ଘରେ ପଶିଲା ଦୂଷିତ ବର୍ଷା ପାଣି: ହଂସପାଳ ବେହାଲ
ବାଲିଅନ୍ତା ବଜାର: ବାତ୍ୟା ‘ଅକ୍ଭାନ’ ପ୍ରଭାବରେ ଦୁଇଦିନ ଧରି ଲାଗି ରହିଥିବା ବର୍ଷା ଯୋଗୁ ରାଜଧାନୀ ଉପକଣ୍ଠ ହଂସପାଳ ଅଞ୍ଚଳରେ ଜନଜୀବନ ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି। ଭୁବନେଶ୍ୱର ମହାନଗର ନିଗମ (ବିଏମ୍ସି)ର ୪ ନମ୍ବର ୱାର୍ଡ ଅନ୍ତର୍ଗତ ହଂସପାଳ ଗ୍ରାମରେ ବର୍ଷାଜଳ ଘର ଭିତରେ ପଶିବା ସହ ରାସ୍ତାଘାଟ ଜଳମଗ୍ନ ହୋଇପଡ଼ିଛି। ଅନେକ ସ୍ଥାନରେ ରାସ୍ତା ଉପରେ ପାଣି ଜମି ରହିଥିବାରୁ ଲୋକେ ଘରୁ ବାହାରିବା କଷ୍ଟକର ହୋଇପଡ଼ିଛି। ସବୁଠାରୁ ଦୟନୀୟ ସ୍ଥିତି ହେଉଛି, ବର୍ଷାଜଳ ସହ ଡ୍ରେନ୍ର ଦୂଷିତ ପାଣି ଘର ଭିତରକୁ ପଶିଛି। ଫଳରେ ଦୁର୍ଗନ୍ଧରେ ଘରେ ରହିବା ଅସମ୍ଭବ ହୋଇପଡ଼ିଛି। ଗତକାଲି ରାତିଠାରୁ ଅନେକ ପରିବାର ଘରୁ ବାହାରି ପାରିନାହାନ୍ତି। ଘର ଭିତରେ ପାଣି ପଶିଯିବାରୁ ଖଟ ଉପରେ ରାତି କାଟିବାକୁ ପଡ଼ିଛି। ଏପରିକି ଘର ଭିତରେ ପାଣି ଜମି ରହିଥିବାରୁ ସାପ ଓ ଅନ୍ୟ ବିଷାକ୍ତ ଜୀବଜନ୍ତୁଙ୍କ ଭୟ ଘାରିଛି। ଏନେଇ ବିଏମ୍ସି କର୍ତ୍ତୃପକ୍ଷଙ୍କୁ ଅବଗତ କରାଯିବା ପରେ ପାଣି ପମ୍ପ ଲଗାଯାଇ ଜଳ ନିଷ୍କାସନ କରାଯାଉଛି।ମାତ୍ର ଏହି ପ୍ରକ୍ରିୟା ଯଥେଷ୍ଟ ହେଉନଥିବାରୁ ଜଳବନ୍ଦୀ ସମସ୍ୟାରୁ ଲୋକଙ୍କୁ ମୁକ୍ତି ମିଳିପାରୁନାହିଁ। ମାତ୍ର ଦୁଇଦିନର ବର୍ଷାରେ ଏଭଳି ସ୍ଥିତି ଉପୁଜିଛି। ହରିଦାସପୁର ସ୍ୱପ୍ନେଶ୍ୱର ମନ୍ଦିର ନିକଟ ଅଞ୍ଚଳ, ବଙ୍ଗୁଆରି ସହାବାଜ ସାହି, ପାଲା ସାହି ମଧ୍ୟ ଜଳମଗ୍ନ ହୋଇଛି। ବିଏମ୍ସି କର୍ତ୍ତୃପକ୍ଷ ତୁରନ୍ତ ଜଳ ନିଷ୍କାସନ ସମସ୍ୟାର ସ୍ଥାୟୀ ସମାଧାନ କରିବା ଦିଗରେ ପଦକ୍ଷେପ ନିଅନ୍ତୁ ବୋଲି ଦାବି ହୋଇଛି। ସେହିପରି ବାଲିଅନ୍ତା ଅଣ୍ଡିଲୋ ମୁସଲମାନସାହି, ବାଲିଅନ୍ତା ତାରିଣୀ ମନ୍ଦିର ସମ୍ମୁଖ ବିଲଡିଂ, ବେଣୁପୁର ଦୁଲ୍ଲାଦେଇ, ଧୋବା ସାହି, ଲେଙ୍କା ସାହିରେ ଆଣ୍ଠୁଏ ପାଣି ଜମିବା ଫଳରେ ଯାତାୟାତ କଷ୍ଟକର ହୋଇପଡ଼ିଛି।









Comments