ଓଡ଼ିଶା-ଛତିଶଗଡ଼ ସୀମାନ୍ତରେ ମାଓବାଦୀ ଡମ୍ପ ଠାବ, ୨ ଲଞ୍ଚର ଓ ୩୬ଟି ଗୁଳି ଜବତ
ମାଲକାନଗିରି: ନକ୍ସଲ ବିରୋଧୀ ଅଭିଯାନରେ ପୁଲିସ ଓ କୋବ୍ରା ବାହିନୀକୁ ଏକ ବଡ଼ ସଫଳତା। ଓଡ଼ିଶାର ମାଲକାନଗିରି ସୀମାନ୍ତ ଛତିଶଗଡ଼ର ବିଜାପୁର ଜିଲ୍ଲାର ପାମେଡ଼ ଥାନା ଅନ୍ତର୍ଗତ ଜିଡ଼ପଲ୍ଲୀ ଜଙ୍ଗଲରେ ସର୍ଚ୍ଚ ଅଭିଯାନ ସମୟରେ ମାଓବାଦୀଙ୍କ ଏକ ଡମ୍ପ ଠାବ କରାଯାଇଛି। ମିଳିଥିବା ସୂଚନାରେ, ଗତକାଲି (ଗୁରୁବାର) ଚାଲିଥିବା ଅଭିଯାନରେ ୨ଟି ବିଜିଏଲ୍ ଲଞ୍ଚର ଓ ୩୬ଟି ବିଜିଏଲ୍ ସେଲ୍ ସମେତ ବିପୁଳ ସାମଗ୍ରୀ ଜବତ ହୋଇଛି। ନକ୍ସଲ (ମାଓବାଦୀ)ମାନେ ଜଙ୍ଗଲରେ ଡମ୍ପ ଲୁଚାଇ ରଖିଥିବା ନେଇ ପୁଲିସକୁ ଗୁପ୍ତ ସୂଚନା ମିଳିଥିଲା।ଏହି ସୂଚନା ଆଧାରରେ ପାମେଡ଼ ଥାନା ପୁଲିସ ଓ କୋବ୍ରା ୨୦୮ତମ ବାହିନୀର ମିଳିତ ଟିମ୍ ଅଞ୍ଚଳରେ ସର୍ଚ୍ଚ ଅଭିଯାନ ଆରମ୍ଭ କରିଥିଲେ। ଜଙ୍ଗଲ ଭିତରେ ଯାଞ୍ଚ ସମୟରେ ପୂର୍ବରୁ ନକ୍ସଲମାନେ ଲୁଚାଇ ରଖିଥିବା ଡମ୍ପର ସନ୍ଧାନ ମିଳିଥିଲା। ଅଭିଯାନ ସମୟରେ ସୁରକ୍ଷାକର୍ମୀ ୨ଟି ବିଜିଏଲ୍ ଲଞ୍ଚର ଓ ୩୬ଟି ବିଜିଏଲ୍ ସେଲ୍ ଜବତ କରିଛନ୍ତି। ଜବତ ସାମଗ୍ରୀକୁ ନେଇ ପୁଲିସ ପକ୍ଷରୁ ତଦନ୍ତ ଜାରି ରହିଥିବା କୁହାଯାଇଛି। ବିଜାପୁର ଏସ୍ପି ଉମେଶ କୁମାର ଗୁପ୍ତା ଏହି ଜବତକୁ ନେଇ ସ୍ପଷ୍ଟୀକରଣ ଦେଇଛନ୍ତି। ସେ ସାଧାରଣ ଲୋକଙ୍କୁ ଆହ୍ୱାନ କରି କହିଛନ୍ତି ଯେ କୌଣସି ସନ୍ଦିଗ୍ଧ ବସ୍ତୁ କିମ୍ବା ବିସ୍ଫୋରକ ସାମଗ୍ରୀ ଦେଖିଲେ ତାହାକୁ ଛୁଇଁବା ନାହିଁ। ତୁରନ୍ତ ନିକଟସ୍ଥ ଥାନା କିମ୍ବା ସୁରକ୍ଷା କ୍ୟାମ୍ପକୁ ସୂଚନା ଦେବାକୁ ସେ ଅନୁରୋଧ କରିଛନ୍ତି।









Comments