୩୬ ଆଶ୍ରୟସ୍ଥଳୀକୁ ୨୭ଶହ ସ୍ଥାନାନ୍ତରିତ
ବାଲିଅନ୍ତା ବଜାର/ବାଲିଅନ୍ତା: ସମ୍ଭାବ୍ୟ ବାତ୍ୟା ‘ଅକ୍ୱାନ୍’ର ମୁକାବିଲା ପାଇଁ ପ୍ରଶାସନିକସ୍ତରରେ ତତ୍ପରତା ପ୍ରକାଶ ପାଇଛି। ଆଜି ବାଲିଅନ୍ତା ବ୍ଲକ୍ ଅଞ୍ଚଳରେ ଥିବା ବହୁମୁଖି ବାତ୍ୟା ଆଶ୍ରୟସ୍ଥଳ ଓ ଅସ୍ଥାୟୀ କେନ୍ଦ୍ରକୁ ଲୋକମାନଙ୍କୁ ପ୍ରଶାସନ ପକ୍ଷରୁ ବୁଝାସୁଝା କରି ଅଣାଯାଇଛି। ସ୍ଥାନୀୟ ସରପଞ୍ଚମାନେ ଡାକବାଜି ଯନ୍ତ୍ର ଯୋଗେ ଲୋକଙ୍କୁ ବାତ୍ୟା ଆଶ୍ରୟସ୍ଥଳକୁ ଆସିବା ପାଇଁ ପ୍ରଚାର କରିଥିଲେ। ପରେ ଦିନତମାମ ତଳିଆ ଅଞ୍ଚଳରେ ଥିବା ଲୋକଙ୍କ ସହ ମାଟି ଓ ଚାଳ ଘରେ ରହୁଥିବା ଲୋକଙ୍କୁ ବାତ୍ୟା ଆଶ୍ରୟସ୍ଥଳକୁ ନେବା ପାଇଁ ନାକେଦମ ହୋଇଥିଲେ। ଅଣ୍ଡିଲୋ, ନୋଳିଆ ସାହି, ପ୍ରବାସୀ ଇଟାଭାଟି, ବାଲିଅନ୍ତା ହାଟରେ ଥିବା ବଞ୍ଜାରା ନିଜ ଭିଟାମାଟି ଛାଡ଼ିବା ପାଇଁ ନାରାଜ ହେବାରୁ ସେମାନଙ୍କୁ ବୁଝାସୁଝା କରି ବାତ୍ୟା ଆଶ୍ରୟସ୍ଥଳକୁ ସ୍ଥାନାନ୍ତରିତ କରିଥିଲେ। ଗର୍ଭବତୀ ମହିଳା, ବୟସ୍କ ବୃଦ୍ଧବୃଦ୍ଧା, ଭିନ୍ନକ୍ଷମମାନଙ୍କର ସ୍ୱତନ୍ତ୍ର ଯତ୍ନ ନେବା ପାଇଁ ତହସିଲଦାର ଲିଳନପ୍ରସାଦ ସାହୁ ନିର୍ଦ୍ଦେଶ ଦେଇଥିଲେ। ବ୍ଲକ୍ ଉନ୍ନୟନ ଅଧିକାରୀ ରଶ୍ମିତା ନାଥ କହିଛନ୍ତି, ୩୬ଟି ଆଶ୍ରୟସ୍ଥଳରେ ୨୭ଶହ ଲୋକଙ୍କୁ ସ୍ଥାନାନ୍ତରିତ କରାଯାଇଛି। ଆଶ୍ରୟସ୍ଥଳୀରେ ୧୫୪୦ ଜଣଙ୍କୁ ମଧ୍ୟାହ୍ନ ଭୋଜନ ଯୋଗାଇ ଦିଆଯାଇଛି।ବାଲିଅନ୍ତା ବାତ୍ୟା ଆଶ୍ରୟସ୍ଥଳ ଓ ସ୍କୁଲରେ ଏଯାବତ ୬୦ ଜଣ ଆଶ୍ରୟ ନେଇଥିବା ବେଳେ ଜିତିକାରସୁଆଁଳ ସ୍କୁଲରେ ୫୦ ଜଣ, ଉଗ୍ରତାରା କଲ୍ୟାଣ ମଣ୍ଡପରେ ୪୫ଜଣ ଆଶ୍ରୟ ନେଇଛନ୍ତି। ସେମାନଙ୍କ ପାଇଁ ଶୁଖିଲା ଖାଦ୍ୟ ସହ ଦିନରେ ରନ୍ଧାଖାଦ୍ୟ ଯୋଗାଇ ଦିଆଯାଇଛି। ବାତ୍ୟା ଆଶ୍ରୟସ୍ଥଳଗୁଡ଼ିକରେ ଅଙ୍ଗନବାଡ଼ି କର୍ମୀ, ଆଶାକର୍ମୀମାନେ ନିୟୋଜିତ ହେବା ସହ ବାଲିଅନ୍ତା ସରପଞ୍ଚ କୃଷ୍ଣକେଶବ ଆପଟ୍ଟ, ପଞ୍ଚାୟତର ସମସ୍ତ କର୍ମଚାରୀ ବିପନ୍ନମାନଙ୍କ ପାଖରେ ଉପସ୍ଥିତ ରହିଛନ୍ତି। କାକରୁଦ୍ରପୁର ପଞ୍ଚାୟତରେ ଥିବା ଆଶ୍ରୟସ୍ଥଳ ଓ ଗାଦିବ୍ରହ୍ମ ସ୍କୁଲରେ ୧୫୦ ଜଣ ଆଶ୍ରୟ ନେଇଥିବା ବେଳେ ଜଗନ୍ନାଥପୁର ପଞ୍ଚାୟତରେ ଜୟରଶାସନ ସ୍କୁଲ୍ରେ ୧୦୬ ଜଣ ଆଶ୍ରୟ ନେଇଛନ୍ତି। ଜଗନ୍ନାଥପୁର କଲ୍ୟାଣ ମଣ୍ଡପରେ ୬୧ ଜଣ ରହିଛନ୍ତି। ସେମାନଙ୍କ ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଥିବା ସରପଞ୍ଚ ବିଶ୍ୱଜିତ ଭୋଇ ସୂଚନା ଦେଇଛନ୍ତି। ବଇଁଚୁଆ ସରପଞ୍ଚ ରଶ୍ମିତା ସାହୁ କହିଛନ୍ତି, ପଞ୍ଚାୟତ ଉଚ୍ଚ ବିଦ୍ୟାଳୟ ଓ ସୁବାଲୋରେ ୮୬ ଜଣ ଆଶ୍ରୟ ନେଇଛନ୍ତି। ବାତ୍ୟା ଆଶ୍ରୟସ୍ଥଳଗୁଡ଼ିକରେ ନାପକିନ, ପାଣି ବୋତଲ, ବିଦ୍ୟୁତ ସରବରାହରେ ବ୍ୟଘାତ ହେଲେ ବିଦ୍ୟୁତ ସେବା ଯୋଗାଇବା ପାଇଁ ଡିଜି, ସନ୍ଧ୍ୟାରେ ବିସ୍କିଟ୍, ରାତିରେ ରନ୍ଧା ଖାଦ୍ୟ ଯୋଗାଇ ଦିଆଯିବ। ସମସ୍ତ ଗର୍ଭବତୀ ମହିଳାଙ୍କୁ ହସ୍ପିଟାଲ ସ୍ଥାନାନ୍ତରିତ କରାଯାଇଥିବା ତହସିଲଦାର ସୂଚନା ଦେଇଛନ୍ତି।ଭୁବନେଶ୍ୱର ଉପଜିଲ୍ଲାପାଳ ଡ. ମନୋରଞ୍ଜନ ସାହୁ, ନୋଡାଲ ଅଧିକାରୀ ଏବଂ ବ୍ଲକ୍ ଉନ୍ନୟନ ଅଧିକାରୀ ବିଭିନ୍ନ ଆଶ୍ରୟସ୍ଥଳ ବୁଲି ଲୋକମାନଙ୍କର ରହିବା, ଖାଇବା ଏବଂ ସୁବିଧା ଅସୁବିଧା ତଦାରଖ କରିଛନ୍ତି। ଆଶ୍ରୟସ୍ଥଳରେ ଶିକ୍ଷକ, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ, ଗ୍ରାମ ରୋଜଗାର ସେବକ, ଯୋଗାଣ ସହାୟକ, ଆଶା ଓ ଅଙ୍ଗନବାଡ଼ି କର୍ମୀ ନିୟୋଜିତ ହୋଇଛନ୍ତି। ସେହିପରି ଗ୍ରାମ ପଞ୍ଚାୟତ ଅଧିକାରୀ ଶୁଭଶ୍ରୀ ଶୁଭଦର୍ଶିନୀ ଓ ବିଭିନ୍ନ ବିଭାଗର ପଦସ୍ଥ ଅଧିକାରୀ ବାତ୍ୟା ପରିଚାଳନା ନେଇ ନିୟୋଜିତ ହୋଇଛନ୍ତି।









Comments