ପାଣିରେ ଭାସୁଛି ପାଚିଲା ଧାନ: ୨ ଦିନରେ ୫୦ ମିଲିମିଟର ବର୍ଷା ସାଢ଼େ ୪ହଜାର ଲୋକଙ୍କୁ ସୁରକ୍ଷିତ ଉଦ୍ଧାର
ବାଲିପାଟଣା: ସମ୍ଭାବ୍ୟ ବାତ୍ୟା ‘ଅକ୍ଭାନ୍’ ବିପଦ ଟଳିଯାଇଛି। ପାଣିପାଗ ବିଭାଗର ଆକଳନକୁ ଦୃଷ୍ଟିରେ ରଖି ପ୍ରଶାସନ ସମ୍ପୂର୍ଣ୍ଣ ସଜାଗ ହୋଇ କାର୍ଯ୍ୟ ତୁଲାଇଛି। ପ୍ରତି ମୁହୂର୍ତ୍ତରେ ସଜାଗ ଥିବା ପ୍ରଶାସନିକ ଅଧିକାରୀ ଲୋକଙ୍କ ସମସ୍ୟା ସମାଧାନ କରିବା ଦିଗରେ କାର୍ଯ୍ୟ କରିଛନ୍ତି। ପ୍ରଶାସନ ତରଫରୁ ୧୭ଟି ପଞ୍ଚାୟତରେ ୬୪ଟି ଆଶ୍ରୟସ୍ଥଳ କରାଯାଇଥିଲା। ଗୁରୁବାର ବିଳମ୍ବିତ ରାତି ପର୍ଯ୍ୟନ୍ତ ଅସୁରକ୍ଷିତ ଅବସ୍ଥାରେ ଥିବା ୪୫୮୨ ଲୋକଙ୍କୁ ସୁରକ୍ଷିତ ଅବସ୍ଥାରେ ଆଶ୍ରୟସ୍ଥଳକୁ ଅଣାଯାଇଥିଲା। ଆଜି ସକାଳୁ ଶୁଖିଲା ଓ ମଧ୍ୟାହ୍ନରେ ରନ୍ଧାଖାଦ୍ୟ ପରେ ଘରକୁ ଯିବାକୁ ପରାମର୍ଶ ଦିଆଯାଇଥିଲା। ସମସ୍ତ ଆଶ୍ରୟସ୍ଥଳ ବନ୍ଦ କରିଦିଆଯାଇଥିବା ବିଡିଓ ଶୁଭ୍ରାଂଶୁ ଶେଖର ପାଢ଼ୀ ସୂଚନା ଦେଇଛନ୍ତି। ବାତ୍ୟା ଆଶ୍ରୟସ୍ଥଳକୁ ସ୍ଥାନାନ୍ତର ହୋଇଥିବା ଲୋକଙ୍କ ପାଇଁ ଗୁରୁବାର ଓ ଶୁକ୍ରବାର ଶୁଖିଲା ଓ ରନ୍ଧାଖାଦ୍ୟ ବ୍ୟବସ୍ଥା କରାଯାଇଛି। ଗୁରୁବାର ୧୬ ମିଲିମିଟର ଓ ଶୁକ୍ରବାର ୩୪ ମିଲିମିଟର ବର୍ଷା ହୋଇଛି। ବାଲିପାଟଣା ବ୍ଲକ୍ରେ ୯ ହଜାର ୩ ଶହ ହେକ୍ଟର ଖରିଫ ଧାନ ଚାଷ ହୋଇଛି। କେନାଲ ପାଣି ଛାଡ଼ି ନ ଥିଲା। କିଛି ଜମିରେ ଧାନ କଞ୍ଚା ଅବସ୍ଥାରେ ଅଛି। ବହୁତ ଜମିରେ ଧାନ ପାଚିଗଲାଣି। ଆଉ ଦିନ କେଇଟା ପରେ ଧାନ ଅମଳ ହୋଇଥାନ୍ତା। ଅଧିକ ଦିନ ପାଣିରେ ବୁଡ଼ି ରହିଲେ ଧାନ ଶଢ଼ିଯିବା ସହ ଗଜା ହୋଇଯିବା ଆଶଂକା ସୃଷ୍ଟି ହୋଇଛି। ଚାଷୀର ସମସ୍ତ ପରିଶ୍ରମ ବୃଥା ହୋଇଯିବ। ବର୍ଷକ ଆହାର ଯୋଗାଡ଼ରେ ବାଧକ ହେବ। ଚାଷୀ ମୁଣ୍ଡରେ ବର୍ଷା ପବନ ଚଡ଼କ ପକାଇଛି। ସେହିପରି ପନିପରିବା ଚାଷ ପ୍ରଭାବିତ ହୋଇଛି। ଶନିବାରଠାରୁ କ୍ଷୟକ୍ଷତି ଆକଳନ କରାଯିବ ବୋଲି ବାଲିପାଟଣା କୃଷି ବିଭାଗ ଅଧିକାରୀ ସୁବାସ ଚନ୍ଦ୍ର ବାରିକ କହିଛନ୍ତି।









Comments