ଚିନ୍ତା ବଢ଼ାଉଛି ଭୂସ୍ଖଳନ ବିପଦ: ଅର୍ଣ୍ଣବ’ରେ ଗଞ୍ଜାମ ଓ କନ୍ଧମାଳରେ ୧୬ ମୃତ, ‘ତିତ୍ଲି’ ବେଳେ ଗଜପତିରେ ଯାଇଥିଲା ୪୩ ଜୀବନ
ପାରଳାଖେମୁଣ୍ଡି : ‘ଅକ୍ଭାନ୍’ ପାଇଁ ଗଜପତି ଜିଲ୍ଲାରେ ଭୂସ୍ଖଳନ ଆଶଙ୍କା ବଢ଼ିଛି। ୨୦୧୮ରେ ବାତ୍ୟା ‘ତିତ୍ଲି’ ସମୟରେ ଗଜପତି ଜିଲ୍ଲାରେ ଭୟଙ୍କରଭୂସ୍ଖଳନ ଘଟିଥିଲା। ମହେନ୍ଦ୍ରଗିରି ପାହାଡ଼ିଆ ଅଞ୍ଚଳରେ ଭୂସ୍ଖଳନ ଯୋଗୁଁ ବାରଘର ଗ୍ରାମରେ ବ୍ୟାପକ କ୍ଷୟକ୍ଷତି ହୋଇଥିଲା। ଭୂସ୍ଖଳନରେ ବାରଘର ଗ୍ରାମର ୧୫ ଜଣଙ୍କ ସମେତ ଜିଲ୍ଲାରେ ୪୩ ଜଣ ପ୍ରାଣ ହରାଇଥିଲେ। ଏହି ଘଟଣା ପରେ ଗଜପତି ଜିଲ୍ଲାର ଭୂସ୍ଖଳନ ପ୍ରବଣ ଅଞ୍ଚଳ ଚର୍ଚ୍ଚାକୁ ଆସିଥିଲା। ‘ତିତ୍ଲି’ ପରେ ମଧ୍ୟ ଜିଲ୍ଲାବାସୀ ଗତ ୮ ବର୍ଷ ଭିତରେ ଭୂସ୍ଖଳନର ଭୟାବହତାକୁ ଅଙ୍ଗେ ନିଭାଇଛନ୍ତି। ଗତବର୍ଷ ଅକ୍ଟୋବର ପ୍ରଥମ ସପ୍ତାହରେ ଲଗାଣ ବର୍ଷା ସମାନ ପରିସ୍ଥିତି ସୃଷ୍ଟି କରିଥିଲା।ଗତ ମାସରେ ‘ଅର୍ଣ୍ଣବ’ ପ୍ରଭାବରେ ଅତିପ୍ରବଳ ବର୍ଷା ଗଞ୍ଜାମ ଓ କନ୍ଧମାଳ ପାଇଁ ବଡ଼ ବିପର୍ଯ୍ୟୟ ଆଣିଥିବା ବେଳେ ଦୁଇ ଜିଲ୍ଲାର ଲୋକେ ଭୂସ୍ଖଳନର ଭୟାବହତାକୁ ଦେଖିଥିଲେ। କନ୍ଧମାଳ-ଗଞ୍ଜାମ ସୀମାନ୍ତ ଭଞ୍ଜନଗର ବ୍ଲକ୍ ଗିଡ଼ିପାବାଲି ଗ୍ରାମ ସଂପୂର୍ଣ୍ଣ ଭାବେ ନିଶ୍ଚିହ୍ନ ହୋଇଯାଇଥିଲା। ୧୩ ଜଣ ନିଖୋଜ ହୋଇଯାଇଥିଲେ। ୭ ଜଣଙ୍କ ଶବ ମିଳିଲା ଓ ଆଉ ୬ ଜଣଙ୍କ ପତ୍ତା ମିଳି ନଥିଲା। ସେହିପରି କନ୍ଧମାଳ ଜିଲ୍ଲା ରାଇକିଆ ବ୍ଲକ ଡାଙ୍ଗେସିରେ ଭୟଙ୍କର ଭୂସ୍ଖଳନରେ ଗୋଟିଏ ପରିବାରର ୩ ଜଣ ପ୍ରାଣ ହରାଇଥିଲେ।