କଫ୍ସିରପ୍ କଳାବେପାର: ୨ ଗିରଫ, ୧୧.୬୩ ଲକ୍ଷ ଟଙ୍କା ସହ ୨ ପିସ୍ତଲ ଜବତ
ରାଉରକେଲା: ନିଶା କାରବାରର ଚେର ଏବେ କେବଳ ଗଞ୍ଜେଇ କିମ୍ବା ବ୍ରାଉନସୁଗାରରେ ସୀମିତ ନାହିଁ। ନିଷିଦ୍ଧ କଫ୍ ସିରପ୍କୁ ଅସ୍ତ୍ର କରି ଚାଲିଥିଲା ଏକ ବଡ଼ ବେଆଇନ କାରବାର। ଏହାର ଚେର ଖୋଜୁଖୋଜୁ ରାଉରକେଲା ପୁଲିସ ହାତରେ ଲାଗିଛି ନଗଦ ୧୧ ଲକ୍ଷ ୬୩ ହଜାର ଟଙ୍କା, ଦୁଇଟି ଦେଶୀ ପିସ୍ତଲ ଓ ଦୁଇଟି ଗୁଳି। ଏହି ରୢାକେଟ୍ର କିଙ୍ଗପିନ୍ ରାଜଗାଙ୍ଗପୁରର ମହମ୍ମଦ ସଦ୍ଦାମ ଗତ ୪ ମାସ ମଧ୍ୟରେ ୫୦ ହଜାରରୁ ଅଧିକ ବୋତଲ କଫ୍ ସିରପ୍ କାରବାର କରିଥିବା ରାଉରକେଲା ଏସ୍ପି ନୀତେଶ ୱାଧୱାନୀ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି।ପୁଲିସ ସୂଚନା ଅନୁଯାୟୀ, ଶୁକ୍ରବାର ସକାଳେ ପ୍ଲାଣ୍ଟସାଇଟ୍ ଥାନା ପୁଲିସ ବିଶ୍ରା ଛକରେ ନାକାବନ୍ଦୀ କରି ଏକ କାର୍କୁ ଅଟକାଇଥିଲା। ଗାଡ଼ିରେ ଥିବା ଦୁଇ ଯୁବକଙ୍କ ପରିଚୟ ଯାଞ୍ଚ ପରେ କାର୍ ତଲାସି କରାଯାଇଥିଲା। ଗାଡ଼ିରୁ ନଗଦ ୧୧ ଲକ୍ଷ ୬୩ ହଜାର ଟଙ୍କା, ଦୁଇଟି ଦେଶୀ ପିସ୍ତଲ, ଦୁଇଟି ଗୁଳି, ତିନୋଟି ମୋବାଇଲ୍ ଫୋନ୍ ଏବଂ ନିଷିଦ୍ଧ କଫ୍ ସିରପ୍ ‘ୱିନ୍ସର୍ଏକ୍ସ’ କିଣା ସମ୍ପର୍କିତ କିଛି ଦସ୍ତାବିଜ ମିଳିଥିଲା। ଏହାସହ ଡିଲ୍ରେ ବ୍ୟବହୃତ ଓଡି୧୪ଏଏ-୦୨୭୯ ନମ୍ବର କାର୍କୁ ମଧ୍ୟ ଜବତ କରାଯାଇଛି। ଗିରଫ ଦୁଇ ଅଭିଯୁକ୍ତ ହେଲେ ରାଜଗାଙ୍ଗପୁରର ମହମ୍ମଦ ସଦ୍ଦାମ (୩୪) ଓ ସମ୍ବଲପୁରଜିଲ୍ଲା ବୁର୍ଲା ଟିୱରପଡ଼ାର ତ୍ରିବିକ୍ରମ ସୁନା (୨୮)।ଥାନାରେ ପଚରାଉଚରା ବେଳେ ସେମାନେ ବିଭିନ୍ନ ପରିବହନ ସଂସ୍ଥା ଜରିଆରେ ରାଜ୍ୟ ବାହାରୁ ନିଷିଦ୍ଧ କଫ୍ସିରପ୍ ଆଣି ରାଉରକେଲା ବାଟ ଦେଇ ବରଗଡ଼, ଝାରସୁଗୁଡ଼ା, ସମ୍ବଲପୁର ଜିଲ୍ଲାରେ ପହଞ୍ଚାଉଥିଲେ। ଏହି ବେଆଇନ କାରବାରର ମୁଖ୍ୟ ସୂତ୍ରଧର ସଦ୍ଦାମ ଗତ ୪ ମାସରେ ୫୦ ହଜାରରୁ ଅଧିକ ବୋତଲ କଫ୍ସିରପ୍ ନେଣଦେଣ କରିଥିବା ତଦନ୍ତରୁ ଜଣାପଡ଼ିଛି। କଫ୍ସିରପ୍ ବେପାରରୁ ମିଳିଥିବା ଟଙ୍କାରେ ସଦ୍ଦାମ ଦୁଇଟି ବନ୍ଧୁକ କିଣି ରଖିଥିବା ପୁଲିସ କହିଛି। ତେବେ ଏହି କାରବାର ପଛରେ ଆଉ କେଉଁମାନଙ୍କ ହାତ ରହିଛି, ନିଷିଦ୍ଧ କଫ୍ସିରପ୍ କେଉଁଠାରୁ ଆସୁଥିଲା ଏବଂ ଯୋଗାଣ ଶୃଙ୍ଖଳରେ କେଉଁମାନେ ସାମିଲ ଅଛନ୍ତି, ସେ ନେଇ ତଦନ୍ତ ଜାରି ରହିଛି। ସାମ୍ବାଦିକ ସମ୍ମିଳନୀରେ ଜୋନ୍-୨ ଡିଏସ୍ପି ଯତୀନ୍ଦ୍ରନାଥ ସେଠୀ ଓ ପ୍ଲାଣ୍ଟସାଇଟ୍ ଥାନାଧିକାରୀ ବିବତ୍ସ ପ୍ରଧାନ ଉପସ୍ଥିତ ଥିଲେ।









Comments