ନୂତନ ଗବେଷଣା ଫୁସ୍ଫୁସ୍ କର୍କଟ ରୋଗ ଚିକିତ୍ସାରେ ଆଶା ସଞ୍ଚାର କରିଛି: କିମ୍ସ କ୍ୟାନ୍ସର ସେଣ୍ଟର ମୁଖ୍ୟ : ଓମଟିଭି)
ଫୁସ୍ଫୁସ୍ ରୋଗ ଚିକିତ୍ସାରେ ଜେନେଟିକ୍ ପରୀକ୍ଷା ଷ୍ଟେରିଓଟାକ୍ଟିକ୍ ବଡି ରେଡ଼ିଓ ଥେରାପି, ଟାର୍ଗେଟେଡ୍ କ୍ୟାନ୍ସର ଡ୍ରଗ୍ ଡେଲିଭରି ମେକାନିଜିମ୍ର ସଂଯୋଗିକରଣ ଏବଂ ଇମ୍ୟୁନୋଥେରାପି ସହ ନୂତନ
BIDYADHAR BARIK MADHU
ନୂତନ ଗବେଷଣା ଫୁସ୍ଫୁସ୍ କର୍କଟ ରୋଗ ଚିକିତ୍ସାରେ ଆଶା ସଞ୍ଚାର କରିଛି: କିମ୍ସ କ୍ୟାନ୍ସର ସେଣ୍ଟର ମୁଖ୍ୟ : ଓମଟିଭି)
ଭୁବନେଶ୍ୱର, ୧ ।୮(ଓମ): ଫୁସ୍ଫୁସ୍ ରୋଗ ଚିକିତ୍ସାରେ ଜେନେଟିକ୍ ପରୀକ୍ଷା ଷ୍ଟେରିଓଟାକ୍ଟିକ୍ ବଡି ରେଡ଼ିଓ ଥେରାପି, ଟାର୍ଗେଟେଡ୍ କ୍ୟାନ୍ସର ଡ୍ରଗ୍ ଡେଲିଭରି ମେକାନିଜିମ୍ର ସଂଯୋଗିକରଣ ଏବଂ ଇମ୍ୟୁନୋଥେରାପି ସହ ନୂତନ ଗବେଷଣା ଫୁସ୍ଫୁସ୍ କର୍କଟ ରୋଗୀଙ୍କ ଚିକିତ୍ସା କ୍ଷେତ୍ରରେ ନୂତନ ଆଶା ସଞ୍ଚାର କରିଛି । ଆଜି ବିଶ୍ୱ ଫୁସ୍ଫୁସ୍ କର୍କଟ ରୋଗ ଦିବସ ଅବସରରେ କିମ୍ସ କର୍କଟ ରୋଗ ଚିକିତ୍ସା କେନ୍ଦ୍ର ନିର୍ଦ୍ଦେଶକ ତଥା ବିଶିଷ୍ଟ କର୍କଟ ରୋଗ ବିଶେଷଜ୍ଞ ପ୍ରଫେସର ଡା. ବିଧୁ କଲ୍ୟାଣ ମହାନ୍ତି କହିଛନ୍ତି । ନୂତନ ଭାବେ ପ୍ରତିଷ୍ଠା ହୋଇଥିବା କିମ୍ସ କର୍କଟ ରୋଗ ଚିକିତ୍ସା କେନ୍ଦ୍ରର ମୁଖ୍ୟ ଦାୟିତ୍ୱରେ ଥିବା ଡା. ମହାନ୍ତି କହିଲେ, ଓଡ଼ିଶାରେ ମୁଖ୍ୟତଃ ପାକସ୍ଥଳୀ, ମୁଖଗହ୍ୱର, ସ୍ତନ, ଗର୍ଭାଶୟ ଓ ଫୁସ୍ଫୁସ୍ କର୍କଟ ରୋଗ ଦେଖାଦେଇଥାଏ । ଏଥିରେ ଫୁସ୍ଫୁସ୍ କର୍କଟ ରୋଗ ୫ମ ସ୍ଥାନରେ ରହିଛି । ପୁରୁଷଙ୍କ କ୍ଷେତ୍ରରେ ପାକସ୍ଥଳୀ ଓ ମୁଖ ଗହ୍ୱର ପ୍ରଥମ ଓ ଦ୍ୱିତୀୟ ସ୍ଥାନରେ ରହିଥିବା ବେଳେ ଫୁସ୍ଫୁସ୍ କର୍କଟ ରୋଗ ତୃତୀୟ ସ୍ଥାନରେ ରହିଛି । ଧୂମପାନ, ତମାଖୁ ସେବନ, ରାସାୟନିକ ପଦାର୍ଥ, ପରିବେଶ ପ୍ରଦୂଷଣ ଆଦି ବୃତ୍ତିଗତ ବିପଦ ଏବଂ ବଂଶଗତ କାରଣ ଯୋଗୁଁ ମଧ୍ୟ ଫୁସ୍ଫୁସ୍ କର୍କଟ ରୋଗ ହୋଇଥାଏ । ଶରୀରରେ ଫୁସ୍ଫୁସ୍ କର୍କଟ ରୋଗ ସୃଷ୍ଟି କରିବା ପାଇଁ ଏଗୁଡ଼ିକ ଦୀର୍ଘ ସମୟ ନେଇଥାନ୍ତି, ଯେଉଁଥି ପାଇଁ ଜଣେ ବ୍ୟକ୍ତିର ୫୦ ବର୍ଷ କିମ୍ବା ତଦୂର୍ଦ୍ଧ୍ୱ ବର୍ଷରେ ଫୁସ୍ଫୁସ୍ କର୍କଟ ରୋଗ ଚିହ୍ନଟ ହୋଇଥାଏ ।
