ଯାଜପୁରରେ ‘ଓଡ଼ିଶା-୫୦’: ‘ମହିଳାଙ୍କ ବିକାଶରେ ବିକଶିତ ଭାରତ ସମ୍ଭବ’
ଯାଜପୁର: ଉତ୍କଳୀୟ ସଂସ୍କୃତିରେ ନାରୀମାନଙ୍କ ଭୂମିକା ସବୁବେଳେ ଉଚ୍ଚରେ ଥିଲା। ୬ ରାଣୀ ରାଜ୍ୟ ଶାସନ କରିବାର ଇତିହାସ ମଧ୍ୟ ରହିଛି। ଏବେ ମହିଳାମାନେ ଶିକ୍ଷା, ସ୍ବାସ୍ଥ୍ୟ, କ୍ରୀଡ଼ା, ବିଜ୍ଞାନ ଓ ପ୍ରଯୁକ୍ତିବିଦ୍ୟା କ୍ଷେତ୍ରରେ ବହୁ ଆଗକୁ ଗଲେଣି। ମହିଳାମାନଙ୍କ ବିକାଶ ହେଲେ ବିକଶିତ ଭାରତ ଗଠନ ସମ୍ଭବ ହେବ ବୋଲି ଯାଜପୁରରୋଡ୍ ବ୍ୟାସଦେବ ଟାଉନ ହଲ୍ରେ ‘ସମ୍ବାଦ’ ପକ୍ଷରୁ ଆୟୋଜିତ ‘ଓଡ଼ିଶା-୫୦’ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ଯାଜପୁର ସାଂସଦ ଡ. ରବୀନ୍ଦ୍ର ନାରାୟଣ ବେହେରା ମତବ୍ୟକ୍ତ କରିଛନ୍ତି। ଯେତେବେଳେ ଆମେ ଜିଡିପି କଥା କହୁଛୁ, ମହିଳାଙ୍କ ଯୋଗଦାନକୁ ହିସାବକୁ ନେଉ ନାହୁଁ। ଅନ୍ୟ ଦେଶମାନେ ମହିଳାଙ୍କ ଯୋଗଦାନକୁ ହିସାବକୁ ନେଉଛନ୍ତି। ଆମ ଦେଶରେ ମହିଳାମାନେ ପରିବାର ଦାୟିତ୍ବ ନେବାଠାରୁ ଆରମ୍ଭ କରି ଘରେ ରହି ଅନେକ ଛୋଟଛୋଟ ଉତ୍ପାଦ ତିଆରି କରୁଛନ୍ତି। କିନ୍ତୁ ଯେଉଁମାନେ ଚାକିରି କରୁଛନ୍ତି କେବଳ ସେହିମାନଙ୍କ ଯୋଗଦାନକୁ ହିସାବକୁ ନିଆଯାଉଛି, ଘରେ ରହି କାମ କରୁଥିବା ମହିଳାଙ୍କ କଥା ବିଚାରକୁ ନିଆଯାଉ ନାହିଁ। ଯଦି ସେମାନଙ୍କ ଯୋଗଦାନକୁ ହିସାବକୁ ନିଆଯାଏ ତା’ ହେଲେ ଆମେରିକାର ଜିଡିପି ସହିତ ଭାରତର ଜିଡିପି ସମାନ ହୋଇଯିବ ବୋଲି ଡ. ବେହେରା କହିଥିଲେ। ମୁଖ୍ୟବକ୍ତା ଯାଜପୁର ଜିଲ୍ଲାପାଳ ଅମ୍ବର କୁମାର କର କହିଥିଲେ, ମଣିଷ ଜୀବନସାରା ଅଭିଜ୍ଞତା ଗୋଟାଇଥାଏ। ସମାଜର ୫୦ ପ୍ରତିଶତ ହେଉଛନ୍ତି