ଖୋଲାଖୋଲି ବିକ୍ରି ହେଉଛି ଅପମିଶ୍ରିତ ଖାଦ୍ୟ, ଚଢ଼ଉରେ ଶିଥିଳତା
ରାଉରକେଲା :ସୁନ୍ଦରଗଡ଼ ଜିଲ୍ଲାରେ ଖାଦ୍ୟ ନିରାପତ୍ତା ବିଭାଗ ଏବେ ସମ୍ପୂର୍ଣ୍ଣ ନିଷ୍କ୍ରିୟ ହୋଇପଡ଼ିଛି। ସ୍ମାର୍ଟସିଟି ରାଉରକେଲାରୁ ଜିଲ୍ଲା ମୁଖ୍ୟାଳୟ ସୁନ୍ଦରଗଡ଼ ପର୍ଯ୍ୟନ୍ତ, ସମସ୍ତ ବଜାରରେ ଅପମିଶ୍ରିତ, ନିମ୍ନମାନର ତଥା ବାସିଖାଦ୍ୟ ସାମଗ୍ରୀ ଖୋଲାଖୋଲି ବିକ୍ରି ହେଉଛି। ଏନେଇ କିନ୍ତୁ ଖାଦ୍ୟ ନିରାପତ୍ତା ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉନି। ଗତ ଦୁଇ ବର୍ଷ ମଧ୍ୟରେ ଜିଲ୍ଲାର ବିଭିନ୍ନ ଅଞ୍ଚଳରେ ମାତ୍ର ୮୭୦ଟି ଆଇନଗତ ନମୁନା ଓ ୩,୨୪୮ଟି ନୀରିକ୍ଷଣ ନମୁନା ସଂଗ୍ରହ କରାଯାଇଛି। ଅସାଧୁ ବ୍ୟବସାୟୀଙ୍କଠାରୁ ୮ ଲକ୍ଷ ୨୧ ହଜାର ଟଙ୍କା ଜରିମାନା ଆଦାୟ କରାଯାଇଛି। ଏତଦ୍ବ୍ୟତୀତ ୪୫ଟି ମାମଲା ରୁଜୁ ହୋଇଥିବା ବେଳେ ଏଥିମଧ୍ୟରୁ କେବଳ ୨୦ଟି ମାମଲାର ଆଇନଗତ କାର୍ଯ୍ୟାନୁଷ୍ଠାନ ପାଇଁ ପ୍ରକ୍ରିୟା ଆରମ୍ଭ କରାଯାଇଛି।ବିଶେଷକରି ସ୍ମାର୍ଟସିଟି ରାଉରକେଲାରେ ମହାନଗର ନିଗମ (ଆର୍ଏମ୍ସି) ଖାଦ୍ୟ ନିରାପତ୍ତା ବିଭାଗର କାର୍ଯ୍ୟକଳାପ ଅତ୍ୟନ୍ତ ନୈରାଶ୍ୟଜନକ ରହିଛି। ସହରରେ ଅପମିଶ୍ରିତ ଖାଦ୍ୟର କାରବାର ଆଶାତୀତ ବୃଦ୍ଧି ପାଇଲାଣି। କିନ୍ତୁ ଅନୁରୂପ ଭାବେ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନି। ଗତ ଦୁଇ ବର୍ଷ ମଧ୍ୟରେ ଆର୍ଏମ୍ସି ଖାଦ୍ୟ ନିରାପତ୍ତା ବିଭାଗ ପକ୍ଷରୁ ମାତ୍ର ୪୮୯ଟି ଆଇନଗତ ନମୁନା ସଂଗ୍ରହ କରାଯାଇଥିବା ବେଳେ ୧,୮୨୬ଟି ନୀରିକ୍ଷଣ ନମୁନା ସଂଗ୍ରହ କରାଯାଇଥିଲା। ଏହି ସମୟରେ ୨.୪୮ କ୍ବିଣ୍ଟାଲ ଅପମିଶ୍ରିତ ଖାଦ୍ୟ ଜବତ ହୋଇଥିବା ବେଳେ ଅସାଧୁ ଦୋକାନୀଙ୍କଠାରୁ ୨,୭୪,୧୦୦ ଟଙ୍କା ଜରିମାନା ଆଦାୟ କରାଯାଇଥିଲା। ଏହାସହ ୨୦ଟି ମାମଲା ରୁଜୁ କରାଯାଇଥିବା ଜଣାପଡ଼ିଛି। ରାଉରକେଲା ବ୍ୟତୀତ ଜିଲ୍ଲାର ଅନ୍ୟାନ୍ୟ ପୌରାଞ୍ଚଳ ଯଥା,-ସୁନ୍ଦରଗଡ଼, ରାଜଗାଙ୍ଗପୁର ଓ ବୀରମିତ୍ରପୁର ଅଞ୍ଚଳରେ ମଧ୍ୟ ସ୍ଥିତି ସମାନ ରହିଛି। ଏସବୁ ଅଞ୍ଚଳରୁ ଗତ ଦୁଇ ବର୍ଷରେ ୩୮୧ଟି ଆଇନଗତ ନମୁନା ଓ ୪୨୨ଟି ନୀରିକ୍ଷଣ ନମୁନା ସଂଗ୍ରୃହୀତ ହୋଇଥିବା ବେଳେ ୩୮ କ୍ୱିଣ୍ଟାଲ ଅପମିଶ୍ରିତ ଖାଦ୍ୟ ନଷ୍ଟ କରାଯାଇଛି। ଏହାସହ ମୋଟ୍ ୨୫ଟି ମାମଲା ରୁଜୁ ହୋଇଥିଲା। ବିଭାଗୀୟ ଚଢଉରେ ମାତ୍ରାଧିକ ଶିଥିଳତା ଓ ପାତରଅନ୍ତର ନୀତି ଯୋଗୁ, ବ୍ୟବସାୟୀ ଜନସାଧାରଣଙ୍କ ସ୍ୱାସ୍ଥ୍ୟ ସହ ଖେଳ ଖେଳୁଛନ୍ତି। ଏମାନଙ୍କ ବିରୋଧରେ ନିୟମିତ ଚଢ଼ଉ କରି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନି, ଯାହାକି ଅସାଧୁ ବ୍ୟବସାୟୀଙ୍କୁ ପରୋକ୍ଷରେ ପ୍ରୋତ୍ସାହିତ କରୁଛି। ଏନେଇ ଉଚ୍ଚ କର୍ତ୍ତୃପକ୍ଷ ଆବଶ୍ୟକ ଦୃଷ୍ଟି ଦେବା ସହ ଚଢଉକୁ ବ୍ୟାପକ କରିବାକୁ ଦାବି ହେଉଛି।









Comments