ଏଭଳି ପରିସ୍ଥିତିରେ ‘ଅକ୍ଭାନ’ ଆଉ ଏକ ବିପଦ ଆଣିବାକୁ ଯାଉଛି। ଗୋପାଳପୁର ନିକଟରେ ସ୍ଥଳଭାଗ ଛୁଇଁବାର ଆକଳନ କରାଯାଉଥିବାରୁ ଉପକୂଳବର୍ତ୍ତୀ ଅଞ୍ଚଳ ସହ ପାହାଡ଼ିଆ ଜିଲ୍ଲାଗୁଡ଼ିକ ବି କ୍ଷତିଗ୍ରସ୍ତ ହେବା ଆଶଙ୍କା ରହିଛି। ତିନି ଜିଲ୍ଲାର ପ୍ରଶାସନ ପୂର୍ବାପେକ୍ଷା ପ୍ରସ୍ତୁତିକୁ ବ୍ୟାପକ କରିଥିବା ସହ ଭୂସ୍ଖଳନପ୍ରବଣ ଅଞ୍ଚଳ ଚିହ୍ନଟ କରାଯାଇଛି। ଗଜପତି ଜିଲ୍ଲାରେ ପ୍ରଥମେ ୯୮ଟି ସମ୍ଭାବ୍ୟ ଭୂସ୍ଖଳନ ପ୍ରବଣ ଅଞ୍ଚଳ ଚିହ୍ନଟ ହୋଇଥିଲା। ପରବର୍ତ୍ତୀ ସମୟରେ ଏହି ସଂଖ୍ୟା ବଢ଼ି ୧୫୫ରେ ପହଞ୍ଚିଛି।କେବଳ ଏହି ତିନି ଜିଲ୍ଲା ନୁହେଁ, ସାରା ରାଜ୍ୟରେ ଭୂସ୍ଖଳନ ଏବେ ଚିନ୍ତାଜନକ ପ୍ରସଙ୍ଗ। ବିଧାନସଭାରେ ବିଧାୟକ ଚକ୍ରମଣି କହଁରଙ୍କ ପ୍ରଶ୍ନର ଉତ୍ତରରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ରଖିଥିବା ତଥ୍ୟରୁ ଏହା ସ୍ପଷ୍ଟ ହୋଇଛି। ମନ୍ତ୍ରୀଙ୍କ ଲିଖିତ ଉତ୍ତର ଅନୁଯାୟୀ, ଚଳିତବର୍ଷ ରାଜ୍ୟର ୬ଟି ଜିଲ୍ଲାର ୯୨ଟି ସ୍ଥାନରେ ଭୂସ୍ଖଳନ ଘଟି ୧୭ଜଣଙ୍କ ମୃତ୍ୟୁ ହୋଇଛି। କନ୍ଧମାଳ ଜିଲ୍ଲା ସର୍ବାଧିକ ପ୍ରଭାବିତ ହୋଇଛି। କନ୍ଧମାଳ ଜିଲ୍ଲାର ୫୯ଟି ସ୍ଥାନରେ ଭୂସ୍ଖଳନ ଘଟିଥିବା ବେଳେ ଗଜପତିର ୧୩ଟି, କୋରାପୁଟର ୧୨ଟି, କେନ୍ଦୁଝରର ୬ଟି, ଗଞ୍ଜାମ ଓ ରାୟଗଡ଼ାର ଗୋଟିଏ ଲେଖାଏଁ ସ୍ଥାନରେ ଭୂସ୍ଖଳନ ହୋଇଛି। କେବଳ ଭୂସ୍ଖଳନ ନୁହେଁ, ଚଳିତବର୍ଷ ବନ୍ୟା ମଧ୍ୟ ରାଜ୍ୟରେ ବ୍ୟାପକ କ୍ଷୟକ୍ଷତି ଘଟାଇଛି। ପ୍ରତିବର୍ଷ ବର୍ଷାଋତୁ ପରେ ପାହାଡ଼ ଧୀରେ ଧୀରେ ଦୁର୍ବଳ ହେଉଛି। ଥରେ ଯେଉଁଠି ଭୂସ୍ଖଳନ ହେଉଛି, ସେଠାରେ ବାରମ୍ବାର ଭୂସ୍ଖଳନର ସମ୍ଭାବନା ଅଧିକ ରହୁଛି।









Comments