ତାମିଲନାଡ଼ୁରେ ପୁଣି ଜଣେ ଓଡ଼ିଆ ଶ୍ରମିକଙ୍କ ମୃତ୍ୟୁ
ସବଡେଗା: ସୁନ୍ଦରଗଡ଼ ଜିଲ୍ଲା ତଳସରା ଅଞ୍ଚଳକୁ ଗୋଟିଏ ପରେ ଗୋଟିଏ ଦାଦନ ଶ୍ରମିକ ମୃତଦେହ ଫେରିବା ଆଲୋଡ଼ନ ସୃଷ୍ଟି କରିଛି। କିଛି ଦିନ ତଳେ ବାଲିଶଙ୍କରା ଅଞ୍ଚଳର ଜଣେ ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ଶୁକ୍ରବାର ତାମିଲନାଡ଼ୁରେ ସବଡେଗା ବ୍ଳକ୍ ଡମକୁଡ଼ା ଗାଁର ସଂଜୟ ସାହୁଙ୍କ ପୁଅ ଦୀପକ ସାହୁ (୨୫)ଙ୍କ ମୃତ୍ୟୁ ହୋଇଥିବା ଖବର ମିଳିଛି।ପରିବାର ଲୋକେ ମ୍ରିୟମାଣ ହୋଇଥିବା ବେଳେ ପୁଅର ଶବ ଗାଁକୁ ଆଣିବା ବ୍ୟବସ୍ଥା କରିବାକୁ ପ୍ରଶାସନ ନିକଟରେ ନେହୁରା ହୋଇଛନ୍ତି। ଦୀପକ କିଛି ମାସ ତଳେ ରୋଜଗାର ପାଇଁ ତାମିଲନାଡୁ ରାଜ୍ୟର ତ୍ରିପୁର ଅଞ୍ଚଳକୁ ଯାଇ ସେଠାରେ କୌଣସି ଏକ ସୂତାକଳରେ କାମ କରୁଥିଲେ। ସେଠାରେ କୌଣସି କାରଣରୁ ଦୀପକ ସାହୁଙ୍କ ମୃତ୍ୟୁ ହୋଇଯାଇଥିବାବେଳେ ସାଥିରେ ଥିବା ସାଙ୍ଗମାନେ ଘର ଲୋକଙ୍କୁ ସନ୍ଧ୍ୟାରେ ସୂଚନା ଦେଇଥିଲେ। ଘର ଲୋକେ ସେଠାରେ ଥିବା ମ୍ୟାନେଜର ଶିବ କୁମାରଙ୍କୁ ଯୋଗାଯୋଗ କରିଥିଲେ। ହେଲେ ଶିବକୁମାର ବାହରେ ମୁତ୍ୟୁ ହୋଇଥିବା କହି ଫୋନ କାଟିଦେଇଥିଲେ।ଡମକୁଡ଼ା ସମିତିସଭ୍ୟ ତଥା ପଞ୍ଚାୟତସମିତି ଉପାଧ୍ୟକ୍ଷ ସୁଶାନ୍ତ ବେହେରା ମଧ୍ୟ ସୂତାକଳ ମ୍ୟାନେଜର ଶିବକୁମାରଙ୍କୁ ଫୋନ୍ କରି ବୁଝିଥିବା ଓ ଶବ ଆଣିଦେବା ବ୍ୟବସ୍ଥା କରିବାକୁ କହିଥିଲେ। କିନ୍ତୁ ମ୍ୟାନେଜର କୌଣସି ଉତ୍ତର ଦେଇ ନଥିବା ସୂଚନା ମିଳିଛି। ପୁଅର ମୃତ୍ୟୁରେ ଭାଙ୍ଗି ପଡ଼ିଥିବା ପରିବାର ମୃତଦେହକୁ ଡମକୁଡ଼ା ଆଣିଦେବାକୁ ଗୁହାରି କରିଛନ୍ତି।









Comments