ଶୋକସଭାରୁ ଘରକୁ ଫେରୁଥିଲେ ମହିଳା; ସାବେରୀ ନଦୀରେ ଡଙ୍ଗାବୁଡ଼ି ହରାଇଲେ ଜୀବନ
ମାଲକାନଗିରି: ଶୋକସଭାରେ ଯୋଗଦେଇ ଘରକୁ ଫେରୁଥିବା ବେଳେ ସାବେରୀ ନଦୀରେ ଡଙ୍ଗା ବୁଡ଼ିଯିବା ଫଳରେ ଜଣେ ମହିଳାଙ୍କ ମୃତ୍ୟୁ ଘଟିଛି। ଏହି ଦୁଃଖଦ ଘଟଣା ମାଲକାନଗିରି ଜିଲ୍ଲା ମାଥିଲି ବ୍ଲକର ମେକା ପଞ୍ଚାୟତ ଅନ୍ତର୍ଗତ ରାଣୀଗୁଡ଼ା ନଦୀଘାଟରେ ଘଟିଛି। ସୂଚନା ଅନୁଯାୟୀ ରାଣୀଗୁଡ଼ା ଗ୍ରାମର ତିନିଜଣ ମହିଳା ଗତକାଲି ସାବେରୀ ନଦୀର ଅପରପାର୍ଶ୍ୱରେ ଥିବା ମେକା ପଞ୍ଚାୟତର ମାନ୍ଦାପାଲି ଗ୍ରାମକୁ ଏକ ଶୋକସଭାରେ ଯୋଗଦେବାକୁ ଦେଶୀ ଡଙ୍ଗାରେ ଯାଇଥିଲେ। ଶୋକସଭାରେ ଯୋଗଦେଇ ଫେରିବା ସମୟରେ ରାଣୀଗୁଡ଼ା ନଦୀଘାଟ ନିକଟରେ ଡଙ୍ଗାଟି ହଠାତ୍ ବୁଡ଼ିଯାଇଥିଲା। ଡଙ୍ଗାରେ ଥିବା ତିନିଜଣ ମହିଳା ପାଣିରେ ବୁଡି ଯାଇଥିଲେ। କିନ୍ତୁ ସେମାନଙ୍କ ମଧ୍ୟରୁ ଦୁଇଜଣ ମହିଳା ପହଁରି ପହଁରି ନଦୀକୂଳକୁ ଆସି ନିଜ ଜୀବନ ବଞ୍ଚାଇବାରେ ସଫଳ ହୋଇଥିବା ବେଳେ ଅନ୍ୟ ଜଣେ ମହିଳା ନଦୀରେ ନିଖୋଜ ହୋଇଯାଇଥିଲେ। ନିଖୋଜ ମହିଳାଙ୍କ ନାମ ମନିମା ଭୂମିକା ବୋଲି ଜଣାପଡ଼ିଛି। ଘଟଣା ପରେ ଖବର ପାଇ ମାଥିଲି ଦମକଳ ବାହିନୀ ନଦୀରେ ଖୋଜାଖୋଜି ଆରମ୍ଭ କରିଥିଲା। ପ୍ରାୟ ୫ରୁ ୬ ଘଣ୍ଟାର ଅକ୍ଳାନ୍ତ ଉଦ୍ଧାର ଅଭିଯାନ ପରେ ନିଖୋଜ ମହିଳାଙ୍କ ମୃତଦେହ ନଦୀରୁ ଉଦ୍ଧାର କରାଯାଇଥିଲା। ଘଟଣାସ୍ଥଳରେ ପୁଲିସ ପହଞ୍ଚି ମୃତଦେହ ଜବତ କରିବା ସହ ଶବ ବ୍ୟବଚ୍ଛେଦ ପାଇଁ ପଠାଇଥିଲା। ଏହି ଦୁଃଖଦ ଘଟଣାରେ ରାଣୀଗୁଡ଼ା ଗ୍ରାମରେ ଶୋକର ଛାୟା ଖେଳିଯାଇଛି। ଶୋକସଭାରୁ ଫେରିବା ବେଳେ ଘଟିଥିବା ଏହି ଅକାଳ ଦୁର୍ଘଟଣା ସମଗ୍ର ଅଞ୍ଚଳକୁ ମର୍ମାହତ କରିଛି।









Comments