କ୍ଷୟକ୍ଷତି ହୋଇଥିଲେ ବାତ୍ୟା ଅର୍ଣ୍ଣବ ଭଳି କ୍ଷତିପୂରଣ ମିଳିବ: ରାଜସ୍ବ ମନ୍ତ୍ରୀ
ଭୁବନେଶ୍ବର: ବାତ୍ୟା ‘ଅକଭାନ୍’ର ବିଶେଷ ପ୍ରଭାବ ପଡ଼ିନି। ତଥାପି ଆଗାମୀ ୨୪ ଘଣ୍ଟା ଆମ ପାଇଁ ଗୁରୁତ୍ବପୂର୍ଣ୍ଣ। ୨୪ ଘଣ୍ଟା ପରେ ସ୍ଥିତି ଧୀରେଧୀରେ ସ୍ବାଭାବିକ ହେବ। କିଛି କିଛି ସ୍ଥାନରୁ ଭୂସ୍ଖଳନ ରିପୋର୍ଟ ଆସିଛି। ଅଗ୍ନିଶମ, ଏନ୍ଡିଆର୍ଏଫ୍, ଓଡ୍ରାଫ ଟିମ୍ ତୁରନ୍ତ ସମସ୍ୟା ଦୂର କରିଛନ୍ତି। ଖୁବ୍ଶୀଘ୍ର କ୍ଷୟକ୍ଷତି ଆକଳନ ହେବ। ଯଦି କେଉଁଠି କ୍ଷୟକ୍ଷତି ହୋଇଥିବ ତେବେ ବାତ୍ୟା ଅର୍ଣ୍ଣବ ପାଇଁ ମୁଖ୍ୟମନ୍ତ୍ରୀ ଯେଉଁଭଳି ପ୍ୟାକେଜ୍ ଘୋଷଣା କରିଥିଲେ େସହି ଆଧାରରେ କ୍ଷତିପୂରଣ ଦିଆଯିବ। ଆଜି ଏସ୍ଆର୍ସିଙ୍କ କାର୍ଯ୍ୟାଳୟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସହ ବାତ୍ୟା ସ୍ଥିତି ସମୀକ୍ଷା କରିବା ପରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଏହି ସୂଚନା ଦେଇଛନ୍ତି।ମନ୍ତ୍ରୀ ଶ୍ରୀ ପୂଜାରୀ କହିଛନ୍ତି ଯେ ବାତ୍ୟାରେ ଯେପରି ଶୂନ ମୃତାହତ ହେବ ତାହାକୁ ନଜରରେ ରଖି ଆମେ ସମସ୍ତ ପ୍ରକାରର ପ୍ରସ୍ତୁତି କରିଥିଲୁ। ବାତ୍ୟା ଗୋପାଳପୁର ନିକଟରେ ସ୍ଥଳଭାଗ ଅତିକ୍ରମ କରିବା ପରେ ଉତ୍ତର ଓ ଉତ୍ତର-ପଶ୍ଚିମ ଦିଗକୁ ଅଗ୍ରସର ହୋଇଛି। ଏହା ନୟାଗଡ଼, ଅନୁଗୁଳ ଓ ସମ୍ବଲପୁର ଦେଇ ଝାଡ଼ଖଣ୍ଡ ଆଡ଼କୁ ଗତି କରିବାର ଆକଳନ କରାଯାଇଛି। ଓଡ଼ିଶା ଅତିକ୍ରମ କରିବା ସମୟରେ ପବନର ବେଗ ଘଣ୍ଟାପ୍ରତି ୫୫-୬୫ କିଲୋମିଟର ରହିଥିବା ବେଳେ ଏହା କ୍ରମଶଃ ଦୁର୍ବଳ ହୋଇ ଡିପ୍ ଡିପ୍ରେସନ୍ ଏବଂ ପରେ ଡିପ୍ରେସନରେ ପରିଣତ ହୋଇଛି। ଆସନ୍ତା ୨୪ ଘଣ୍ଟାରେ ମୟୂରଭଞ୍ଜ ଓ ବାଲେଶ୍ୱରରେ ଅଧିକ ବର୍ଷା ହେବାର ଆକଳନ ରହିଛି। ଏହାର ପ୍ରଭାବ ଯାଜପୁର, ଭଦ୍ରକ, କେନ୍ଦ୍ରାପଡ଼ା ଓ ଜଗତସିଂହପୁର ଜିଲ୍ଲାରେ ମଧ୍ୟ ଅନୁଭୂତ ହୋଇପାରେ। ତେଣୁ ନଦୀ ଜଳସ୍ତର ଉପରେ ନିରନ୍ତର ନଜର ରଖାଯାଇଛି। ସେହିପରି ଝାଡ଼ଖଣ୍ଡରେ ମଧ୍ୟ ବର୍ଷାର ସମ୍ଭାବନା ଥିବାରୁ ସେଠାକାର ଜଳସମ୍ପଦ ବିଭାଗର ସଚିବଙ୍କ ସହ ରାଜ୍ୟ ସରକାର ଯୋଗାଯୋଗ କରିଛନ୍ତି। ଝାଡ଼ଖଣ୍ଡରେ ଡ୍ୟାମ୍ଗୁଡ଼ିକରେ ପର୍ଯ୍ୟାପ୍ତ ଜଳଧାରଣ କ୍ଷମତା ଉପଲବ୍ଧ ଥିବାରୁ ଆବଶ୍ୟକ ଜଳ ସଂରକ୍ଷଣ କରାଯିବ ଏବଂ ଅତିରିକ୍ତ ଜଳ ଛଡ଼ାଯିବ ନାହିଁ ବୋଲି ସେଠାକାର କର୍ତ୍ତୃପକ୍ଷ ଆଶ୍ୱାସନା ଦେଇଛନ୍ତି।ଅପରପକ୍ଷେ ବାତ୍ୟାରେ ୨୦ଟି ଜିଲ୍ଲାର ୬,୨୦୧ଟି ସ୍ଥାନ ସବୁଠୁ ଅଧିକ ପ୍ରଭାବିତ, ମୋଟ୍ ୧୯୭ଟି ବ୍ଲକ, ୫୬ଟି ପୌରାଞ୍ଚଳ ପ୍ରଭାବିତ ହେବ ବୋଲି ଚିହ୍ନଟ କରି ପ୍ରତିଷେଧମୂଳକ ପଦକ୍ଷେପ ନେଇଥିଲୁ। ବାତ୍ୟା ଲାଗି ମୋଟ୍ ୪,୪୦,୪୬୧ ଜଣ ଲୋକ ସ୍ଥାନାନ୍ତରିତ ହୋଇଛନ୍ତି। ୧୫ରୁ ୨୦ଟି ସ୍ଥାନରେ ଗଛ ଡାଳ ପଡ଼ିଥିଲା ସେଗୁଡ଼ିକୁ ତୁରନ୍ତ ହଟାଯାଇଛି। ଏବେବି ୩୬୫୩ଟି ଆଶ୍ରୟ ସ୍ଥଳ କାର୍ଯ୍ୟକ୍ଷମ ଅଛି। ୧୨୩୦୫ ଜଣ ଆସନ୍ନପ୍ରସବା ମହିଳାଙ୍କ ମଧ୍ୟରୁ ୫୬୭୪ ଜଣ ମହିଳାଙ୍କୁ ସ୍ଥାନାନ୍ତରଣ କରାଯାଇଥିଲା। ତନ୍ମଧ୍ୟରୁ ୨୩୧୬ ଜଣଙ୍କର ନିରାପଦ ପ୍ରସବ ହୋଇଛି। ଉଭୟ ମା’ ଓ ନବଜାତ ସମସ୍ତେ ଶିଶୁ ସୁସ୍ଥ ଅଛନ୍ତି। ଅକଭାନ୍ ପ୍ରଭାବରେ ରାଜ୍ୟର ବହୁ ସ୍ଥାନରେ ବର୍ଷା ହୋଇଥିବାରୁ ଯେପରି ହଠାତ୍ ବନ୍ୟା ସ୍ଥିତି ନଉପୁଜେ ସେଥିପାଇଁ ଜଳସମ୍ପଦ ବିଭାଗ ପ୍ରମୁଖ ସଚିବ ଶୁଭା ଶର୍ମା ସ୍ଥିତି ସମୀକ୍ଷା କରିଛନ୍ତି। ଆଜି ଏକ ସମୀକ୍ଷା ବୈଠକରେ ସମସ୍ତ ମୁଖ୍ୟ ଯନ୍ତ୍ରୀ ତଥା ଅବବାହିକା ପରିଚାଳକଙ୍କଠାରୁ ନିଜ ନିଜ ଅବବାହିକାରେ ହୋଇଥିବା ବର୍ଷା, ଜଳଭଣ୍ଡାରଗୁଡ଼ିକର ଜଳସ୍ତର, ଜଳ ପ୍ରବେଶ ଓ ନିଷ୍କାସନର ସ୍ଥିତି ଏବଂ ପ୍ରମୁଖ ଜଳ ଭିତ୍ତିଭୂମିର କାର୍ଯ୍ୟକ୍ଷମ ସ୍ଥିତି ସମ୍ପର୍କରେ ତଥ୍ୟ ନେଇଛନ୍ତି। ଆସନ୍ତା ୨୪ଘଣ୍ଟା ପର୍ଯ୍ୟନ୍ତ ସମସ୍ତ ଜଳଭଣ୍ଡାର ଉପରେ ତୀକ୍ଷଣ ନଜର ରଖିବାକୁ କୁହାଯାଇଛି।









Comments