର ପ୍ରାୟ ୧.୫ ଲକ୍ଷ ଲୋକ ପ୍ରଭାବିତ ହେବେ। ଏହି ଆଶଙ୍କାକୁ ନେଇ ସଂଘ ଦୀର୍ଘଦିନ ଧରି ପ୍ରକଳ୍ପକୁ ବିରୋଧ କରିଆସୁଛି। ଫଳରେ ୧ ହଜାର କୋଟି ଟଙ୍କାରୁ ଊର୍ଦ୍ଧ୍ୱ ବ୍ୟୟରେ ଡ୍ୟାମ୍‌ର ମାଟିବନ୍ଧ ଓ ଡାଇକ୍‌ ନିର୍ମାଣ ସରିଥିଲେ ସୁଦ୍ଧା ସ୍ପିଲ୍‌ୱେ ନିର୍ମାଣ ଆଗେଇ ପାରୁନାହିଁ। ତେବେ ଏହି ପ୍ରତିବନ୍ଧକ ଦୂର କରିବାକୁ ରାଜ୍ୟ ସରକାର କ’ଣ ଉଦ୍ୟମ କରୁଛନ୍ତି ବୋଲି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜଳେଶ୍ୱର ବିଧାୟକ ଅଶ୍ୱିନୀ କୁମାର ପାତ୍ର ପ୍ରଶ୍ନ କରିଥିଲେ। ଏହାର ଉତ୍ତରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଥିଲେ, ଏହି ନ‌ଦୀବନ୍ଧ ସମ୍ପୂର୍ଣ୍ଣ କରିବା ପାଇଁ ଆବଶ୍ୟକ ଜମି ଅଧିଗ୍ରହଣ, ଥଇଥାନ ଏବଂ ପୁନର୍ବାସ ଯୋଜନା ପ୍ରତିବନ୍ଧକ ସାଜିଛି। ସ୍ଥାନୀୟ ଅଧିବାସୀଙ୍କର ବିକ୍ଷୋଭ ଓ ପ୍ରତିରୋଧ ଯୋଗୁଁ ଏହି କାର୍ଯ୍ୟ ଆଗେଇ ପାରୁନାହିଁ। ସମସ୍ୟାର ସମାଧାନ ପାଇଁ ଝାଡ଼ଖଣ୍ଡ ସରକାର ଏହାକୁ ଝାଡ଼ଖଣ୍ଡ ଆଦିବାସୀ ପରାମର୍ଶଦାତା କମିଟିରେ ଉପସ୍ଥାପନ କରିଛନ୍ତି। ଉକ୍ତ କମିଟିର ନିଷ୍ପତ୍ତି ଏବଂ ଅନୁମୋଦନ ପରେ ହିଁ ଇଚ୍ଛାବନ୍ଧର ନିର୍ମାଣ କାର୍ଯ୍ୟ ଆଗେଇବା ପାଇଁ ଉଦ୍ୟମ ହେବ। ତଥାପି ପ୍ରତିବର୍ଷ ଉଭୟ ରାଜ୍ୟକୁ ନେଇ ହେଉଥିବା ମିଳିତ ବୈଷୟିକ କମିଟି ବୈଠକରେ ଓଡ଼ିଶା ସରକାରଙ୍କ ପକ୍ଷରୁ ଏହି ପ୍ରସଙ୍ଗ ଉତ୍‌ଥାପନ କରାଯାଉଛି।

What's Your Reaction?

like

dislike

love

funny

angry

sad

wow

BIDYADHAR BARIK MADHU
Written by

BIDYADHAR BARIK MADHU

FOUNDER OMMTV MEDIA PVT. LTD. & KALINGA CINE ARTS FOUNDATION

Related Posts

Comments