ମାତ୍ର ପାଶ୍ଚାତ୍ୟ ଦେଶଗୁଡ଼ିକରେ ଧୂମପାନ ଓ ତମାଖୁ ସେବନ କରୁ ନ ଥିବା ବ୍ୟକ୍ତିଙ୍କ ମଧ୍ୟରେ ଫୁସ୍ଫୁସ୍ କର୍କଟ ରୋଗ ବଢୁଥିବା ଡା. ମହାନ୍ତି କହିଛନ୍ତି । ପାଶ୍ଚାତ୍ୟ ଦେଶଗୁଡ଼ିକରେ ଏଥିପାଇଁ ପ୍ରଦୂଷଣ, ବଂଶଗତ ଏବଂ ଅନ୍ୟାନ୍ୟ ଜୀବନ ଶୈଳୀ ଏହାର କାରଣ ହୋଇପାରେ ବୋଲି ସେ କହିଛନ୍ତି । ଫୁସ୍ଫୁସ୍ କର୍କଟ ରୋଗର ଲକ୍ଷଣ ସମ୍ପର୍କରେ ସେ କହିଲେ, ଏହି ରୋଗୀଙ୍କ କ୍ଷେତ୍ରରେ ନିଃଶ୍ୱାସ ପ୍ରଶ୍ୱାସରେ କଷ୍ଟ, ଓଜନ ହ୍ରାସ, ଜ୍ୱର, ଦୀର୍ଘ ସପ୍ତାହ କିମ୍ବା ମାସମାସ ଧରି ଛାତିରେ ଯନ୍ତ୍ରଣା ହେଲେ ରୋଗୀ ଡାକ୍ତରୀ ପରାମର୍ଶ ନେବା ଉଚିତ । ଅନ୍ୟାନ୍ୟ କର୍କଟ ରୋଗୀ ଯଥା ମୁଖ ଗହ୍ୱର, ସ୍ତନ ଏବଂ ଗର୍ଭାଶୟ କର୍କଟ ରୋଗୀଙ୍କ ଅପେକ୍ଷା ଫୁସ୍ଫୁସ୍ କର୍କଟ ରୋଗୀଙ୍କ କ୍ଷେତ୍ରରେ ବଞ୍ଚିବାର ସମ୍ଭାବନା ହାର କମ୍ ବୋଲି ଡା. ମହାନ୍ତି କହିଛନ୍ତି । ପ୍ରାୟ ୫୦ ପ୍ରତିଶତ ଫୁସ୍ଫୁସ୍ କର୍କଟ ରୋଗୀ ରୋଗ ଚିହ୍ନଟ ହେବାର ବର୍ଷକ ମଧ୍ୟରେ ମୃତ୍ୟୁବରଣ କରିଥାନ୍ତି । କାରଣ ୭୦ରୁ ୮୦ ପ୍ରତିଶତ ଫୁସ୍ଫୁସ୍ କର୍କଟ ରୋଗୀଙ୍କ କ୍ଷେତ୍ରରେ ରୋଗ ବହୁ ବିଳମ୍ବରେ ଚିହ୍ନଟ ହୋଇଥାଏ । ଏମାନଙ୍କ କ୍ଷେତ୍ରରେ ଷ୍ଟେଜ-୩ କିମ୍ବା ଷ୍ଟେଜ୍-୪ ଅବସ୍ଥାରେ ରୋଗ ଚିହ୍ନଟ ହୋଇଥାଏ । ରୋଗ ତୁରନ୍ତ ଚିହ୍ନଟ ହୋଇପାରିଲେ ରୋଗୀଙ୍କ ବଞ୍ଚିବା ହାର ୬୦ରୁ ୭୦ ପ୍ରତିଶତ ରହିଥାଏ । ପ୍ରାଥମିକ ଅବସ୍ଥାରେ ଫୁସ୍ଫୁସ୍ କର୍କଟ ରୋଗ ଚିହ୍ନଟ ହେଲେ ରୋଗୀଙ୍କଠାରେ ଅସ୍ତ୍ରୋପଚାର ଏବଂ ରେଡ଼ିଓଥେରାପି ଆଦି ଚିକିତ୍ସା ପ୍ରକ୍ରିୟା ଗ୍ରହଣ କରାଯାଇଥାଏ । ପରବର୍ତ୍ତୀ ପର୍ଯ୍ୟାୟରେ କେମୋଥେରାପି ଏବଂ ରେଡ଼ିଓଥେରାପି ଚିକିତ୍ସା କରାଯାଇପାରେ । ରୋଗର ଜଟିଳ ପର୍ଯ୍ୟାୟରେ କେତେକ କ୍ଷେତ୍ରରେ କେମୋଥେରାପି ଓ ରେଡ଼ିଓଥେରାପି ଚିକିତ୍ସାରେ ଉନ୍ନତି ପରିଲକ୍ଷିତ ନ ହେଲେ ରୋଗୀକୁ ଦୈନିକ ଚିକିତ୍ସାରେ ବଞ୍ଚାଇ ରଖାଯିବା ସହ ପାଲିଏଟିଭ୍ କେୟାରର ସାହାରା ନିଆଯାଇଥାଏ ବୋଲି ସେ କହିଥିଲେ ।
