୪୦,୦୦୦ ଟଙ୍କା ବିଲ୍ ପାଇଁ ୭ ହଜାର ନେଉଥିଲେ ସରକାରୀ କର୍ମଚାରୀ; ୮.୯୭ ଲକ୍ଷ ଠକିଥିଲେ ପୂର୍ବତନ ପିଇଓ!
ଭୁବନେଶ୍ବର: ସରକାରୀ କର୍ମଚାରୀ ନିଜ କର୍ତ୍ତବ୍ୟରୁ ଓହରି କିଭଳି ଭାବେ ଦୁର୍ନୀତିରେ ଜଡ଼ିତ ରହୁଛନ୍ତି, ତାହାର ଏକ ପର୍ଦ୍ଦାଫାସ କରିଛି ଓଡ଼ିଶା ଭିଜିଲାନ୍ସ। ପ୍ରଧାନମନ୍ତ୍ରୀ ଆବାସ ଯୋଜନାରେ ବିଲ୍ କରାଇ ଦେବାକୁ କହି ୭୦୦୦ ଟଙ୍କା ଲାଞ୍ଚ ନେଉଥିବା ବେଳେ କଳାହାଣ୍ଡିଜିଲ୍ଲା ଜୁନାଗଡ଼ ବିଜ୍ଞାପିତ ଅଞ୍ଚଳ ପରିଷଦ (ଏନ୍ଏସି)ର କର୍ମଚାରୀ ପ୍ରଦ୍ୟୁମ୍ନ କୁମାର ଦାସ ଭିଜିଲାନ୍ସ ହାତରେ ଧରାପଡ଼ିଛନ୍ତି। ସେହିପରି ବାର୍ଦ୍ଧକ୍ୟ ଭତ୍ତା ଠକେଇ ମାମଲାରେ କୋରାପୁଟ ଜିଲ୍ଲା ଖୁର୍ଜି ଗ୍ରାମପଞ୍ଚାୟତର ପୂର୍ବତନ ପଞ୍ଚାୟତ ନିର୍ବାହୀ ଅଧିକାରୀ ଆଦିତ୍ୟ ଚୋପାଡ଼ିଙ୍କୁ ଭିଜିଲାନ୍ସ ବିଭାଗ ଗିରଫ କରିଛି। ଭିଜିଲାନ୍ସ ବିଭାଗ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତି ଅନୁସାରେ ଜୁନାଗଡ଼ ଅଞ୍ଚଳର ଜଣେ ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଏକ ଗୃହ ମିଳିଥିଲା। ଏହି ଗୃହ ନିର୍ମାଣ ପାଇଁ ୨,୦୦,୦୦୦ ଟଙ୍କା ମଞ୍ଜୁରୀ ହୋଇଥିଲା। ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟରେ ପୂର୍ବରୁ ୧,୬୦,୦୦୦ ଟଙ୍କା ଜମା ହୋଇସାରିଥିଲା। ତେବେ ସେ ୪୦,୦୦୦ ଟଙ୍କା ପାଇବା ପାଇଁ ବାରମ୍ବାର ଏନ୍ଏସି କାର୍ଯ୍ୟାଳୟକୁ ଦୌଡୁଥିଲେ। ତେବେ ଏହି ଟଙ୍କା ପାଇଁ ଶ୍ରୀ ଦାସ ୭ ହଜାର ଟଙ୍କା ଲାଞ୍ଚ ମାଗିଥିଲେ। ଆଜି ଶ୍ରୀ ଦାସ ଏହି ଟଙ୍କା ଲାଞ୍ଚ ନେଉଥିଲା ବେଳେ ପୂର୍ବ ଯୋଜନା ଅନୁସାରେ ଭିଜିଲାନ୍ସ ବିଭାଗର କର୍ମଚାରୀମାନେ ଅତର୍କିତ ଚଢ଼ାଉ କରିଥିଲେ। ଘଟଣାସ୍ଥଳରୁ ଲାଞ୍ଚରେ ବ୍ୟବହାର ହୋଇଥିବା ଟଙ୍କା ଜବତ ହୋଇଥିଲା। କୋରାପୁଟ ଭିଜିଲାନ୍ସ ପକ୍ଷରୁ ଏକ ମାମଲା ରୁଜୁ କରାଯାଇଛି। ଘଟଣାର ଅଧିକ ତଦନ୍ତ ଜାରି ରହିଛି। ସେହିପରି ଭିଜିଲାନ୍ସ ବିଭାଗ ଜଣେ ଠକ ସରକାରୀ କର୍ମଚାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେଇଛି। କୋରାପୁଟ ଜିଲ୍ଲା ନନ୍ଦପୁର ବ୍ଲକ ଅଧୀନ ଖୁର୍ଜି ପଞ୍ଚାୟତରେ ଶ୍ରୀ ଚୋପାଡ଼ି ଅବସ୍ଥାପିତ ଥିଲେ। ଆର୍ଥିକ ବର୍ଷ ୨୦୨୩-୨୪ ଏବଂ ୨୦୨୪-୨୫ରେ ସେ ବାର୍ଦ୍ଧକ୍ୟ ଭତ୍ତା ଯୋଜନାରୁ ୮ ଲକ୍ଷ ୯୭ ହଜାର ଟଙ୍କା ହଡ଼ପ କରିଥିବା ନେଇ ଅଭିଯୋଗ ଆସିଥିଲା। ଅଭିଯୋଗ ପରେ ଘଟଣାର ତଦନ୍ତ ହୋଇଥିଲା। ଶେଷରେ ଭିଜିଲାନ୍ସ ବିଭାଗ କାର୍ଯ୍ୟାନୁଷ୍ଠାନ ନେଇଛି।









Comments