ସାଇବର ରୢାକେଟ୍ର ପର୍ଦ୍ଦାଫାସ: ୩୨ଟି ଠକେଇ, ପଶ୍ଚିମବଙ୍ଗର ୧୬ ଗିରଫ
ଭୁବନେଶ୍ବର: ଚୋରି ମୋବାଇଲକୁ ବ୍ୟବହାର କରି ବ୍ୟାଙ୍କ ଆକାଉଣ୍ଟରୁ ଟଙ୍କା ଲୁଟୁଥିଲେ। ଏଭଳି ୩୨ ଥରରେ ୯ଲକ୍ଷ ଟଙ୍କା ହଡ଼ପ କରିଥିଲେ। ଓଡ଼ିଶାରୁ ପଶ୍ଚିମବଙ୍ଗ ଯାଏ ଚେର ଲମ୍ବିଥିବା ଏଭଳି ଏକ ସାଇବର ଠକେଇ ଗ୍ୟାଙ୍ଗର ପର୍ଦ୍ଦାଫାସ କରିଛି କମିସନରେଟ୍ ପୁଲିସ। ପଶ୍ଚିମବଙ୍ଗ ପୁଲିସ ପାହାଳ ଥାନା ପୁଲିସ ସହାୟତାରେ ପାହଳ ଅଞ୍ଚଳରୁ ୩ ମହିଳାଙ୍କ ସମେତ ୧୬ ଠକଙ୍କୁ ଗିରଫ କରିଛି। ସେମାନେ ହେଲେ ପଶ୍ଚିମବଙ୍ଗ ଅଞ୍ଚଳର ଅବଦୁଲ ଇର୍ସାଦ (୩୦), ତଞ୍ଜିଲ ଅଲ୍ଲୀ (୨୬), ସେକ୍ ନିୟାଜ (୨୬), ଇରଫାନ୍ ହୁସେନ୍ (୩୭), ଓକାଶ-ଉର୍ ରହମାନ (୨୫), ଆଦନାନ୍ ଅଲ୍ଲୀ (୨୬), ବିଜୟ କୁମାର ଦାସ (୨୭), ନସିମ ଆକ୍ରମ ଖାନ୍ (୩୦), ମହମ୍ମଦ ଅଲ୍ଲୀ ଅହମ୍ମଦ (୨୫), ସନ୍ଦୀପ ବାରିକ (୨୦), ସୋନୁ ଶାହ (୨୬), କେତନ ରାଣା (୨୩), ଅସର ଅଞ୍ଜୁମ ଖାନ୍ (୨୫), ପିନାଲି ଧର (୨୫), ଫଲକ କୈନାଥ (୨୩) ଓ ଅଶରୀ ଇମାମ (୨୮)। ସେମାନଙ୍କଠାରୁ ୭ଟି ଲାପ୍ଟପ୍, ୨ଟି କାର୍ ଓ ୧୫ଟି ମୋବାଇଲ୍ ଫୋନ୍ ଜବତ କରାଯାଇଛି।ସୂଚନା ମୁତାବକ, ଗତ ୨୦୨୫ ମେ ୧୪ ତାରିଖରେ ପଶ୍ଚିମବଙ୍ଗର ରାଜାରହାଟ ଥାନା ଅଞ୍ଚଳର ବାସିନ୍ଦା ସୌମିତ୍ର ମଣ୍ଡଳଙ୍କ ମୋବାଇଲ୍ ଫୋନ୍ ହଜିଯାଇଥିଲା। ଏହା ପରେ ତାଙ୍କ ଷ୍ଟେଟ୍ ବ୍ୟାଙ୍କ ଓ ଆଇସିଆଇସିଆଇ ବ୍ୟାଙ୍କ ଆକାଉଣ୍ଟରୁ ୩୨ଟି ବେଆଇନ୍ ଅର୍ଥ କାରବାର ହୋଇଥିବା ସେ ଜାଣିବାକୁ ପାଇଥିଲେ। ୩୨ ଥର ଆର୍ଥିକ କାରବାରରେ ଠକମାନେ ୯ଲକ୍ଷ ଟଙ୍କା ଉଠାଇ ନେଇଥିଲେ। ଏ ନେଇ ସେ ରାଜାରହାଟ ଥାନାରେ ଅଭିଯୋଗ ପରେ ପୁଲିସ ବିଏନ୍ଏସ୍ର ଧାରା ୩୧୬(୨) ଓ ୩୧୮(୪)ରେ ମାମଲା ରୁଜୁ କରି ତଦନ୍ତ ଚଳାଇଥିଲା। ତଦନ୍ତରୁ ପଶ୍ଚିମବଙ୍ଗ ପୁଲିସ ଜାଣିବାକୁ ପାଇଲା, ଠକମାନେ ଭୁବନେଶ୍ବରରେ ଲୁଚିଛନ୍ତି। ଗ୍ୟାଙ୍ଗକୁ ଠାବ ପାଇଁ ପଶ୍ଚିମବଙ୍ଗ ପୁଲିସ ଭୁବନେଶ୍ବର କମିସନରେଟ୍ ପୁଲିସ ସହ ଯୋଗାଯୋଗ କରିଥିଲା। ୧୮ ତାରିଖ ବିଳମ୍ବିତ ରାତି ପ୍ରାୟ ୧ଟାରେ ପଶ୍ଚିମବଙ୍ଗ ପୁଲିସ ଟିମ୍ ପାହାଳ ଥାନାରେ ପହଞ୍ଚି ଚଢ଼ଉ ପାଇଁ ସହଯୋଗ ଲୋଡ଼ିଥିଲା। ଯୋଜନା ମୁତାବକ ପାହାଳ ଥାନା ପୁଲିସ ସହଯୋଗରେ ପଶ୍ଚିମବଙ୍ଗ ପୁଲିସ ସନ୍ଦିଗ୍ଧଙ୍କ ଭଡ଼ାଘରେ ଚଢ଼ଉ କରି ସେଠାରୁ ୧୬ ଜଣଙ୍କୁ କାବୁ କରିଥିଲା। ପରେ ସେମାନଙ୍କୁ ସ୍ଥାନୀୟ କୋର୍ଟରେ ହାଜର କରାଯାଇ ପଶ୍ଚିମବଙ୍ଗକୁ ଟ୍ରାଞ୍ଜିଟ୍ ରିମାଣ୍ଡରେ ନିଆଯାଇଛି।ତଦନ୍ତରୁ ଜଣାପଡ଼ିଛି, ଏହି ସାଇବର ଠକେଇ ଗ୍ୟାଙ୍ଗ ପାଖାପାଖି ମାସେ ହେବ ପାହାଳ ଅଞ୍ଚଳର ଏକ ଥ୍ରି ବିଏଚ୍କେ ଫ୍ଲାଟ୍ ଭଡ଼ା ନେଇଥିଲେ। ଘର ମାଲିକଙ୍କୁ ଭୂଆଁ ବୁଲାଇ କହିଥିଲେ ଯେ ସେମାନେ ଏଠାରେ ଏକ ପ୍ରାଇଭେଟ୍ ଲିମିଟେଡ୍ ସଂସ୍ଥା ଖୋଲିବେ। ଏଥିପାଇଁ ସେମାନଙ୍କ କର୍ମଚାରୀ ଏଠାରେ ରହିବେ। ମାଲିକଙ୍କୁ ଫସାଇବା ପରେ ଠକମାନେ ବେଫିକର ହୋଇ ସେଠାରେ ରହିଥିଲେ। ଠକେଇ ଟଙ୍କାରେ ରାଜଧାନୀ ଓ ଆଖପାଖ ପର୍ଯ୍ୟଟନସ୍ଥଳୀ ବୁଲି ମଉଜ କରୁଥିଲେ। ସ୍ବତନ୍ତ୍ର ରୋଷେୟା ମଧ୍ୟ ନିଯୁକ୍ତି ଦେଇଥିଲେ।









Comments