ମହିଳା। ସେମାନେ ଆଗକୁ ନ ବଢ଼ିଲେ ଆମ ରାଜ୍ୟ ଓ ଦେଶ ଆଗକୁ ବଢ଼ିପାରିବ ନାହିଁ। ଆମେ ମହିଳା ଶକ୍ତିକୁ ସବୁବେଳେ ସମ୍ମାନ ଦେଇଆସିଛୁ। ସେମାନେ କିଭଳି ସଂଗଠିତ ହୋଇପାରିବେ ଏବଂ ଆର୍ଥିକ ସ୍ବାବଲମ୍ବୀ ହୋଇପାରିବେ, ଘର ଚାରିକାନ୍ଥରୁ ବାହାରି କିଛି କରିପାରିବେ ସେଥିପ୍ରତି ଗୁରୁତ୍ବ ଦିଆଯିବା ଆବଶ୍ୟକ। ଯାଜପୁର ଜିଲ୍ଲାରେ ୩୦ ହଜାର ଏସ୍ଏଚ୍ଜି ଅଛନ୍ତି। ପ୍ରତି ଗ୍ରୁପ୍ରେ ୧୦ରୁ ୧୨ ଜଣ ଲେଖାଏଁ ମହିଳା ଅଛନ୍ତି। ତିନିଲକ୍ଷରୁ ଊର୍ଦ୍ଧ୍ବ ମହିଳାଙ୍କୁ ସଂଗଠିତ କରାଯାଇଛି। ୨୦୨୫-୨୬ରେ ଏସ୍ଏଚ୍ଜିମାନଙ୍କୁ ୧୦୯୨ କୋଟି ଟଙ୍କା ଋଣ ଦିଆଯାଇଛି। ହାରାହାରି ଋଣ ୬ ଲକ୍ଷ ଟଙ୍କା ରହିଛି। ମହିଳାମାନେ ଋଣ ନେଇ ତାହାକୁ ବିନିଯୋଗ କରି ସ୍ବାବଲମ୍ବୀ ହୋଇପାରୁଛନ୍ତି। ବ୍ୟାଙ୍କମାନେ ସେମାନଙ୍କୁ ଅଧିକରୁ ଅଧିକ ଋଣ ଦେବାକୁ ଆଗ୍ରହ ପ୍ରକାଶ କରୁଛନ୍ତି। ମହିଳାମାନେ ସଂଗଠିତ ହେଲେ ଆଗକୁ ବଢ଼ିବାକୁ ସାହସ ଜୁଟାଇପାରିବେ ବୋଲି ଜିଲ୍ଲାପାଳ ପ୍ରକାଶ କରିଥିଲେ। ଇଷ୍ଟର୍ଣ୍ଣ ମିଡିଆ ଲିମିଟେଡ୍ର ନିର୍ଦ୍ଦେଶିକା ଡ. ମୋନିକା ନୈୟର ପଟ୍ଟନାୟକ କହିଥିଲେ, ପ୍ରତିକୂଳ ପାଗ ସତ୍ତ୍ବେ ଏତେ ସଂଖ୍ୟାରେ ମହିଳା ଏକାଠି ହୋଇଥିବାରୁ ଖୁସି ଲାଗୁଛି। ମହିଳାମାନେ ବଡ଼ି, ପାମ୍ପଡ଼ଠାରୁ ଆରମ୍ଭ କରି ମାଛଚାଷ, ଛତୁଚାଷ କରି ଆଗକୁ ବଢ଼ୁଛନ୍ତି। ସେମାନଙ୍କୁ ପ୍ରଶିକ୍ଷଣ, ଋଣ ପ୍ରଦାନ ସହ ଉତ୍ପାଦର ବିକ୍ରି ପାଇଁ ଉଚିତ ବଜାର ବ୍ୟବସ୍ଥା ସାଙ୍ଗକୁ ଉତ୍ତମ ପ୍ରୋତ୍ସାହନ ମିଳିବା ଦରକାର। ଶିଖିବା ଓ କିଛି କରିବା ପାଇଁ ବୟସ ଆଦୌ ପ୍ରତିବନ୍ଧକ ନୁହେଁ। କାର୍ଯ୍ୟକ୍ରମରେ ଇଷ୍ଟର୍ଣ୍ଣ ମିଡିଆ ଲିମିଟେଡ୍ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ସୌମ୍ୟରଂଜନ ପଟ୍ଟନାୟକ ସଭାପତିତ୍ବ କରି କହିଥିଲେ, ବିଶ୍ବର ଅଧା ହେଉଛନ୍ତି ମହିଳା। ସେମାନେ ଅନ୍ୟମାନଙ୍କ ଉପରେ ନିର୍ଭର ନ କରି ଆତ୍ମନିର୍ଭର ହୋଇ ନିଜ କଥା ନିଜେ ବୁଝିବା ଦରକାର। ନାରୀ ଯେମିତି ନିର୍ଯାତିତ ନହେବ ସେ ନିଜେ ସେଥିପାଇଁ ସଂକଳ୍ପ ନେବା ଆବଶ୍ୟକ। ଶିକ୍ଷା କ୍ଷେତ୍ରରେ ମହିଳାମାନେ ଆଗକୁ ବଢ଼ୁଛନ୍ତି। ମାଟ୍ରିକରେ ‘ଏ-୧’ ରଖୁଥିବା ପିଲାଙ୍କ ମଧ୍ୟରେ ୬୦ରୁ ୭୦ ପ୍ରତିଶତ ହେଉଛନ୍ତି ଝିଅ। ମହିଳାଙ୍କୁ ଯଦି ନିର୍ଯାତନାରୁ ମୁକ୍ତି ଦେବାକୁ ହେବ, ସେମାନଙ୍କୁ ଯଦି ପ୍ରକୃତରେ ସ୍ବାଧୀନ କରିବାକୁ ପଡ଼ିବ, ପ୍ରଥମେ ଶିକ୍ଷିତ କରିବାକୁ ପଡ଼ିବ। ଶିକ୍ଷାଗ୍ରହଣ ସାଙ୍ଗକୁ ମହିଳାମାନେ ସ୍ବାବଲମ୍ବୀ ହୋଇ ପାରିଲେ ସ୍ବାଧୀନତା ଆପେଆପେ ମିଳିବ। ଏଥିସହିତ ଶ୍ରୀ ପଟ୍ଟନାୟକ ‘୫-ମ’ର ଉଦାହରଣ ଦେଇଥିଲେ। ମା’, ମାଟି ଓ ମାତୃଭାଷାକୁ ଭଲପାଇବା, ମୋବାଇଲର ଉଚିତ ବ୍ୟବହାର ଏବଂ ମଦମୁକ୍ତ ଓଡ଼ିଶା ଗଠନ ପାଇଁ ମହିଳାଙ୍କୁ ଆହ୍ବାନ ଦେଇଥିଲେ। ଅଂଶୁମାନ ମେମୋରିଆଲ ଟ୍ରଷ୍ଟ, ଏସ୍ଟି ମିନେରାଲ ଓ ପ୍ରକାଶ ଇଣ୍ଡଷ୍ଟ୍ରିଜ୍ର ସହଯୋଗରେ ଆୟୋଜିତ ଏହି କାର୍ଯ୍ୟକ୍ରମରେ ୨୦୦ରୁ ଊର୍ଦ୍ଧ୍ବ ମହିଳା ଅଂଶଗ୍ରହଣ କରିଥିଲେ। ‘ସମ୍ବାଦ’ ଯାଜପୁର ସଂସ୍କରଣ ମୁଖ୍ୟ ଗଦାଧର ପଣ୍ଡା କାର୍ଯ୍ୟକ୍ରମ ସମ୍ପର୍କରେ ସୂଚନା ଦେବା ସହ ଅତିଥିମାନଙ୍କ ପରିଚୟ ପ୍ରଦାନ କରିଥିଲେ। ‘ସମ୍ବାଦ’ କେନ୍ଦୁଝରଜିଲ୍ଲା ପ୍ରତିନିଧି ସୁବ୍ରତ ସ୍ବାଇଁ ଧନ୍ୟବାଦ ଦେଇଥିଲେ।









Comments