ବର୍ଷକରେ ବିଗିଡ଼ିଗଲା ଟ୍ରାଫିକ୍ ଏଡ୍ପୋଷ୍ଟ: କବାଟ ଝରକା ଭାଙ୍ଗି ଲୁଟିନେଲେ ଫ୍ୟାନ୍, ଲାଇଟ୍
ଭୁବନେଶ୍ୱର: ଟ୍ରାଫିକ୍ ପୁଲିସ କର୍ମଚାରୀଙ୍କ ବିଭିନ୍ନ ମୌଳିକ ଆବଶ୍ୟକତାକୁ ଦୃଷ୍ଟିରେ ରଖି ରାଜଧାନୀର ପ୍ରମୁଖ ଛକଗୁଡ଼ିକରେ ଟ୍ରାଫିକ୍ ଏଡ୍ପୋଷ୍ଟ ନିର୍ମାଣ କରାଯାଇଥିଲା। ୨୨ଟି ପୋଷ୍ଟ ନିର୍ମାଣ ପାଇଁ ବିଡିଏ ପକ୍ଷରୁ ୨କୋଟି ୬୦ ଲକ୍ଷ ଟଙ୍କା ଖର୍ଚ୍ଚ କରାଯାଇଥିଲା। ଖରା, ବର୍ଷାରେ ଟ୍ରାଫିକ୍ ଛକରେ ଠିଆ ହେଉଥିବା ପୁଲିସ କର୍ମଚାରୀଙ୍କୁ ସାମୟିକ ବିଶ୍ରାମ ସହ ଶୌଚ ଆଦି ମୌଳିକ ସୁବିଧା ଯୋଗାଇ ଦେବା ଭଳି ମହତ ଉଦ୍ଦେଶ୍ୟରେ ଏହି ପ୍ରକଳ୍ପ କରାଯାଇଥିଲା। ମାତ୍ର ପରିତାପର କଥା ବର୍ଷକ ଭିତରେ ଏହି ପ୍ରକଳ୍ପ ଅକାମି ହୋଇପଡ଼ିଛି। ପରିଚାଳନାଗତ ତ୍ରୁଟିରୁ ସବୁ ଟ୍ରାଫିକ୍ ଏଡ୍ପୋଷ୍ଟ ଅଚଳ ଅବସ୍ଥାରେ ପଡ଼ିଛି। ଏହି ମଉକାରେ ଦୁର୍ବୃତ୍ତମାନେ କବାଟ ଝରକା ଭାଙ୍ଗି ଫ୍ୟାନ୍ ଓ ଲାଇଟ୍ ଚୋରି କରିନେଇଛନ୍ତି। ବଡ଼କଥା ହେଉଛି, ନିଶାଡ଼ିମାନେ ବି କିଛି ପୋଷ୍ଟକୁ କବ୍ଜା କରିନେଇଛନ୍ତି। ଆହୁରି ସଂଗିନ କଥା ହେଉଛି, ପୁଲିସ ଦଶ ଦଶଟି ଚୋରି ମାମଲା ରୁଜୁ କରିଥିଲେ ହେଁ ନା କାହାକୁ ଗିରଫ କରାଯାଇଛି ନା ଏହି ପୋଷ୍ଟଗୁଡ଼ିକର ପୁନରୁଦ୍ଧାର ପାଇଁ କିଛି ପଦକ୍ଷେପ ନିଆଯାଇଛି। ୨୦୨୩ ଅଗଷ୍ଟରେ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ) ଏହି ପ୍ରକଳ୍ପ ନିର୍ମାଣ ପାଇଁ ପ୍ରକ୍ରିୟା ଆରମ୍ଭ କରିଥିଲା। ପ୍ରଥମ ପର୍ଯ୍ୟାୟରେ ବାଣୀବିହାର, ଆଚାର୍ଯ୍ୟବିହାର ଓ ପଟିଆ ଭଳି ପ୍ରମୁଖ ଟ୍ରାଫିକ୍ ଗହଳି ଛକରେ ଏହି ପୋଷ୍ଟ ନିର୍ମାଣ କରାଯାଇଥିଲା।ପରେ ସହରର ଅନ୍ୟ ପ୍ରମୁଖ ଛକଗୁଡ଼ିକୁ ଏହି ଯୋଜନାରେ ସାମିଲ କରାଯାଇଥିଲା। ୨୦୨୫ ଫେବ୍ରୁଆରିରେ ଗୃହ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ଖଣ୍ଡଗିରି ଛକରେ ପ୍ରଥମ ଏଡ୍ପୋଷ୍ଟ ଉଦ୍ଘାଟନ କରିଥିଲେ। ଏଥିସହ ସେହିଦିନ ଅନ୍ୟ ୨୧ଟି ପୋଷ୍ଟକୁ ମଧ୍ୟ ଟ୍ରାଫିକ୍ ପୁଲିସ ବ୍ୟବହାର ପାଇଁ ଖୋଲାଯାଇଥିଲା ଏବଂ ସମସ୍ତ ୨୨ଟି ଏଡ୍ପୋଷ୍ଟକୁ କମିସନରେଟ୍ ପୁଲିସକୁ ହସ୍ତାନ୍ତର କରାଯାଇଥିଲା। କିଛି ଦିନ ପର୍ଯ୍ୟନ୍ତ ଏହା ଟ୍ରାଫିକ୍ ପୁଲିସ କର୍ମଚାରୀଙ୍କ ପାଇଁ ବେଶ୍ ଉପଯୋଗୀ ସାବ୍ୟସ୍ତ ହୋଇଥିଲା। ଶୌଚାଳୟ ଥିବାରୁ ମହିଳା ଟ୍ରାଫିକ୍ ପୁଲିସ କର୍ମଚାରୀମାନଙ୍କ ପାଇଁ ବେଶି ଉପଯୋଗୀ ଥିଲା। ଗୁରୁତ୍ବପୂର୍ଣ୍ଣ କଥା ହେଉଛି, ଏହି ସବୁ ପୋଷ୍ଟଗୁଡ଼ିକ ମଧ୍ୟ ବହୁ ସମୟରେ ସାଧାରଣ ଜନତାଙ୍କ ପାଇଁ ଉପଯୋଗୀ ଥିଲା।କୌଣସି ପଥଚାରୀ କୌଣସି ସମସ୍ୟାରେ ପଡ଼ିଲେ, ଏହି ଏଡ୍ପୋଷ୍ଟରେ ପହଞ୍ଚି ଟ୍ରାଫିକ୍ ପୁଲିସ କର୍ମଚାରୀଙ୍କ ସହଯୋଗ ପାଉଥିଲେ। କିନ୍ତୁ କିଛି ଦିନ ପରେ ପରିଚାଳନାଗତ ଅବ୍ୟବସ୍ଥା ପାଇଁ ଏହାର ବ୍ୟବହାର ବନ୍ଦ ହୋଇଗଲା। ଟ୍ରାଫିକ୍ କର୍ମଚାରୀମାନଙ୍କ କହିବା ଅନୁସାରେ କିଛି ଦିନ ପରେ ଚାବି କେଉଁଠି ରହିଲା, କିଏ ରଖିଲା, ଜଣାପଡ଼ିଲା ନାହିଁ। ତେଣୁ ବହୁ ସମୟରେ ତାଲା ପଡ଼ି ବନ୍ଦ ରହିଲା। ବ୍ୟବହାର ନ ହେବାରୁ ଧୀରେଧୀରେ ସେସବୁ ଭୂତ କୋଠରି ପାଲଟିଗଲା। ପରିତ୍ୟକ୍ତ ଅବସ୍ଥାରେ ପଡ଼ିରହିବା ଦେଖି ରାତିରେ ଦୁର୍ବୃତ୍ତମାନେ କବାଟ ଝରକା ଭାଙ୍ଗି ବଲ୍ବ, ଫ୍ୟାନ୍ ଓ ଶୌଚାଳୟର ଟ୍ୟାପ୍ ଖୋଲି ନେଇଗଲେ। ଅବ୍ୟବହୃତ ଶୌଚାଳୟରୁ ଦୁର୍ଗନ୍ଧ ବାହାରିଲା। ସ୍ଥିତି ଏମିତି ହେଲା ଯେ ନିଶାଡ଼ିମାନେ ରାତିରେ ବସି ଆସର ଜମାଇଲେ। ଏଭଳି ଏକ ଘଟଣାକ୍ରମେ ଶ୍ରୀୟା ଛକସ୍ଥିତ ପୋଷ୍ଟରୁ ଜଣେ ନିଶାଡ଼ି ଧରାପଡ଼ିଥିଲା। ଆଚାର୍ଯ୍ୟବିହାର ଛକରେ ଥିବା ଏଡ୍ ପୋଷ୍ଟ୍ରେ କବାଟ, ଝରକା ସ୍ଥାନରେ ବ୍ୟାନର୍ ବନ୍ଧା ହୋଇଛି। ଶୌଚାଳୟର ସ୍ଥିତି କଦର୍ଯ୍ୟ। ହାଉସିଂବୋର୍ଡ ଛକସ୍ଥିତ ଏଡ୍ପୋଷ୍ଟର କବାଟ, ଝରକା ଭାଙ୍ଗି ଯାଇଛି ଏବଂ ଫ୍ୟାନ୍ ଅଚଳ। ଲୋକସେବା ଭବନ ନିକଟସ୍ଥ ଏଡ୍ପୋଷ୍ଟ୍ ଅବସ୍ଥା ବି ଶୋଚନୀୟ। ଜୟଦେବବିହାର, ରାମମନ୍ଦିର, ରୁପାଲି ଛକରେ ମଧ୍ୟ ସମାନ ସ୍ଥିତି। ଏନେଇ ଟ୍ରାଫିକ୍ ଡିସିପି ଅନୁପ କାନୁନ୍ଗୋ କହିଛନ୍ତି ଯେ ଏଡ୍ପୋଷ୍ଟଗୁଡ଼ିକର ଆଧୁନିକୀକରଣ କରାଯିବା ପାଇଁ ଉଚ୍ଚସ୍ତରୀୟ ଆଲୋଚନା ହୋଇଛି।









Comments